އިޒްރޭލުގެ ގައުމީ ފުޓުބޯޅަ ޓީމުގެ ޖާޒީ ސްޕޮންސާ ކުރަމުން އަންނަ ޕޫމާ ބްރޭންޑުން، ސްޕޮންސާޝިޕު ނިމުމަކަށް ގެންނަން ނިންމައިފި އެވެ.
އިޒްރޭލުގެ ފުޓްބޯޅަ ޓީމުގެ ރަސްމީ ކިޓު ސްޕޮންސާ ކުރަން ޕޫމާއިން އިޒްރޭލުގެ ފުޓްބޯޅަ އެސޯސިއޭޝަނާއެކު ހަދާފައިވާ އެއްބަސްވުމުގެ މުއްދަތު މި މަހުގެ ނިޔަލަށް ހަމަވާނެ އެވެ. އިނގިރޭސިވިލާތުގެ ފައިނޭންޝަލް ޓައިމްސް އިން ބުނާ ގޮތުގައި ޕޫމާއިން މިހާރު ވަނީ އެ އެއްބަސްވުން އާ ނުކުރަން ނިންމާފަ އެވެ.
އެހެންކަމުން އަންނަ މަހުން ފެށިގެން އިޒްރޭލުގެ ފުޓްބޯޅަ ޓީމުގެ ކިޓު ޕާޓްނަރެއްގެ ގޮތުގައި ޕޫމާއެއް ނޯންނާނެވެ. ބައިނަލްއަގުވާމީ މީޑިއާތަކުން ރިޕޯޓުކުރާ ގޮތުގައި ޕޫމާއިން އެ ނިންމުން ނިންމީ އެ ބްރޭންޑު ބޮއިކޮޓް ކުރަން ކުރިއަށްގެންދާ ކެމްޕެއިނުގެ ސަބަބުން ކުރިމަތިވަމުންދާ މާލީ ގެއްލުންތަކާ ހެދި އެވެ.
ޕޫމާ ހިމެނޭހެން އިޒްރޭލަށް ވާގިވެރިވާ އަދި އިޒްރޭލުން މިލްކު ކުރާ ވިޔަފާރިތައް ބޮއިކޮޓު ކުރުމަށް ކުރަމުންދާ ކެމްޕޭން މިހާރު ވަނީ ވަރަށް ވަރުގަދަކޮށްފަ އެވެ. ސަބަބަކީ އޮކްޓޯބަރު 7، އިން ފެށިގެން އިޒްރޭލުން ކެނޑިނޭޅި ގާޒާއަށް ދެމުންދާ ހަމަލާތަކެވެ.
އިންތިޒާމުވެގެން ހިންގާ އެ ބޮއިކޮޓު ކެމްޕޭނުގައި ހަރަކާތްތެރިވާ އިސްވެރިން ވަނީ ފަލަސްތީނުގެ ބިންތަކަށް ވެރިވެގަނެ އިޒްރޭލުން އާބާދުކޮށްފައިވާ ތަންތަނަށް ޕޫމާއިން އެހީތެރިވާ ކަމަށް ވެސް ބުނެފަ އެވެ. ނަމަވެސް ޕޫމާއިން މިކަން ދޮގުކުރެ އެވެ. ބޮއިކޮޓު ހަރަކާތުން 2018 އިން ފެށިގެން ޕޫމާއަށް ދަނީ ޓާގެޓު ކުރަމުންނެވެ.
ޕޫމާގެ އިތުރުން މި ކެމްޕޭނާ ގުޅިގެން ފާއިތުވި ދެ ހަފުތާގެ ތެރޭގައި 11 ބިލިއަން ޑޮލަރުގެ ގެއްލުން ލިބިފައިވާ ކަމަށް އެ ކުންފުނިން ވެސް ބުނެ އެވެ. ސްޓާބަކްސްއާ ހަވާލާދީ ވޯލް ސްޓްރީޓު ޖާނަލްއިން ރިޕޯޓުކޮށްފައި ވާގޮތުގައި އެ ކުންފުނީގެ މާކެޓު އަގު ވަނީ ވިދިވިދިގެން 12 ދުވަހު ދަށަށް ގޮސްފަ އެވެ.
އިޒްރޭލުން ފަލަސްތީނުގެ ރައްޔިތުންނާ ދެކޮޅަށް ހިންގަމުންދާ ގަތުލުއާންމަށް 75 އަހަރުވެފައިވާއިރު ވޭތުވެދިޔަ ދެ މަސްދުވަހު ގާޒާއަށް މެދުނުކެނޑި ބޮންއަޅާތާ ދެ މަހަށް ވުރެ ގިނަ ދުވަސްވެއްޖެ އެވެ. އެ ހަމަލާތަކުގައި މަރުވި ފަލަސްތީނު މީހުންގެ އަދަދު 17،000 އަށް ވުރެ މައްޗަށް އަރަ އެވެ. އޭގެ ތެރޭގައި 7،000 އަށްވުރެ ގިނަ ކުޑަކުދިން ހިމެނެ އެވެ.
