ރައްޔިތުންގެ މަޖިލީހުގައި މިދިޔަ އާދީއްތަ ދުވަހު ބޭއްވި ޖަލްސާގައި މެމްބަރުންގެ މެދުގައި ހިނގި ހަމަނުޖެހުންތަކުގެ މައްސަލަ ފުލުުހުން ބަލަން ފަށައިފި އެވެ.
އިސްކަންދަރު ކޮށީގައި މިއަދު ބޭއްވި ނޫސްވެރިންގެ ބައްދަލުވުމެއްގައި އެކްޓިން ހެޑް އޮފް ކްރައިމް އިންވެސްޓިގޭޝަން ކޮމާންޑް، ޗީފް ސުޕްރިންޓެންޑެންޓް އަހުމަދު ނާފިޒު ވިދާޅުވީ އާދީއްތަދުވަހު މަޖިލީހުގެ އިދާރާގެ ތެރޭގައި ހިނގި ކަންތައްތަކުގެ ތެރެއިން މެމްބަރުންނަށް އަނިޔާވި މައްސަލަ މަޖިލީހުގެ އިދާރާއިން ފުލުހުންނަަށް ހުށަހަޅާފައިވާ ކަމަށެވެ. އެދުވަހު އަނިޔާވި މެމްބަރުން ވެސް އެ މައްސަލަ ފުލުހުންނަށް ހުށަހަޅާފައިވާ ކަމަށް އޭނާ ވިދާޅުވި އެވެ.
"އޭގެ ތެރޭގައި އަނިޔާވި މެމްބަރުންނާ އަދި އެ މެމްބަރުންނަށް ބައެއް ކަހަކަ އިންޒާރުގެ މެސެޖްތައް ލިބުމާ ގުޅިގެން އެ ބޭބޭފުޅުންގެ ކަންބޮޑުވުންތައް ހުރެހެން އެބޭފުޅުންގެ ރައްކާތެރިކަމަށް އެދި ހުށަހަޅާފައި ހުރި މައްސަލަތައް ވެސް ހިމެނޭ،" މަޖިިލީހުގައި ހިނގި ހައިޖާނާ ގުޅިގެން ހުށަހެޅި މައްސަލަތަކުގެ ތަފްސީލު ދެއްވަމުން ނާފިޒު ވިދާޅުވި އެވެ.
އެކްޓިން ހެޑް އޮފް ކްރައިމް އިންވެސްޓިގޭޝަން ކޮމާންޑް، ޗީފް ސުޕްރިންޓެންޑެންޓް އަހުމަދު ނާފިޒު. ފޮޓޯ: ފުލުހުންގެ އިދާރާ
އޭނާ ވިދާޅުވީ އެ މައްސަލަތަކާ ގުޅިގެން ކަމާ ބެހޭ އިދާރާތަކާ ހިއްސާކުރަން ޖެހޭ މައުލޫމާތު މިހާރު ވާނީ ހިއްސާކޮށްފައި ކަމަށް ވެސް އޭނާ ވިދާޅުވި އެވެ.
"އަދި އެ މެމްބަރުންގެ ރައްކާތެރިކަމަށް އަަޅަން ޖެހޭ ފިޔަވަޅުތައް [ވާނީ] އަޅައިފައި،" އޭނާ ވިދާޅުވި އެވެ.
ވަޒީރުންނަށް ރުހުން ދިނުމަށް ހޯމަދުވަހު ބޭއްވި ޖަލްސާގައި ސަރުކާރަށް ތާއީދުކުރާ މެމްބަރުން މަޖިލީހުގެ ރައީސް މުހައްމަދު އަސްލަމަށް ހުރަސްއަޅުއްވައި ޖަލްސާ ކުރިއަށް ގެންދިޔަ ނުދޭން މަސައްކަތް ކުރި ކަމަށް އެމްޑީޕީގެ ބައެއް މެމްބަރުން ތުހުމަތުކުރެ އެވެ. އެ ދުވަހު ސޯޝަލް މީޑިއާގައި އާއްމުކުރި ވީޑިއޯތަކުން ފެންނަ ގޮތުގައި އެކަމުގެ ތެރޭގައި މެމްބަރުންގެ މެދުގައި މާރާމާރީ ވެސް ހިނގި އެެވެ.
އެ ހަމަނުޖެހުންތަކުގެ ތެރޭގައި ކަނޑިތީމު ދާއިރާގެ މެމްބަރު އަބްދުﷲ ޝަހީމް އަބްދުލް ހަކީމަށް އަނިޔާވެ، އޭނާއަށް އޭޑީކޭ ހޮސްޕިޓަލުގައި ފަރުވާ ވެސް ދިނެވެ.
