މިއަހަރުގެ ތެރޭގައި މަހުގެ އަގު ކިލޯއަކަށް 25ރ. ގެ ރޭޓުން ބަހައްޓައި މަސް ގަންނަ ކަމަށްވާނަމަ މިފްކޯއަށް 1.1 ބިލިއަން ރުފިޔާ ސަބްސިޑީގެ ގޮތުގައި ސަރުކާރުން ފޯރުކޮށްދޭން ޖެހޭނެ ކަމަށް ބެލެވޭ ކަމަށް ފިޝަރީޒް މިނިސްޓަރު އަހްމަދު ޝިޔާމް ވިދާޅުވެއްޖެ އެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ދާންދޫ ދާއިރާގެ މެމްބަރު އަހްމަދު ޔައުގޫބް ވަނީ މަހުގެ އަގު ކުޑަކުރުމާ ގުޅޭގޮތުން ޝިޔާމާ ސުވާލުކުރައްވާފަ އެވެ. އެ ސުވާލަކީ މިދިޔަ ނޮވެމްބަރު މަހުގެ ތެރޭގައި ފޮނުވި ސުވާލެކެވެ. އޭރު މަހުގެ އަގު ކުޑަ ނުކުރެ އެވެ.
"17 ރުފިޔާއަށް ގަންނަމުން އައި މަސް 25 ރުފިޔާއަށް ބަދަލުކުރި ކުރުން ވެގެންދިޔައީ ގާތްގަނޑަކަށް މިފްކޯގެ ހިންގުމުގެ ހަރަދު ނުލާ ވެސް އެއީ 2.60ރ. ގެ ގެއްލުމަކަށް. މިފްކޯގެ ހަރަދު 35 އިންސައްތަ ބެލިޔަސް މި ދައްކަނީ 11 ރުފިޔާގެ ގެއްލުމުގެ ވާހަކަ. އެއީ ދައުލަތުގެ އާމްދަނީ މިވަގުތު ހުރި ގޮތުން ދައުލަތަށް ވަރަށް ބޮޑު ބުރައެއް," ނައިފަރު ދާއިރާގެ މެމްބަރުކަން ވެސް ކުރެއްވި ޝިޔާމް ވިދާޅުވި އެވެ.
ސެޕްޓެމްބަރު 16, 2023 ގައި ރިޔާސީ އިންތިހާބުގެ ދެބުރު ދޭތެރެއިން މަހުގެ 25ރ. އަށް ބޮޑުކުރި އެވެ. ނަމަވެސް, މި ސަރުކާރުން ވަނީ މިއަދުން ފެށިގެން އަނެއްކާ ވެސް މަހުގެ އަގު 20ރ. އަށް ކުޑަކޮށްފަ އެވެ.
"ފުރަތަމަ ބުރުގެ ވޯޓާއި ދެވަނަ ބުރުގެ ވޯޓާ ދޭތެރޭ އޭރުގެ ސަރުކާރުން ގެނައި ބަދަލަކީ ސީދާ ސިޔާސީ ބޭނުމެއްގައި އެއްވެސް ވަރެއްގެ ދިރާސާއެއް [ނުކޮށް], ހެޔޮ ނިޔަތެއް އޮވެގެން ކުރި ކަމެއް ކަމަށް އޭރު ވެސް އަދި މިހާރު ވެސް ނުދެކެން," ޔައުގޫބް ކުރެއްވި ސުވާލަށް ޖަވާބު ދެއްވަމުން ޝިޔާމް ވިދާޅުވި އެވެ.
މިދިޔަ އަހަރުގެ ބަޖެޓު ކުރީ ސަބްސިޑީއަށް 250 މިލިއަން ރުފިޔާ ކަމަށާއި އަގު ބޮޑުކުރުމުން 500 މިލިއަން ރުފިޔާއަށް އެ އަދަދު އިތުރުވި ކަމަށް ޝިޔާމް ވިދާޅުވި އެވެ.
"މިހާރު ލިބޭ އާމްދަނީއާއެކު 1.1 ބިލިއަން ރުފިޔާ ސަބްސިޑީގެ ގޮތުގައި ދިނުމަކީ ސަރުކާރަށް ކެރި ކުޅަދާނަ ކަމަކަށް އަޅުގަނޑުމެން ގަބޫލެއް ނުކުރަން. މަސްވެރިންގެ ފަރާތުން އިވޭ ވާހަކައަކީ މަސްވެރިންނަށް ބަރާބަރާށް ފައިސާ ދެވޭނެ އަގެއްގައި ދައުލަތަށް ވެސް ރާއްޖޭގެ އެހެން ރައްޔިތުންނަށް ވެސް މިއީ ބުރައަކަށް އުނދަގުލަކަށް ނުވާނެ ގޮތަށް އަގު ހިފެހެއްޓުން," ސަރުކާރުގެ މާލީ ހާލަތާ ގުޅޭގޮތުން ޝިޔާމް ވިދާޅުވި އެވެ.
ނޮވެމްބަރު 16، ގެ ނިޔަލަށް (ކުރީ ސަރުކާރުގެ ދައުރު ހަމަވުމާ ހަމައަށް) މަސްވެރިންނަށް ދަރާފައިވާ އަދަދަކީ 195 މިލިއަން ރުފިޔާ އެވެ. މި ސަރުކާރުން ވެރިކަމާ ހަވާލުވެ މީގެ ބައެއް ބިލުތަކަށް ފައިސާ ދައްކައި ހަލާސްކޮށްފައިވެ އެވެ.
ނަމަވެސް، ބެކްލޮގުގައި ހުރި ބިލުތަކަށް ފައިސާ ދައްކަމުން ދިޔުމާ ގުޅިގެން ކިރަމުން އަންނަ މަހަށް ބަރާބަރަށް ފައިސާ ދެވޭނެ ގޮތެއް ނެތް ކަމަށް ފިޝަރީޒް މިނިސްޓަރު ޝިޔާމު ވިދާޅުވެފައިވާ ވާހަކަތަކުން ދޭހަވެ އެވެ. މިކަން ހައްލުކުރަން ސަރުކާރުން ވިސްނަނީ ސޮވަރިން ގެރެންޓީ ދީފައި ލޯނެއް ނަގައިގެން ވިޔަސް މަސްވެރިންނަށް ދޭން ޖެހޭ ފައިސާ ދިނުމެވެ.
