ރާއްޖޭގެ 61 ރަށުގައި ޕޮލިސް ސްޓޭޝަން އަޅަން މިދިޔަ ސަރުކާރުން އިންޑިއާގެ ކުންފުންޏަކާ ހަވާލު ކުރުމުގައި ބޮޑެތި އޮޅުވައިލުންތަކެއް ހުރި ކަމަށް ބެލެވޭތީ ފުލުުހުން އެކަން ތަހުގީގުކުރަން ފަށައިފި އެވެ.
ހޯމް މިނިސްޓަރީ އާއި އެ މިނިސްޓްރީގެ ދަށުން ހިންގާ އިދާރާތަކުން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކައްކަވަމުން ފުލުހުންގެ ޑެޕިއުޓީ ކޮމިޝަނާ އޮފް ޕޮލިސް، އިސްމާއިލް ނަވީން ވިދާޅުވީ މައްސަލައެއްގެ ގޮތުގައި ފުލުސް ސްޓޭޝަންތައް އެޅުމަށް އެއްބަސްވި އެއްބަސްވުމުގެ މައްސަލަ އެ އިދާރާއިން ތަހުގީގު ކުރަމުންދާ ކަމަށެވެ.
އެ މައްސަލައިގެ ތަފުސީލު ދެއްވަމުން ހޯމް މިނިސްޓަރު، އަލީ އިހުސާން ވިދާޅުވީ ރާއްޖޭގެ 61 ރަށުގައި ޕޮލިސް ސްޓޭޝަންތައް އެޅުމަށް 41.18 މިލިއަން އެމެރިކާ ޑޮލަރުގެ މަޝަރޫއެއް ރާއްޖޭގައި ހިންގުމަށް އިންޑިއާގެ އިންދިރާ ޕްރޮޖެކްޓްސް ކިޔާ ކުންފުންޏަކުން އޯގަސްޓު 26، 2019 ޝައުގުވެރިކަން ފާޅުކޮށްފައިވާ ކަމަށެވެ.
އެ ކުންފުންޏަށް ރާއްޖޭގައި އެ މަޝްރޫއު ކުރިއަށް ގެންދެވިދާނެ ކަމަށް ދިވެހި ސަރުކާރުން އޭރު ފެހި ސިގުނަލެއް ދިނުމުން އެ ޕްރޮޖްކްޓުގެ 85 ޕަސެންޓު ފައިނޭންސް ކުރާނީ އިންޑިއާގެ އެގްޒިމް ބޭންކު މެދުވެރިކޮށް ކަމަށާއި ރާއްޖޭން ހަރަދު ކުރަންޖެހޭނީ ޕްރޮޖެކްޓުގެ 15 އިންސައްތަ ކަމަށް އެއްބަސްވެފައި އޮތްކަން ލިޔުންތަކުން ފެންނަން އެބަހުރި ކަމަށް އިހުސާން ވިދާޅުވި އެވެ.
އެއަށްފަހު އޮކްޓޫބަރު 12، 2022 ގައި ޕްރޮޖެކްޓު ހިންގުމަށް އެއްބަސްވި އިންދިރާ ޕްރޮޖެކްޓްސް ކުންފުނި، އޭބީއެލް އިންދިރާ ޕްރޮޖެކްޓްސް ކިޔާ ޖޭވީ ކިޔާ ޕާޓުނާޝިޕަކަށް ރާއްޖޭގައި ބަދަލުކޮށް، ރެޖިސްޓާ ކުރި މައުލޫމާތު ރިކޯޑުތަކުން ފެންނަން އެބަހުރި ކަމަށް އިހުސާން ވިދާޅުވި އެވެ.
"މި މައުލޫމާތުގެ އަލީގައި ދެން ސަރުކާރުން ޑީލް ކުރަން ފަށާފައި މި އޮންނަނީ މި ދެންނެވި ޖޮއިންޓު ވެންޗާ ކުންފުންޏަށް ނުވަތަ ޕާޓުނާޝިޕާ އެކުގައި، އެއްވެސް ފައިސާއެއް އިންޑިއާގެ އެގްޒިމް ބޭންކަން ނުލިބޭ އޭރަކު ވެސް ދިވެހި ސަރުކާރަކަށް އެހެން އޮއްވައި 7 މާޗު 2023 ގައި ސަރުކާރުން ދައްކައިފި މި ދެންނެވި ކުންފުންޏަށް 3.6 މިލިއަން ޔޫއެސް ޑޮލަރު،" އެ ކުންފުންޏަކީ ރާއްޖެއަށް ބޭރުން ފައިސާ ގެނެސް ޕޮލިސް ސްޓޭޝަންތަކެއް އެޅުމުގެ މަސައްކަތް ކުރަން ހަވާލު ކޮށްފައި އޮތް ކުންފުންޏެއް ނަމަވެސް ފުރަތަމަ އެ ކުންފުންޏަށް ފައިސާ ދިނީ ސަރުކާރުން ކަން ފާހަގަ ކުރައްވައި އިހުސާން ވިދާޅުވި އެވެ.
