އިސްލާމިކް މިނިސްޓްރީގެ ތެރޭގައި ކޮރަޕްޝަން ނައްތައިލުމަށް އޭސީސީގެ ލަފާގެ މަތިން މަސައްކަތް ކުރުމަށް އެ ދެ އިދާރާގެ މެދުގައި ފަހުމުނާމާއެއްގައި ސޮއިކޮށްފި އެވެ.
މިއަދު ބޭއްވި ރަސްމިއްޔާތެއްގައި އިސްލާމިކް މިނިސްޓްރީގެ ފަރާތުން ފަހުމުނާމާގައި ސޮއިކުރެއްވީ މިނިސްޓަރު ޑރ. މުހައްމަދު ޝަހީމް އަލީ ސައީދެވެ. އަދި އޭސީސީގެ ފަރާތުން ސޮއިކުރެއްވީ އެ ކޮމިޝަނުގެ ރައީސް އާދަމް ޝާމިލެވެ.
މި ފަހުމުނާމާގެ ދަށުން ކުރާނެ މަސައްކަތްތަކުގެ ތެރޭގައި:
- ކޮރަޕްޝަން ވިޔަ ނުދިނުމަށްޓަކާ ދެ ފަރާތް ގުޅިގެން ކުރެވޭ މަސައްކަތްތައް ދެނެގަތުން
- ކޮރަޕްޝަން ނައްތާލުމުގެ މަގުސަދު ހާސިލުކުރުމަށް ކުރާނެ މަސައްކަތްތައް ކަނޑައެޅުން
- ކޮރަޕްޝަން ވިޔަ ނުދިނުމަށް އޭސީސީން ދޭ ލަފަޔާ އިރުޝާދު ތަންފީޒުކުރުމުގަ ދެ ފަރާތުން ގުޅިގެން ކުރާނެ މަސައްކަތްތައް ކަނޑައެޅުން
- ދެ އިދާރާއިން ކުރާ މަސައްކަތްތައް ފީޑްބެކް ޕްރޮސެސްއެއް ގާއިމުކޮށް، މީޑިއާއަށް މައުލޫމާތު ދިނުން
ފަހުމުނާމާގައި ސޮއި ކުރުމަށްފަހު ވާހަކަ ދައްކަވަމުން ޝަހީމް ވިދާޅުވީ އިސްލާމިކް މިނިސްޓްރީ ތެރޭގައި ކޮރަޕްޝަނަށް ޖާގަ ނުދެވޭނެ ކަމަށާއި، މިނިސްޓްރީގެ ހުރިހާ މަސައްކަތެއް ވެސް ކުރިއަށްދާނި އިންސާފުވެރިކަމާއި އެކީގައި ކަމަށެވެ.
"އޭގެ ތެރޭގަ ހައްޖާ ގުޅުން ހުރި ކަންތައްތަކާ އުމްރާއާ ގުޅޭ ކަންތައްތަކާ ޒަކާތާ އަދި އެކިއެކި ފަންޑުތަކާ ގުޅޭ ކަންތައްތައް، ރައްޔިތުން ހަވާލުކުރާ އަމާނާތެއްގެ ގޮތުގަ ވަރަށް ގިނަ ފައިސާ ބަލަހައްޓާ ތަނެއް[އިސްލާމިކް މިނިސްޓްރީ އަކީ]. އެހެންވީމަ އިތުބާރު ހިފޭ ގޮތުގެ މަތިން މިތާގެ ކަންކަން ބެލެހެއްޓުމަކީ މުހިއްމު ކަމެއް،" ޑރ. ޝަހީމް ފާހަގަކުރެއްވި އެވެ.
އޭގެ އިތުރުން އިސްލާމިކް މިނިސްޓްރީއަކީ ރައްޔިތުންނާއި ގުޅޭ ވަރަށް ގިނަ ކަންކަން ބަލަހައްޓާ މިނިސްޓްރީއެއް ކަމުން ކޮރަޕްޝަން ނައްތާލުމަށް މަސައްކަތް ކުރުން މުހިއްމުކަން ޝަހީމް ފާހަގަކުރެއްވި އެވެ.
