ރައީސުލްޖުމްހޫރިއްޔާ ޑރ. މުހައްމަދު މުއިއްޒު ޗައިނާއަށް ކުރައްވަމުން ގެންދަވާ ފުރަމާނަ ދަތުރުގެ ތެރެއިން ޗައިނާގެ ރައީސް ޝީ ޖިންޕިންއާ އިއްޔެ ބައްދަލު ކުރެއްވި އެވެ.
ޗައިނާ ރައީސްގެ ދައުވަތަކަށް އެ ގައުމަށް ވަޑައިގެން އުޅުއްވާ ރައީސް މުއިއްޒު އަރިހުގައި ކެބިނެޓު ވަޒީރުންނާއި ޗައިނާއަށް ވަޑައިގެންނެވި ވަފުދުގެ އިސްބޭފުޅުން ބައިވެރިވެޑައިގެންނެވި އެވެ.
ރައީސް މުއިއްޒު ޗައިނާގެ ވެރިރަށް ބެއިޖިންއަށް ވަޑައިގެންނެވީ އިއްޔެ ހެނދުނުގެ ވަގުތެއްގަ އެވެ.
އެމަނިކުފާނު ފުރަތަމަ ވަޑައިގެންނެވީ ފޫޖިއާން ޕްރޮވިންސަށެވެ. ފޫޖިއާން ޕްރޮވިންސަށް ވަޑައިގެން އެ ސަރަހައްދުގެ ސަރުކާރުގެ އިސްބޭފުޅުންނާ ބައްދަލުކުރެއްވި އެވެ. އަދި ރާއްޖޭގައި ހުރި އިންވެސްޓްމަންޓު ފުރުސަތުތައް ޗައިނާ އިންވެސްޓަރުންނަށް ކިޔައިދޭން ބޭއްވި އިންވެސްޓް މޯލްޑިވްސް ފޯރަމްގައި ވެސް ބައިވެރިވެ ވަޑައިގެންނެވި އެވެ.
މި ފުރަމާނަ ދަތުރުގައި ޗައިނާގެ ރައީސްއާ ބައްދަލު ކުރެއްވުމަށް ފަހު އިއްޔެ ދެ ގައުމުގެ ދެމެދު ރަސްމީ ވާހަކަތައް ބާއްވައި، އަދި 20 ދާއިރާއަކުން ގުޅުން ބަދަހިކުރުމުގެ އެއްބަސްވުންތަކުގައި ސޮއިކުރި އެވެ.
