ރާއްޖޭގައި ތިބި އިންޑިއާ ސިފައިން ފައިބަން ސަރުކާރުން ވަކި ތާރީހެއް ދީފައި ވާއިރު އިންޑިއާ ބައިވެރިވާ އަސްކަރީ ތަމްރީނެއްގައި ދިވެހި ސިފައިން ބައިވެރިވާތީ ކުރީގެ ރައީސް އަބްދުﷲ ޔާމީނު ސުވާލު އުފައްދަވައިފި އެެވެ.
ޔާމީނު އުފައްދަވަން މަސައްކަތް ކުރައްވާ ޕާޓީ، ޕީޕަލްސް ނެޝަނަލް ފްރޮންޓް (ޕީއެންއެފް) ގެ އޮފީހުގައި ރޭ ބޭއްވި ބައްދަލުވުމެއްގައި، އެމަނިކުފާނު ވިދާޅުވީ އިންޑިއާ ސިފައިން ފައިބަން ސަރުކާރުން ވަކި ތާރީހެއް ދީފައި ވާއިރު، ރާއްޖޭން ސިފައިން ބޭލުމަކީ އިންޑިއާއިން ރުހުމުގައި ކުރާނެ ކަމެއް ނޫން ކަމަށެވެ. އެއީ އިންޑިއާގެ "އިންޓަރެސްޓްތަކެއް" ރާއްޖޭގައި އޮތީމާ ކަަމަށް ވެސް އެމަނިކުފާނު ވިދާޅުވި އެވެ.
"އެހެންވީމާ ގަދަބާރުން ނޫނީ ނުރުހުމުގައި، މުއްދަތު ދީގެން ބާލަން މުއްދަތު ދީފައި އޮތް ބަޔަކު ފައިބާނެ ކަމަށް ބުނާ އިރު ކިހިނެތްތޯއޭ އިންޑިއާ އިސްވެ އޮވެގެން ކުރިއަށް މިގެންދާ ދޯސްތީ ޕްރޮގްރާމެއްގައި ދިވެހިރާއްޖެ ބައިވެރިކުރާނީ؟" ޔާމީނުގެ ތާއީދާ އެކު މަޖިލީހަށް ވާދަކުރައްވާ، ކުރީގެ ޕޮލިސް ކަމިޝަނަރު ހުސައިން ވަހީދުއާ ޔާމީނު ސުވާލުކުރެއްވި އެެެވެ.
ކުރީގެ ރައީސް އަބްދުﷲ ޔާމީނު، ޖަލްސާއެއްގައި ވާހަކަދައްކަވަނީ. ފޮޓޯ:އަބްދުﷲ އިޔާން/އަދަދު
އެ ސުވާލަށް ޖަވާބުދެއްވަމުން ހުސައިން ވަހީދު ވިދާޅުވީ "ދޯސްތީ އެކްސަސައިޒް" އަކީ ދިވެހި ސިފައިންނާއި އިންޑިއާ ސިފައިން ޒަމާނުއްސުރެ ކުރިއަށް ގެންދާ ހަރަކާތެއް ކަަމަށެވެ.
"އެއީ ދޯސްތުންގެ ގޮތުގައި [އެކުވެރިންގެ ގޮތުގައި] ތިބި އިރު،" އެހިސާބުން ޔާމީނު ވިދާޅުވި އެވެ.
ހުސައިން ވަހީދު ވިދާޅުވީ އެ އެކްސަސައިޒް ގައި ރާއްޖޭން ބައިވެރިވަނީ މިހާރު ވެސް "ދޯސްތުން"ގެ ގޮތުގައި ތިބީމާ ކަމަށެވެ. އެ އެކްސަސައިޒް ގޯސްކަަމަށް ދެކެވަޑައިނުގަންނަވާ ކަމަށް ވެސް އޭނާ ވިދާޅުވި އެވެ.
"އަޅުގަނޑު ވެސް ހަމަ، ރައްޔިތުންނަށް އަޅުގަނޑުގެ މި ވާހަކައިގެ މަތުލަބު އޮޅިދާނެއާ އެކީގައި [ދަންނަވާނީ]، މި އެކްސަސައިޒަކީ އެއްވެސް ޝައްކެެއް ނެތް ގޮތުގައި ދިވެހި ސިފައިންނަށް މުހިއްމު އެކްސަސައިޒެއް، މި އެކްސަސައިޒްގެ މެރިޓާ ދޭތެރޭ އަޅުގަނޑު ސުވާލެއް ނޫފައްދަން، އެއެއްނޫން އަޅުގަނޑުގެ ސުވާލަކީ، މިތަނުގައި އުޅޭ އިންޑިއާ ސިފައިން ތިބީމާ އެކަން ކަމުނުގޮސްގެން، މިސަރުކާރުން މުއްދަތުތަކެއް ދީ، ފައިބަން އަންގައި މިހުރިހާ ކަމެއް ކޮށްފައި އަދި ރައްޔިތުންނަށް އެކަން ކަށަވަރުކޮށްދޭން ރައީސުލް ޖުމްހޫރިއްޔާ [އެ]ވާހަ އިއުލާނުކުރަމުން ގެންދަވާ އިރު އިންޑިއާ ބޭނުންވާނެހޭ އެވަރުގެ ދޯސްތީ ޕްރޮގްރާމެއް މިތާ ހިންގަން،" ޔާމީނު ވިދާޅުވި އެވެ.
އަންނަ މެއި މަހުގެ 10 ގެ ކުރިން އިންޑިއާގެ ސިފައިން ރާއްޖެއިން ބޭލުމަށްފަހު ޑޯނިއާ އާއި ދެ ހެލިކޮޕްޓަރު އޮޕަރޭޓު ކުރަން "ޓެކްނިކަލް" މީހުން ގެންނަން ދިވެހި ސަރުކާރާއެކު އިންޑިއާއިން އެއްބަސްވެފައިވާ ކަމަށް ސަރުކާރުން އޮތީ ކުރިން ބުނެފަ އެވެ.
ދިވެހި ހާރިޖިއްޔާއިން ނެރުނު ބަޔާނެއްގައި ބުނެފައިވަނީ ދެ ގައުމުގެ ކޯ ގްރޫޕްގެ ބައްދަލުވުމުގައި އިންޑިއާ ސިފައިންގެ ފުރަތަމަ ބެޗު މާޗް 10، ގެ ކުރިން ފޮނުވާލަން އެއްބަސްވެފައިވާ ކަމަށް ވެސް ބުންޏެވެ.
ދޯސްތީގައި ރާއްޖެ، އިންޑިއާ އަދި ލަންކާގެ ކޯސްޓް ގާޑުންގެ އިތުރުން، ބަންގްލަދޭޝްގެ އޮބްޒާވަރުން ވެސް ބައިވެރިވާނެ ކަމަށް އެމްއެންޑީއެފުން މައުލޫމާތުދެ އެވެ.
ދޯސްތީ އެކްސަސައިޒް އަކީ އިންޑިއާ ކަނޑުގެ ސަލާމަތާއި ރައްކާތެރިކަމަށް ތިން ގައުމު ގުޅިގެން ކުރިއަށް ގެންދާ ކަނޑުމަތީ އަސްކަރީ ތަމްރީނުު ޕޮރޮގްރާމެކެވެ. މީގެ 33 އަހަރު ކުރިން، 1991 ގައި ފެށި މި ޕްރޮގްރާމް ކުރިއަށް ގެންދަނީ ކޮންމެ ދެ އަހަރަކުން އެއް އަހަރެވެ.
