އިސްލާމިކް މިނިސްޓްރީގެ ދަށުން ހިންގާ ފަނޑުތައް ތަރައްގީ ކުރަން މޯލްޑިވްސް އިސްލާމިކް ބޭންކާއެކު އެމްއޯޔޫއެއްގައި ސޮއިކޮށްފި އެވެ.
މިއަދު އިސްލާމިކް މިނިސްޓްރީއާއި, އެމްއައިބީއާ ދެމެދު ސޮއިކުރި އެއްބަސްވުމުގެ ދަށުން ތަރައްގީ ކުރާނީ ޒަކާތު ފަންޑު, އަވްގާފް ފަންޑު އަދި ހައްޖު ފަންޑެވެ.
އެ އެއްބަސްވުމުގައި ސޮއި ކުރީ މިއަދު އިސްލާމިކް މިނިސްޓްރީގައި ބޭއްވި ރައްމިއްޔާތެއްގައި މިނިސްޓަރު ޑރ. މުހައްމަދު ޝަހީމް އަލީ ސައީދު އެވެ. އަދި އެމްއައިބީގެ ސީއީއޯ މުފައްދަލް އިދުރިސް ޚުމްރީ އެވެ.
އިސްލާމިކް މިނިސްޓްރީން ބުނި ގޮތުގައި ޒަކާތު ފަންޑު އިތުރަށް ތަރައްގީކޮށް ރައްޔިތުންނަށް ފަސޭތަކެއް ހޯދައި ދިނުމަކީ ރައީސް ޑރ. މުހައްމަދު މުއިއްޒުގެ މެނިފެސްޓޯގައި ހިމަނާފައިވާ ކަމެކެވެ. އަދި ވަގްފްގެ މަޝްރޫއުތައް ހުރިހާ އަތޮޅެއްގައި ހިންގުމަށްވެސް މެނިފެސްޓޯގައި ހިމަނާފައި ވެއެވެ.
ރައީސް މުއިއްޒު ވަނީ ދާދި ފަހުން "މޯލްޑިވްސް ޒަކާތު ހައުސް" ގެ ނަމުގައި އާ އިދާރާއެއް އުފައްދަވައި, އެ އިދާރާ އިފްތިތާހު ކޮށްދެއްވައިފަ އެވެ.
އިސްލާމިކް މިނިސްޓްރީން ބުނި ގޮތުގައި ރަށު ވަގުފާއި އަތޮޅު ވަގުފްގެ މަޝްރޫއުތައް ކުރިއަށް ގެންދިއުމަށް ކައުންސިލްތަކާއެކު ގިނަ މަޝްވަރާ ބައްދަލުވުންތަކެއް ބާއްވަމުންދާ ކަމަށެވެ. އެ މަޝްރޫއުގެ ސަބަބުން ރަށްރަށުގައި ދީނީ ތައުލީމު ދޭ ތަންތަން އިތުރުކޮށް ރައްޔިތުންނަށް އިތުރު ފަސޭހަ ގޮތްތަކެއް ހޯދައި ދެވޭނެ ކަމަށެވެ.
