ވިހި ވަނަ ރައްޔިތުންގެ މަޖިލީހަށް މެމްބަރުން ހޮވަން ބާއްވާ އިންތިހާބު ރޯދައިގެ ފަހަށް ބަދަލުކުރުމަށް ޓަކައި އިންތިހާބުުތަކާ ބެހޭ އާއްމު ގާނޫނަށް ބަދަލު ގެންނަން ފާސްކުރި ބިލު ރައީސް ޑރ. މުހައްމަދު މުއިއްޒު އަދިވެސް ތަސްދީގުނުކުރައްވާތީ އެ ބިލު އަވަހަށް ތަސްދީގުކުރަން ގޮވާލައި ރައްޔިތުންގެ މަޖިލީހަށް މިއަދު ކުއްލި މައްސަލައެއް ހުށަހަޅައިފި އެެވެ.
ރައްޔިތުންގެ މަޖިލީހުގެ އުނގޫފާރު ދާއިރާގެ ދަ ޑިމޮކްރެޓްސް މެމްބަރު މުހައްމަދު ވަހީދު ހުށަހެޅުއްވި ކުއްލި މައްސަލަ މަޖިލީހަށް ބަލައިގަންނަން ފާސްކުރީ މަޖިލީހުގެ މިއަދުގެ ޖަލްސާގަ އެވެ. ކުއްލި މައްސަލާގައި ވަހީދު ވިދާޅުވީ އިންތިހާބުތަކާ ބެހޭ އާއްމު ގާނޫނަށް ފަސް ވަނަ އިސްލާހު ގެނައުމުގެ ބިލު މަޖިލީހުން ފާސްކޮށް ތަސްދީގުކުރަން ރައީސް ޑރ.މުހައްމަދު މުއިއްޒަށް ފޮނުވިތާ ހަފުތާއެއް ވެފައި ވާއިރު އެ ބިލާ މެދު ގޮތެއް ނުނިންމަވައި ވަގުތު ބޭކާރު ކުރައްވަމުން ގެންދަވާ ކަމަށެެވެ.
ކުއްލި މައްސަލާގައި ވަހީދު ވިދާޅުވި ގޮތުގައި ރައީސް އެގޮތަށް ކަންތައް ކުރައްވަނީ ކުރިން ޝެޑިއުލްކޮށްފައިވާ ގޮތަށް މާޗް 17، ގައި އިންތިހާބު ބާއްވަން ސަރުކާރުން ބޭނުންވާތީ ކަމަށް ބެލެެވެ އެވެ.
މަޖިލީހުގެ އިންތިހާބު ރޯދަމަހާ ދިމާވާތީ އިންތިހާބުތަކާ ބެހޭ އާއްމު ގާނޫނަށް ގެންނަން ފާސްކުރި ބަދަލުގައިވާ ގޮތުން އެއްވެސް އިންތިހާބެއް ރޯދަމާ ދިމާ ވެއްޖެ ނަަމަ އެ އިންތިހާބެއް ބާއްވަން ޖެހޭނީ ރޯދައިގެ 10 ދުވަސް ފަހުންނެވެ. އެ އީ ރައްޔިތުންނަށް ފަސޭހަ ކުރުމަށް ޓަކައި ހުރިހާ ޕާޓީތައް އެއްބަސް ކިޔައިގެން ފާސްކުރި ބިލެއް ކަމަށް ވަހީދު ވިދާޅުވި އެވެ.
"...ބިލު ތަސްދީގުނުކުރައްވައި ހިފަހައްޓައިގެން ހުންނެވުމުންނާއި ރައްޔިތުންގެ މަޖިލީހުގެ އިންތިހާބު އޮންނާނެ ރަސްމީ ތާރީހާ މެދު އޮޅުންބޮޅުން އަރާ ފަދަ ހާލަތެއްގައި ރައްޔިތުން ތިބޭން ޖެހުމަކީ ނުހަނު ކަންބޮޑުވާ ކަމެއް،" ކުއްލި މައްސަލާގައި ވަހީދު ވިދާޅުވި އެވެ.
