އިންޑިއާގެ ބޮޑުވަޒީރު ނަރެންދުރަ މޯދީއަށް މަލާމާތްކޮށް ސޯޝަލް މީޑިއާ ޕްލެޓްފޯމްގައި ވާހަކަ ދައްކަވާފައިވާތީ ސަސްޕެންޑުކުރި ޔޫތު މިނިސްޓްރީގެ ތިން ޑެޕިއުޓީ މިނިސްޓަރުން ވަކިކުރުމަށް ގިނަ އަދަދެއްގެ ބަޔަކު ސޯޝަލް މީޑިއާގައި ގޮވާލަން ފަށައިފި އެވެ.
މިކަމާ ގުޅިގެން ސަރުކާރުން ސަސްޕެންޑް ކުރީ ޔޫތު މިނިސްޓްރީގެ ޑެޕިއުޓީ މިނިސްޓަރުން ކަމަށްވާ މަލްޝާ ޝަރީފާއި މަރިޔަމް ޝިއުނާ އަދި މަހުޒޫމް މާޖިދު އެވެ. އެކަން ސަރުކާރުގެ އިސް އޮފިޝަލަކު "އަދަދު" އަށް ޔަގީން ކޮށްދެއްވި އެވެ.
މަލްޝާ އާއި ޝިއުނާއަކީ ރައީސް މުއިއްޒުގެ އަރިސް ދެ ބޭފުޅުންނެވެ. އެ ދެ ބޭފުޅުން ކުރިން މަސައްކަތް ކުރެއްވީ، މުއިއްޒު މޭޔަރަކަށް ހުންނެވިއިރު ސިޓީ ކައުންސިލްގަ އެވެ.
އިންޑިއާއަށް މަލާމާތް ކުރި ޑެޕިއުޓީ މިނިސްޓަރުން ސަސްޕެންޑުކޮށްފައި ވާއިރު، އިދިކޮޅު މައި ޕާޓީ، އެމްޑީޕީން ނެރުނު ބަޔާނުގައި ވަނީ ވަގުތުން ވަގުތަށް އެ މީހުން މަގާމުން ވަކިކުރުމަށް ގޮވާލައިފަ އެވެ. ސަރުކާރުގެ އޮފިޝަލުންގެ އަމަލުތަކުގެ ސަބަބުން އާންމު ރައްޔިތުންގެ ދިރިއުޅުމަށް ނޭދެވޭ އަސަރު ކުރާނެކަން ދަންނަން ޖެހޭނެ ކަމަށް އެމްޑީޕީން ބުނެފައިވެ އެވެ.
"ޑިޕްލޮމެޓިކް އަހުލާގާއި ޕްރޮފެޝަނަލިޒަމް ނެތުމާއި، ސަރުކާރުގެ އިސްވެރިންގެ ނާގާބިލުކަމުގެ ސަބަބުން، އަޅުގަނޑުމެންގެ ބައިނަލްއަގުވާމީ ގުޅުންތައް އިޔާދަ ނުކުރެވޭ ވަރަށް ހަލާކުވެގެން ހިނގައްޖެ. އަޅުގަނޑުމެންގެ ރައްޔިތުންގެ މަސްލަހަތަށް ސަރުކާރުން ވިސްނާފައި ނެތުމަކީ ވަރަށް ޒިންމާދާރުކަން ކުޑަ އަދި މުޅިން ބަލައިގަނެވޭނެ ކަމެއް ނޫންކަމަށް އެމްޑީޕީން ދެކޭ," އެ ޕާޓީން ނެރުނު ބަޔާނެއްގައި ބުނެފައިވެ އެވެ.
ބައެއް ފަރާތްތަކުން ބުނަމުންދާ ގޮތުގައި ސަސްޕެންޑް ކުރުމަކީ ޑެމޭޖު ކޮންޓްރޯލް ކުރުމަށް ސަރުކާރުން ކުރި ކަމެކެވެ. އަދި, ދެތިން ހަފުތާ ފަހުން އެ މީހުންގެ ވަޒީފާ އިޔާދަކުރާނެ ކަމަށް ވެސް ބައެއް ފަރާތްތަކުން ދަނީ ބުނަމުންނެވެ.
