ރާއްޖޭގެ ހާއްސަ އިގުތިސޯދީ ސަރަހައްދުގެ ތެރޭގައި ބޮޑުކަންނެލި މަސްވެރިކަން ކުރަން އުޅުނު ހދ. މަހިބަދޫ އަސުރުމާ-3 ދޯންޏަަށް އިންޑިއާ ސިފައިން އަރައި ފަޅުވެރިންނާ ސުވާލުކުރި ރާއްޖޭގެ ކަނޑުގެ ސަރަހައްދުގައި އޮއްވާ ކަމަށް ފިޝަރީޒް މިނިސްޓަރު އަހުމަދު ޝިޔާމް ވިދާޅުވެއްޖެ އެވެ.
ދޯނީގައި ހުރި އޮޑިވެރިއަކު "އަދަދު" އަށް މައުލޫމާތު ދިން ގޮތުގައި ހދ. ކުޅުދުއްފުށީ ބޭރުން ކަންނެލި މަސްވެރިކަމަށް ނިކުމެ އުޅުނިކޮށް، އިންޑިއާ ސިފައިންގެ މަނަވަރަކުން ދޯންޏަށް އަރައި ސުވާލުކުރަމުން އަންނަ ކަމަށެވެ. އަދި ދޯނި ފާސްކުރުމުގައި އިންޑިއާގެ ދެ މަނަވަރު ހަރަކާތްތެރިވާކަމަށް އޭނާ މައުލޫމާތު ދިނެވެ.
މިކަމާ ގުޅިގެން ޝިޔާމް އެކްސްގައި ކުރެއްވި ޕޯސްޓެއްގައި ވިދާޅުވީ އަަސުރުމާ ދޯންޏަށް އިންޑިއާ ސިފައިން އެެރީ ހއ. ތުރާކުނުގެ އިރުމަތިން 72 މޭލު ބޭރުގައި ބޮޑުކަންނެލީގެ މަސްވެރިކަން ކުރުމުގައި ހަރަކާތްތެރިވަމުން ދަނިކޮށް ކަމަށެވެ.
ދޯނި އޭރު އޮތް ތަނުގެ ޖީޕީއެސް ޕޮޒިޝަން ދައްކުވައިދޭ ފޮޓޮއަކާ އެކީ ކުރެއްވީ ޕޯސްޓުގައި އޭނާ ވިދާޅުވީ އެ އުޅަނދު ހަރަކާތްތެރިވަމުން ދިޔައީ ރާއްޖޭގެ ކަނޑުގެ ސަރަހައްދުގައިކަން މިނިސްޓްރީގެ ވެސަލް މޮނީޓަރިން ސިސްޓަމްއިން ކަށަވަރުވާ ކަމަށެވެ. މިނިސްޓަރު އިތުރަށް ވިދާޅުވީ މި ހާދިސާއާ ގުޅިގެން ކޯސްޑްގާޑާއި އުޅަނދުގެ ވެރިފަރާތާއެކު ގާތުން މަސައްކަތް ކުރަމުންދާ ކަމަށެވެ.
އެމްއެންޑީއެފްއިން މި މައްސަލައިގައި އެންމެ ފަހުން ދިން މައުލޫމާތަކީ އެ ސަރަހައްދަށް ކޯސްޓު ގާޑުގެ އުޅަނދެއް ދަތުރުކުރަމުންދާ ކަމަށެވެ. އަދި އެ ސަރަހައްދަށް ދެވުނު ކަމެއް އަސްކަރިއްޔާއިން ކަށަވަރުނުކޮށްދެ އެވެ.
