ޕާކިސްތާނުގެ އާންމު އިންތިހާބު ބޯމަތިވެފައި ވަނިކޮށް އެ ގައުމުގެ ކުރީގެ ބޮޑު ވަޒީރު އިމްރާން ޚާން އާއި އެމަނިކުފާނުގެ އަނބިކަނބަލުން ބުޝްރާ ބީބީގެ މައްޗަށް 14 އަހަރުގެ ޖަލު ހުކުމެއް އިއްޔެ އިއްވައިފި އެވެ.
މިއީ ފާއިތުވެ ދިޔަ ދެ ދުވަހުގެ ތެރޭގައި އިމްރާން ހާންގެ މައްޗަށް އިއްވި ދެ ވަނަ ޖަލު ހުކުމެވެ. އަންގާރަ ދުވަހު ޕާކިސްތާނުގެ އަސްކަރީ ކޯޓުން ވަނީ، އިމްރާން ޚާން ދައުލަތުގެ ސިއްރުތަކެއް ލީކު ކުރިކަން ސާބިތުވާ ކަމަށް ކަނޑައަޅައި އެމަނިކުފާނުގެ މައްޗަށް 10 އަހަރުގެ ޖަލު ހުކުމެއް އިއްވައިފަ އެވެ.
ޕާކިސްތާނުގެ ސިޓީއެއް ކަމަށްވާ ރާވަލްޕިންޑީގެ އެކައުންޓަބިލިޓީ ކޯޓުން އިއްޔެ އިމްރާން ޚާންގެ މައްޗަށް 14 އަހަރުގެ ޖަލު ހުކުމެއް އިއްވާފައި މިވަނީ އެމަނިކުފާނުގެ ބޮޑުވަޒީރުކަމުގެ ދުވަސްވަރު ދައުލަތަށް ލިބިފައިވާ ބައެއް ހަދިޔާ ވިއްކި ބުނެ ހުށަހެޅި މައްސަލައިގަ އެވެ.
އަނބިކަނބަލުން ބުޝްރާ ބީބީއަށް 14 އަހަރުގެ ޖަލު ހުކުމެއް އިއްވީ އެކަމުގައި ބައިވެރިވިކަން ސާބިތުވާ ކަމަށް ކަނޑައަޅައިފަ އެވެ.
އޮގަސްޓް 2018 އިން ފެށިގެން އޭޕްރީލް 2022 އާ ހަމައަށް ޕާކިސްތާނުގެ ބޮޑުވަޒީރަކަށް ހުންނެވި އިމްރާން ހާންގެ މައްޗަށް އެކި ތުހުމަތުތައްކޮށް ޖަލަށް ލުމަށް ހުކުމްތަކެއް ކުރަމުން އަންނަނީ ޕާކިސްތާނުގެ އާންމު އިންތިހާބުގައި ވާދަކުރެވޭނެ ދޮރުތައް ބަންދު ކުރުމަށް ކަމަށް އެމަނިކުފާނު ތުހުމަތު ކުރައްވަ އެވެ.
ދެ ހުކުމްވެސް ޕާކިސްތާނުގެ ހައި ކޯޓުގައި އިސްތިއުނާފު ކުރުމަށް އިމްރާން ޚާންގެ ގާނޫނީ ވަކީލުން ވަނީ ނިންމައިފަ އެވެ.
ކޮރަޕްޝަންގެ ދައުވާއެއް ސާބިތުވެ ތިން އަހަރަށް ޖަލަށްލުމާ ގުޅިގެން މިދިޔަ އަހަރުގެ އޮގަސްޓު މަހުން ފެށިގެން އިމްރާން ޚާން ހުންނެވީ ޖަލުގަ އެވެ. އަދި އިތުރު ޖަލު ހުކުމްތަކާއެކު އެމަނިކުފާނަށް ޖަލުގައި އޮންނަވަން ޖެހޭ މުއްދަތު 27 އަހަރަށް މިހާރު ވަނީ އިތުރުވެގެން ގޮސްފަ އެވެ.
