ސްކޫލް ދައުރު ނިމުމުން ކޮންމެ ދަރިވަރަކު ވެސް މިސްރާބު ޖަހަނީ މުސްތަގުބަލު އާރާސްތުކުރާނެ މަގެއް ހޯދުމަށެވެ. އެއްބައި ކުދިން ހިޔާރުކުރަނީ އިތުރަށް ކިޔަވައިގެން، ކޮންމެވެސް ދާއިރާއަކުން މަތީ ތައުލީމު ހާސިލުކުރާށެވެ. އަނެއް ބައި ކުދިން އަވަސްވެގަންނަނީ ވަޒީފާއެއް ހޯދާށެވެ. ހާލަތު ނިޔާ ކުރާ ގޮތުން މި ދެކަން އެއް ފަހަރާ ފަށައިގަންނަން ޖެހޭ ކުދިން ވެސް މަދެއް ނުވާނެ އެވެ.
މިއިން ކަމެއްގައި ކުރިއަށް ދާނެ ގޮތުގެ އެއްވެސް އެހީތެރިކަމެއް ބޭނުންވާ ނަމަ ނުވަތަ މައުލޫމާތެއް ބޭނުންވާ ނަމަ ދާންވީ މާދަމާ އޮންނަ ވިލާ ކޮލެޖުގެ އޯޕަން ޑޭ އާއި ކެރިއާ ފެއާއަށެވެ.
ވިލާ ކޮލެޖުގެ ގޯތި ތެރޭގައި ހުކުރު ދުވަހުގެ ހަވީރު 4:00 އިން ރޭގަނޑު 10:00 އަށް ކުރިއަށް ގެންދާ މި ހަރަކާތްތަކުގައި، އަންނަ ޖެނުއަރީ އިންޓޭކްގައި ފެށުމަށް ހަމަޖެހިފައިވާ ކޯސްތަކުގެ މައުލޫމާތު ލިބޭނެ އެވެ. ބޭނުން ނަމަ ކޯސްތަކަށް ވަންނަން އޯޕަންޑޭގެ ތެރެއިން އެޕްލިކޭޝަން ހުށަހެޅޭނެ އެވެ. ހުށަހެޅުމާ އެކީ ވަގުތުން ކޯހަށް ހޮވުނުކަމުގެ ލިޔުން އަދި ކޯހަށް ރަޖިސްޓްރީ ވެވޭނެ އިންތިޒާމް ވަނީ ހަމަޖެހިފަ އެވެ.
ވިލާ ކޮލެޖުން ބުނި ގޮތުގައި މީގެ އިތުރުން ލެކްޗަރާއިންނާއި ބައްދަލުކޮށްލުމުގު ފުރުސަތު، އަދި މިހާރުގެ ދަރިވަރުންނާއި ބައްދަލުކޮށް އެ ކުދިންގެ ތަޖުރިބާ އޮޅުންފިލުވުމުގެ ފުރުސަތު ވެސް ލިބޭނެ އެވެ. އަދި ވިލާ ކޮލެޖުގެ ކިޔަވައި ދިނުމާއި އުނގަންނައި ދިނުން އަމިއްލައަށް ތަޖުރިބާ ކޮށްލެވޭ ގޮތަށް ހިލޭ ބައިވެރިވެވޭ ޑެމޯ ކްލާސްތައް ވެސް އޮންނާނެ އެވެ.
މި ކްލާސްތައް ބިނާ ވެފައި ވަނީ ވިލާ ކޮލެޖުގައި ހިންގޭ ބައެއް ޕްރޮގްރާމްތަކުގެ މުގައްރަރުގެ ތެރެއިން، ވީހާވެސް ގިނަ ދަރިވަރުން ޝައުގުވެރިވާނެ ފަދަ މައުލޫތަކަށް ސަމާލުކަން ދީގެންނެވެ. މިގޮތުން ބައިވެރިވެވޭ ކްލާސްތަކާއި، އެ ކްލާސްތައް އޮންނަ ގަޑިއަކީ:
- ސައިކޮލޮޖީ ދާއިރާއިން: ސެލްފް އެސްޓީމް އެންޑް ރިސާޗް އަދި ބައޮލޮޖިކަލް ސައިކޮލޮޖީ - 20:00 އިން 21:00 އަށް
- ޓީޗިން ދާއިރާއިން: ޖެނެރަލް މެތެމެޓިކްސް - 21:00 އިން 22:00 އަށް
- އިންޖިނިއަރިންގެ ދާއިރާއިން: ސެންސިން ދަ ވޯލްޑް: ސެންސާޒް އިން ޑޭ ޓު ޑޭ ލައިފް - 17:00 އިން 18:00 އަށް އަދި އާޑުއިނޯ އޯސަމްނަސް: ޑައިވް އިންޓު ރޮބޮޓިކްސް - 21:00 އިން 22:00 އަށް