ދިވެހި ސަރުކާރުން އެ ކުންފުންޏަށް ފައިސާ ދެއްކުމަށް ފަހުގައި ވެސް ފުލުސް ސްޓޭޝަންތައް އެޅުމުގެ އަމަލީ އެއްވެސް މަސައްކަތެއް ކުރިއަށް ގެންގޮސްފައި ނުވާ ކަން ފާހަގަކުރައްވައި އިހުސާން ވިދާޅުވީ އެކަން އެހެން އޮއްވައި އޭޕްރިލް 23، 2023 ގައި އެ ޕްރޮޖްކްޓު ހިންގުމަށް އިންޑިއާގެ އެގްޒިމް ބޭންކުން ދޭގޮތަށް ހަމަޖެހިފައި އޮތް ލޯނު ފައިސާ ނުދޭން މިހާރު ނިންމާފައިވާ ކަމަށް އިންދިރާ ޕްރޮޖެކްޓްސް އިން ރާއްޖެއަށް އަންގާފައިވާ ކަމަށެވެ.
އެފަހުން ކުރެވުނު އެއްވެސް މުއާމަލާތެއްގެ އަލީގައި ދިވެހި ސަރުކާރުން އިންދިރާ ޕްރޮޖެކްޓްސްއަށް ދިން ފައިސާއަށް ވީގޮތެއް ވެސް އަދި ސާފު ނުވާކަމަށާއި އެ ޕްރޮޖެކްޓު ވެސް އެއްވެސް ވަރަކަށް ކުރިއަށް ނުދާ ކަމަށް އިހުސާން ވިދާޅުވި އެވެ.
އިހުސާން ވިދާޅުވީ އެކަން އެހެން ހިނގަހިނގައި އޮއްވައި އޯގަސްޓު 13، 2023 ގައި 61 ފުލުސް ސްޓޭޝަން އެޅުމަށް ހިލޭ އެހީގެ ގޮތުގައި ފަސް މިލިއަން ޑޮލަރު ދޭނެ ކަމަށް އިންޑިއާ ސަރުކާރުން ރާއްޖެއަށް އަންގާފައިވާކަން ލިޔެކިޔުންތަކުން ފެންނަން ހުރި ކަމަށް އިހުސާން ވިދާޅުވި އެވެ.
"ދެން އޭރުގައި 24 އޯގަސްޓު 2023 ގައި ފިނޭންސް މިނިސްޓަރީން ފުލުހުންނަށް އަންގާފައި އެބައިން، އެހެންވީމާ އެ ލާރިއަކީ، ކުރިން އެޑްވާންސަށް ދެވުނު ލާރިއަކީ މި ލިބުނު ހިލޭ އެހީގެ ދަށުން ލިބުނު އެހީގެ ގޮތުގައި ހަމަޖައްސާލާށޭ، އޭގެން ފުލުސް ސްޓޭޝަންތައް އެޅުމުގެ މަސައްކަތް ކުރިއަށް ގެންދާށޭ،" އިހުސާން ވިދާޅުވި އެވެ.
"އަޅުގަނޑު މިއުޅެނީ އަދިއަދަށް ދާންދެން ވެސް މިދެންނެވި ކުންފުނި ހުރިތަނެއް ވެސް ކުންފުންޏާ ވާހަކަދައްކަންޖެހޭ މީހެއް ވެސް އެ ކުންފުނި ފަރާތުން މިދެންނެވި ޕޮލިސް ސްޓޭޝަންތައް އަޅަން ކުރިއަށް ދާންޖެހޭ ގޮތް ވެސް އަދި ނުހޯދިގެން،"
އިހުސާން ވިދާޅުވީ އެ މަސައްކަތުގެ ތަފުސީލުތައް ބަލަން ޖެހުނީ ރައީސް ޑރ. މުހައްމަދު މުއިއްޒު މިހާރު އަތޮޅުތަކަށް ކުރައްވަމުން ގެންދަވާ ކެމްޕޭނު ދަތުރުތަކުގައި ބައްދަލުވާ ކައުންސިލުތަކުންނާއި ރައްޔިތުންގެ ފަރާތުން އެ ފުލުސް ސްޓޭޝަންތަކުގެ ޝަކުވާ އަންނާތީ ކަމަށެވެ.
"މިހެން އޮއްވައި 20 ޖެނުއަރީ 2024 ގައި، މީގެ އެއްމަސް ކުރިން އެބައޮތް އެ ކުންފުނިން އަންގާފައި، މިހާރު އެ ޖޮއިންޓު ވެންޗާ ކުންފުނި ވެސް ރޫޅިއްޖެޔޭ، މިކަމަށް ހެދި ޖޮއިންޓު ވެންޗާ ވެސް ރޫޅިއްޖެޔޭ، އެހެންވީމާ މިހާރު އަނެއްކާވެސް އިންދިރާ ޕްރޮޖެކްޓްސް ކިޔާ ކުންފުނި އެކަންޏޭ އޮތީ،" އިހުސާން ވިދާޅުވި އެވެ.
މައްސަލައެއްގެ ގޮތުގައި އެކަން ތަހުގީގު ކުރަމުންދާކަން މިއަދު އިއުލާނު ކުރި ނަމަވެސް ފުލުހުންގެ ފަރާތުން އެކަމާ ގުޅޭގޮތުން މިއަދުގެ ޕްރެސްގައި އިތުރު މައުލޫމާތެއް ނުދެ އެވެ. ފުލުހުން ބުނީ އެ މައްސަލައިގެ އިތުރު ތަފުސީލު އަންނަ އާދީއްތަ ދުވަހު މީޑިއާތަކާ ހިއްސާ ކުރާނެ ކަމަށެވެ.