ކުއްލި މައްސަލާގައި ރައީސް މުއިއްޒަށް ވަހީދު ގޮވައިލެއްވީ އެ ބިލު އަވަހަށް ތަސްދީގުކުރެއްވުމަށެވެ.
އެ މައްސަލަ މަޖިލީހަށް ބަލައިގަންނަން ފާސްކުރީ އެކަމަށް ނެގި ވޯޓުގައި ބައިވެރިވެވަޑައިގެންނެވި 24 މެމްބަރުންގެ ތެރެއިން 23 މެމްބަރަކު ވޯޓުދެއްވައިގެންނެވެ.
ކުއްލި މައްސަލަ ބަލައިގަނެ، ބަހުސްގެ ފުރަތަމަ ފުރުސަތުގައި ވަހީދު ވިދާޅުވީ އިންތިހާބުތަކާ ބެހޭ އާއްމު ގާނޫނަށް މަޖިލީހުން ބަދަލުގެނައުމަކީ ހަމަ އެކަނި ދަ ޑިމޮކްރެޓްސްއާއި އެމްޑީޕީން ނޫން ކަމަށެވެ. އެ ބިލު ފާސްކުރީ ރޯދަމަހުގެ ފަހަށް އިންތިހާބު ފަސްކުރަން ޕީއެންސީއާއި ޕީޕީއެމުން ވެސް ތާއީދުކުރި ކަމަށެވެ.
އިންތިހާބުތަކަށް ރައްޔިތުންގެ ތަރުހީބުކުޑަވަމުން އަންނަ ކަން މާލޭގެ މޭޔަރު ހޮވަން ބޭއްވި ބައިއިލެކްޝަންގައި ފެނިފައިވާ ކަމަށާއި ގިނަ ރައްޔިތުންނަށް ވޯޓުލެވޭނެ ގޮތަކަށް އިންތިހާބު ބޭއްވުން މުހިއްމު ކަމަށް ވެސް އޭނާ ވިދާޅުވި އެވެ.
"ރަމަޞާން މަހު މިހާ ބޮޑު އިންތިހާބެއް ބާއްވައިފި ނަމަ،މ އިއްޒަތްތެރި ރައީސް، މިއީ ސުވާލެއް ވެސް އޮތް ކަމެއް ނޫން، ރާއްޖޭގެ ރައްޔިތުންނަށް އިންތިހާއަށް ބޮޑު ތަކުލީފަކަށް ވެ، ކެމްޕެއިންކުރާ އެކި އެކި ފަރާތްތަކަށް ، ކެންޑިޑޭޓުންނަށް އެކިއެކި ދަތިތައް ހުންނާނެތީވެ މި މަޖިލީހުން ، އަޅުގަނޑުމެން ހުރިހާ ފަރާތްތަކާ ވާހަކަދައްކައިގެން، ހުރިހާ ޕާޓީތަކާ ވާހަކަދައްކައިގެން، އެ ބޭފުޅުންގެ ބަސް ހޯދައިގެން އަދި ރައީސުލް ޖުމްހޫރިއްޔާ ވެސް އެ ވިދާޅުވާ ފަދައިން ރޯދަމަހު އަޅުކަމަށް ގިނަ ރައްޔިތުންނަށް ވަގުތު ތަނަވަސްވާނޭހެން ހެދުމުގެ ބޭނުމުގައި ރޯދަމަހުގެ ފަހަށް އިންތިހާބު ބޭއްވުމަށް ޓަކައި އަޅގަނޑުމެން ނިންމީ،" ވަހީދު ވިދާޅުވި އެެވެ.
އޭނާ ތުހުމަތުކުރެއްވި ގޮތުގަައި އިންތިހާބު އަވަސްކުރަން ސަރުކާރުން ބޭނުން ވަނީ ދުވަހެއް ދުވަހަކަށް ރައްޔިތުންގެ ތާއީދު ކުޑަވަމުން ދާތީ އެެވެ.