- އިންޖިނިއަރިން ސިމިއުލޭޝަން އަދި މެކޭނިކަލް ލެބް އެކްސްޕީރިއަންސް - 20:00 އިން 21:00 އަށް
- ޗައިނީސް ލެންގުއޭޖް ދާއިރާއިން: ހެލޯ ޗައިނީސް – 18:30 އިން 19:30 އަށް
ވިލާ ކޮލެޖު ކެރިއާ ފެއާ
ވިލާ ކޮލެޖުގެ އިންޑަސްޓްރީ ޕާޓްނަރުންނާއި ގުޅިގެން އެ ކުންފުނިތަކުގައި ހުރި ވަޒީފާތަކުގެ ފުރުސަތުތަކާއި ބެހޭ މަޢުލޫމާތު ދިނުމަށް ބޭއްވޭ ކެރިއާ ފެއާއެއް އޮންނާނެ އެވެ. މި ފެއާގައި ޓޫރިޒަމާއި އެކައުންޓިން އާއި އިންޖިނިއަރިން ދާއިރާގައި ހަރަކާތްތެރިވާ ކުންފުނިތަކުން ބައިވެރި ވެ އެވެ. އޭގެ ތެރޭގައި ހިމެނެނީ:
- ކްރޯ މޯލްޑިވްސް
- އީ ވައި (އާންސްޓް އެންޑް ޔަންގް)
- ޔުނިވާސަލް ރިސޯޓްސް
- ކްރައުން އެންޑް ޗަމްޕާ ރިސޯޓްސް
- ވިލާ ގްރޫޕް
- ސީޓީއެލް ސްޓްރެޓެޖީސް
- އެމްޓީސީސީ
- ފިއުލް ސަޕްލައި މޯލްޑިވްސް (އެފްއެސްއެމް)
- ވެމްކޯ
މީގެ އިތުރުން ވިލާ ކޮލެޖުގައި ހުރި ވަޒީފާތަކުގެ ފުރުސަތުތަކުގެ މަޢުލޫމާތު ވެސް ކެރިއާ ފެއާގެ ތެރޭގައި ލިބިގެން ދާނެ އެވެ
މިދިޔަ އަހަރުގެ އޯޕަންޑޭގެ ހަރަކާތްތަކުގެ ތެރެއިން. -- ފޮޓޯ: ވިލާ ކޮލެޖު
އޯޕަންޑޭގައި އާންމުންނަށް ހިލޭ ލިބޭ ހިދުމަތްތަކާއި ނަސީބުވެރިއަކަށް އިނާމު
ވިލާ ކޮލެޖުގެ އޯޕަންޑޭގެ ތެރެއިން އާންމުނަން މުހިއްމު ބައެއް ހިދުމަތްތައް ވެސް ހިލޭ ލިބެގެން ދާނެ އެވެ. މިގޮތުން ހިލޭ ގާނޫނީ ލަދާދޭ ލޯ ކްލިނިކަކާއި ވައިޓަލް ޗެކްކުރުން އަދި ހަކުރު ބެލުން ފަދަ ހެލްތު ސްކްރީނިން ހިދުމަތްތައް ވެސް ލިބޭނެ އެވެ.
އެގޮތުން ހިލޭ ގާނޫނީ ލަފާދޭ ލޯ ކްލިނިކުގެ ހިދުމަތް އޯޕަންޑޭ ހިނގަމުންދާ ހުރިހާ ވަގުތެއްގައި ވެސް ލިބެން ހުންނާނެ އެވެ. ހަމައެހެންމެ ހެލްތު ސްކްރީނިންގެ ކަންކަން ވެސް ހުރިހާ ވަގުތެއްގައި ކުރިއަށް ދާނެ އެވެ. މީގެ އިތުރުން ދަރިމައިވުމުގެ ސިއްހަތާ ބެހޭ މައުލޫމާތު ވެސް މި އޯޕަންޑޭގެ ތެރެއިން ދިނުމަށް ހަމަޖެހިފައި ވެ އެވެ.
މީގެ ތެރޭގައި މައްސަރުކަންތަކާއި ގުޅޭ މައުލޫމާއި ތަފާތު ކެންސަރުގެ ވައްތަރުތަކުން ރައްކާތެރިވުމާއި ބެހޭ މަޢުލޫމާތު ހޯދަން ސިއްހީ ދާއިރާގެ ބޭފުންނާ އެކު ވަކިވަކިން ވާހަކަ ދައްކާލުމުގު އިންތިޒާމް ވެސް ހަމަޖެހިފައި ވެ އެވެ.
ވިލާ ކޮލެޖުގެ އޯޕަންޑޭގެ ތެރެއިން ތަފާތު ކުޅިވަރު ހަރަކާތްތަކާއި އަދި ޒިޔާރަތް ކުރާ ފަރާތްތަކުގެ މެދުގައި ނެގޭ ގުރުއަތުން ނަސީބު ވެރި ފަރާތަކަށް ހާއްސަ އިނާމެއް ވެސް އޮންނާނެ އެވެ.