"އެކަމުގައި ޝާމިލްވި ސިޔާސީ ބޭފުޅުން މަގާމުން ވަކިކުރައްވާ، އަޅުގަނޑުމެންގެ ރާއްޖެއަކީ މެހެމާންދާރީގައި ތަފާތުނުކުރާނޭ ގައުމެއްކަން ސާބިތު ކޮށްދެއްވާ," ބޯޓިން އެސޯސިއޭޝަންގެ ރައީސް އިސްމާއީލް ހަމީދު ޓްވިޓާގައި ވިދާޅުވެފައިވެ އެވެ.
އޭގެ އިތުރުން ވެސް ގިނަ އަދަދެއްގެ ބަޔަކު އަންނަނީ މި ތިން ޑެޕިއުޓީ މިނިސްޓަރުންގެ އިސްތިއުފާއަށް ގޮވާލަމުންނެވެ.
"ކޮބައިތޯ މާފަށް އެދިފައި. އަދި އެ މީހުން މަގާމުން އިސްތިއުފާ ދޭން ޖެހޭ. އެއީ ސަސްޕެންޑް ކުރަން ސްކޫލް ކުދިންނެއް ނޫން," އިތުރު މީހަކު ޓްވިޓާގައި ބުނެފައިވެ އެވެ.
ސަރުކާރަށް ބޮޑެތި ފާޑުކިޔުންތަކެއް މިކަމާ ގުޅިގެން އަމާޒުވަމުންދާއިރު އެކަން ކުށްވެރިކޮށް ސަރުކާރުން ނެރުނީ ކުރު ބަޔާނެކެވެ.
ފޮރިން މިނިސްޓްރީން ނެރުނު ބަޔާނެއްގައި ވަނީ ސަރުކާރުގެ އިސް މަގާމުތަކެއްގައި ތިއްބެވި އޮފިޝަލުންތަކެއް ބޭރު ގައުމުތަކެއްގެ ލީޑަރުންނާ ދެކޮޅަށް ދަށު ދަރަޖައިގެ ބަހުރުވައިން މުހާތަބު ކޮށްފައިވާކަން އެނގިފައިވާ ކަމަށެވެ.
"މި ހިޔާލުތަކަކީ އަމިއްލަ ހިޔާލުތަކެއް, އެއީ ދިވެހި ސަރުކާރުގެ ވިސްނުން ރަމްޒުކޮށްދޭ ހިޔާލުތަކެއް ނޫން ކަމަށް," އިނގިރޭސި ބަހުން ސަރުކާރުން ނެރުނު ސްޓޭޓްމަންޓެއްގައި ބުނެފައިވެ އެވެ.
ހިޔާލު ފާޅުކުރުމުގެ މިނިވަންކަން ބޭނުންކުރަންވާނީ ޑިމޮކްރެޓިކް އަދި ޒިންމާދާރު ގޮތެއްގައި، ނަފްރަތާއި، ނެގެޓިވްކަން ނުފެތުރުމާއި، ރާއްޖެ އާއި ބައިނަލްއަގުވާމީ ގައުމުތަކުގެ މެދުގައި އޮންނަ ގާތް ގުޅުމަށް ހުރަސް ނޭޅޭ ފަދަ ގޮތަކަށް ކަމަށް ފޮރިން މިނިސްޓްރީން ބުނެފައިވެ އެވެ.
"އެފަދަ ދަށުދަރަޖައިގެ ވާހަކަތައް ދައްކާ ފަރާތްތަކާ މެދު ފިޔަވަޅު އެޅުމަށް ސަރުކާރުގެ ކަމާ ބެހޭ އިދާރާތަކުން ފަސްނުޖެހޭނެ," އެ ބަޔާނުގައި ބުނެފައިވެ އެވެ.
