މާދަމާ ބޭއްވުމަށް ނިންމާފައިވާ ޕްރޮގްރެސިވް ކޯލިޝަންގެ ޕްރައިމަރީގައި 73 ދާއިރާއަކަށް 71،597 މީހުންނަށް ވޯޓު ލެވޭނެކަމަށް އެ ކޯލިޝަނުން ބުނެފި އެވެ.
މާޗު މަހުގެ 13 ވަނަ ދުވަހު ބޭއްވުމަށް ނިންމާފައި އޮތް މަޖިލިސް އިންތިހާބުގައި ވާދަ ކުރާނެ ކެންޑިޑޭޓުން ކަނޑައެޅުމަށް ބާއްވާ ޕްރައިމަރީގައި 283 ކެންޑިޑޭޓުން ވާދަ ކުރާނެ ކަމަށް އެ ކޯލިޝަނުން ބުނެ އެވެ.
ވޯޓު ލުން ކުރިއަށް ދާނީ ހެނދުނު 10:00 އިން ހަވީރު 05:00 އަށް ކަމަށް އެ ކޯލިޝަނުން މައުލޫމާތު ދެ އެވެ.
މާލޭގައި ފޮށި ބަހައްޓާ ތަން ތަން
- ހެންވޭރު ދަނޑު (އަތޮޅުތަކުގެ ފޮށިތައް)،
- ކަލާފާނު ސްކޫލް،
- ޖަމާލުއްދީން ސްކޫލް،
- ތާޖުއްދީން ސްކޫލް،
- ވިލިމާލެ ޔޫތް ސެންޓަރ،
- ކާމިލްދީދީ ސްކޫލް (ހުޅުމާލެ)،
- ރެހެންދި ސްކޫލް (ހުޅުމާލެ) އެވެ.
އެ ކޯލިޝަނުން މާދަމާ ޕްރައިމަރީ ބާއްވާއިރު، ޕްރައިމަރީ ބާއްވާ ތާރީހު ދެ ބުރަށް ފަސް ކުރި އެވެ.
އެންމެ ފުރަތަމަ ޕްރައިމަރީ ބޭއްވުމަށް ނިންމީ މިދިޔަ ޑިސެމްބަރު 23 ގަ އެވެ. އެއަށް ފަހު ސްކޫލް ޗުއްޓީއާ ދިމާވާ ކަމަށް ބުނެ ޖެނުއަރީ 20 އަށް ޕްރައިމަރީ ލަސް ކުރި އެވެ. އެހެންނަމަވެސް ޖެނުއަރީ 27 އަށް ޕްރައިމަރީ ލަސް ކުރީ ކީއްވެކަން އެ ކޯލިޝަނުން ހާމަ ކޮށްފައެއް ނުވެ އެވެ.
ޕްރައިމަރީ އަކާ ނުލައި 13 މީހަކަށް އެ ކޯލިޝަންގެ ޓިކެޓު އޮތީ ކަށަވަރު ވެފަ އެވެ. މި 13 މީހުންނަށް ޓިކެޓު ކަށަވަރުވީ އެ މީހުން ކުރިމަތިލީ ދާއިރާތަކަށް އިތުރު މީހަކު ކުރިމަތިލާފައި ނުވާތީ އެވެ.
ޕްރޮގްރެސިވް ކޯލިޝަންގެ ޓިކެޓު ކަށަވަރުވެފައިވާ މީހުންގެ ތެރޭގައި ޕީއެންސީގެ ޗެއާޕާސަން އަދި ރައީސްގެ އިސް އެޑްވައިޒަރު އަބްދުއްރަހީމް އަބްދުﷲއާއި އޭދަފުށީ ދާއިރާގެ މިހާރުގެ މެންބަރު އަހުމަދު ސަލީމްގެ އިތުރުން މަހިބަދޫ ދާއިރާގެ މެންބަރު، އަހުމަދު ތާރިގު ހިމެނިވަޑައިގަންނަވަ އެވެ.
