މިދިޔަ އަހަރުގެ ފަހު ކުއާޓަރުގައި މުޅި ރާއްޖެއިން ރިޕޯޓްކުރި ކުށުގެ 78 އިންސައްތައަކީ މާލެ ސަރަހައްދުގައި ހިންގާފައިވާ ކުށްތައް ކަމަށް މޯލްޑިވްސް ޕޮލިސް ސާވިސަސްގެ ތަފާސް ހިސާބުތަކުން ދައްކައިފި އެވެ.
ފުލުހުން މިއަދު އާންމު ކުރި މިދިޔަ އަހަރުގެ ހަތަރުވަނަ ކުއާޓަރުގެ ރިޕޯޓުގައި ވާގޮތުން މުޅި ރާއްޖެއިން އެ މުއައްސަސާއަށް ރިޕޯޓްކުރި ކުށުގެ ޖުމުލަ އަދަދަކީ 8907 އެކެވެ. އެއީ ތަހުގީގު ކުރަމުންދާ މައްސަލަތަކާއި ނިންމި މައްސަލަތަކުގެ އިތުރުން ދައުވާ ކުރަން ޕީޖީ އޮފީހަށް ފޮނުވި މައްސަލަތަކުގެ ޖުމުލަ އެވެ. އޭގެތެރެއިން 6965 މައްސަލައަކީ ހަމައެކަނި މާލެ ސަރަހައްދުގައި ހިނގާފައިވާ ކުށްތަކާ ގުޅޭ މައްސަލަތަކެވެ.
ފުލުހުންގެ ތަފާސް ހިސާބުތަކުން ދައްކާގޮތުގައި މާލެ ސަރަހައްދުން ތަހުގީގު ކުރި އަދި ކުރަމުންދާ ޖުމުލަ މައްސަލަތަކުގެ އަދަދަކީ 3337 އެކެވެ. ދެވަނައަށް އެންމެ ގިނަ މައްސަލަތައް ފުލުހުން ތަހުގީގު ކޮށްފައި ވަނީ އައްޑޫއިންނެވެ. އެއީ 183 އެކެވެ. އެ ދެ ސިޓީ ނުހިމަނައި މުޅި ރާއްޖެއިން އެ މުއައްސަސާއިން ތަހުގީގު ކޮށްފައި ވަނީ 805 މައްސަލަ އެވެ.
ފުލުހުންގެ ރިޕޯޓުގައި ވާގޮތުން ތަހުގީގު ނިންމައި ފައިލް ކުރި މައްސަލަތައް ވެސް އެންމެ ގިނައީ މާލެ ސަރަހައްދުގަ އެވެ. މުޅި ރާއްޖެއިން ތަހުގީގުކޮށް ނިންމައި ފައިލް ކުރި މައްސަލަތަކުގެ ޖުމުލަ އަދަދު 828 އަށް އަރާއިރު، މާލެ ސަރަހައްދުން އެކަނި ތަހުގީގު ނިންމައި ފައިލް ކުރި މައްސަލަތަކުގެ އަދަދު ހުރީ 3478 ގަ އެވެ.
ތަހުގީގީ މަރުހަލާ ނިންމައި ދައުވާ ކުރަން ޕީޖީ އޮފީހަށް ފޮނުވި މައްސަލަތަކުގެ އަދަދަށް ބަލާއިރު ވެސް މުޅި ރާއްޖެއަށްވުރެ މާލެ ސަރަހައްދުގެ މައްސަލަތަކުގެ އަދަދު ހުރީ މަތީގަ އެވެ. މުޅި ރާއްޖެއިން ތަހުގީގީ މަރުހަލާ ނިންމައި ދައުވާ ކުރަން ފޮނުވި މައްސަލަތަކުގެ އަދަދު 126 ގައި ހުރިއިރު، މާލެއިން ތަހުގީގީ މަރުހަލާ ނިންމައި ދައުވާ ކުރަން ފޮނުވި މައްސަލަތަކުގެ އަދަދު ހުރީ 150 ގަ އެވެ.
މުޅި ރާއްޖެއިން ރިކޯޑު ކުރެވުނު ކުށުގެ އަދަދަށްވުރެ ހުރިހާ ދާއިރާއަކުން ވެސް މާލެ ސަރަހައްދުގައި މައްސަލަތައް ގިނައިރު، ރާއްޖޭގެ އާބާދީގެ 41 އިންސައްތަ އުޅެނީ މާލޭގަ އެވެ. 2022 ވަނަ އަހަރު ކުރިއަށް ގެންދިޔަ ސެންސަސް ބޯހިޔާވަހިކަމުގެ ދިރާސާއިން ދައްކާ ގޮތުގައި މާލޭގައި 212،138 މީހުން ދިރިއުޅެ އެވެ.
މާލޭގައި ކުށްކުރާ އަދަދު އިތުރުވަމުންދާ ދިއުމުގެ ފުރަގަހުގައި އޮތީ ހައްލު ނުކުރެވި އޮތް އިޖުތިމާއީ އެތައް މައްސަލަތަކެއް ކަމަށް ކަމާ ގުޅޭ މާހިރުން ވިދާޅުވެ އެވެ.
ރާއްޖޭގެ އެހެން ސަރަހައްދުތައް ތަރައްގީ ކުރުމުގެ ބަދަލުގައި ހަމައެކަނި މާލެ ސަރަހައްދަށް ތަރައްގީ ގެނެސް، މާލެއަށް ހިޖުރަ ކުރަން ރާއްޖޭގެ ބޮޑު އާބާދީއަކަށް މަޖުބޫރު ކުރުވުމާއި މާލޭގެ ބޯހިޔާވަހިކަމަށް ހައްލެއް ހޯދައި ނުދީ މާލެ ތޮއްޖެއްސުމަކީ މާލޭގައި ކުށްތައް އިތުރުވެ އިޖުތިމާއީ މައްސަލަތައް އިންތިހާއަށް އިތުރުވުމުގެ ފަހަތުގައި އޮތް ސަބަބުތައް ކަމަށް މާލޭގައި ދިރިއުޅޭ ރައްޔިތުން އަބަދުވެސް ބުނެ އެވެ.
8907
6965
