ހުވަދުއަތޮޅާއި އައްޑޫގައި މުޒާހަރާކުރަމުން ގެންދާ މަސްވެރިން، އެކަން ހުއްޓައިލުމަށްފަހު އެނބުރި މަސައްކަތަށް ދާން ފިޝަރީޒް މިނިސްޓަރު އަހުމަދު ޝިޔާމް މިއަދު ގޮވާލައްވައިފި އެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ވަޒީރުންނާ ސުވާލުކުރުމުގެ ވަގުތުގައި މެމްބަރަކު ކުރެއްވި ސުވާލަކަށް ޖަވާބުދެއްވަމުން މިނިސްޓަރު ވިދާޅުވީ މަސްވެރިންނަށް މިފްކޯއިން ނުދީ އޮތް ފައިސާ ދޭނެ އިންތިޒާމްގެ ތަފްސީލު މަސްވެރިންނާ މިހާރު އޮންނާނީ ހިއްސާކޮށްފައި ކަމަށެވެ.
"އާދެ، [މަސްވެރިން] މުޒާހަރާގައި އެބަތިބި، ކޫއްޑޫގައި ވެސް އެބަ ތިބި، އައްޑޫ ސިޓީގައި ވެސް މުޒާހަރާގައި މަސްވެރިން ތިބީ. އަޅުގަނޑުމެން މި އެދެނީ އެންމެ ދުވަހެއްގެ އާމްދަނީ ވެސް މަދުނުކޮށް، މުޒާހަރާ ހުއްޓާލާފައި މަސްވެރިން ހަމަ އާމްދަނީ ހޯދުމަށް ޓަކައި މަހަށް ވަޑައިގަންނަވާށޭ،" ޝިޔާމް ވިދާޅުވި އެވެ.
ފެބްރުއަރީ 26، ގެ ކުރިން 100 މިލިޔަން ރުފިޔާ ދީފައި އަނެއް ބައި މާޗް 5، ގެ ކުރިން ދީ ނިންމާނެ ކަމަށް ވެސް އޭނާ ވިދާޅުވި އެވެ.
މަޖިލީހުގެ މިއަދުގެ ޖަލްސާގައި ޝިޔާމް ވިދާޅުވި ގޮތުގައި މިސަރުކާރު އައި އިރު މިފްކޯއިން މަސްވެރިންނަށް ދޫނުކޮށް އޮތް 280 މިލިޔަން ރުފިޔާއާ އެކު ޖުމްލަ 310 މިލިޔަން ރުފިޔާ މަސްވެރިންނަށް ދޭން އެބަ އޮތެވެ. އެ ފައިސާ ނުދޭތީ ނުރުހުން ފާޅުކޮށް މިފްކޯގެ ކޫއްޑޫ މަސްފެކްޓްރީ ގައި މަސްވެރިން މުޒާހަރާކުރަން ފެށީ މިދިޔަ އާދީއްތަ ދުވަހު އެވެ.
މަސްވެރިން މުޒާހަރާ ކުރާތާ މިއަދަށް ތިން ދުވަސް ހަމަވާނެ އެވެ. އެ މުޒާހަރާގައި ގާތްގަނޑަކަށް 40 މަސްދޯނީގެ މަސްވެރިން ބައިވެރިވެ އެވެ. މަސްވެރިންނާ ވާހަކަ ދެއްކެވުމަށް ޝިޔާމް އާދީއްތަ ދުވަހު ކޫއްޑޫއަށް ވެސް ވަޑައިގަތެވެ. ނަމަވެސް މަސްވެރިންނާއެކު އެއްބަސްވުމަކަށް އާދެވިފައެއްނުވެ އެވެ.
