މާލެ އާއި ހުޅުމާލެއިން ވެސް، ފައިލޭރިއާ އަށް ޕޮޒިޓިވް ވެފައިވާ މީހުން ފެނިއްޖެ އެވެ.
ހެލްތު ޕްރޮޓެކްޝަން އެޖެންސީ (އެޗްޕީއޭ) އިން އާންމު ކުރި ތަފާސްހިސާބުތަކުން ދައްކާ ގޮތުގައި، ހުޅުމާލެ އިން މި ބައްޔަށް ޕޮޒިޓިވް ފަސް މީހަކު އަދި މާލެއިން ޕޮޒިޓިވް އެކަކު ފެނިފައިވެ އެވެ.
ޕޮޒިޓިވް ކޭސްތައް ފެނިފައި ވަނީ، ބިދޭސީން މަސައްކަތްކުރާ ސައިޓުތަކުން ނެގި ސާމްޕަލްތަކުންނެވެ.
ހުޅުމާލެއިން ފަސް މީހުން ޕޮޒިޓިވްވީ ޓެސްޓު ކުރި 25 މީހުން ތެރެއިންނެވެ. މާލެއިން އެކަކު ޕޮޒިޓިވް ވީ، ޓެސްޓު ކުރި 15 މީހުންގެ ތެރެއިންނެވެ. ގުޅީފަޅުން ޓެސްޓު ކުރި 20 މީހުން ތެރެއިން ވެސް، އެކަކު ޕޮޒިޓިވް ވެފައިވެ އެވެ.
އެއާއެކު، މިހާތަނަށް ޖުމްލަ ހަތް މީހުން މާލެ ސަރަހައްދުން ޕޮޒިޓިވް ވެފައިވެ އެވެ.
ރާއްޖޭން އެއްކޮށް ނައްތާލާފައިވާ ބައްޔެއް ކަމުގައިވާ ފައިލޭރިއާ ޖެހިފައި ތިބި ބަޔަކު ފުރަތަމަ ފެނުނީ، ދުނިޔޭގެ އެއިޑްސް ދުވަސް ފާހަގަކުރުމުގެ ގޮތުން ކުރިއަށް ގެންދިޔަ ސްކްރީނިން ޕްރޮގްރާމެެއްގެ ތެރެއިން، ކުޅުދުއްފުށި ސިޓީންނެވެ. އެ ރަށުން ފައިލޭރިއާ ޖެހިފައިވާ 25 ބިދޭސީ މަސައްކަތްތެރިއަކު މިހާތަނަށް ދެނެގަނެވިފައި ވެ އެވެ.
ފައިލޭރިއާއަކީ މަދިރީގެ ޒަރިއްޔާއިން ފެތުރޭ، ގައިންގަޔަށް އަރާ ބައްޔެކެވެ.
ރާއްޖެއިން މި ބަލި ނައްތާލެވިފައިވާ ކަމުގެ ސެޓްފިކެޓް ދުނިޔޭގެ ސިއްހަތު ޖަމިއްޔާ އިން ލިބުނީ 2016 ގަ އެވެ. ރާއްޖޭން އެންމެ ފަހުން ފައިލޭރިއާ ކޭސްއެއް ރިޕޯޓުކުރީ 2004 ވަނަ އަހަރު ލ. ފޮނަދޫއިންނެވެ.
