އަންނަ އަހަރަށް ހުށަހެޅި ބަޖެޓުގައި ސަރުކާރުން އެދިގެން ފުށިދިއްގަރު ފަޅު ހިއްކުމަށް ހިމަނާފައިވާ 400 މިލިއަން ރުފިޔާ އުނިކުރަން ރައްޔިތުންގެ މަޖިލީހުގެ ބަޖެޓު ކޮމިޓީން މިރޭ ފާސްކޮށްފި އެވެ.
އަންނަ އަހަރުގެ ދައުލަތުގެ ބަޖެޓުގެ ގޮތުގައި މަޖިލީހަށް ހުށަހަޅާފައި ވަނީ 49.5 ބިލިއަން ރުފިޔާގެ ބަޖެޓެކެވެ. އެ ބަޖެޓުގައި ޕަބްލިކް ސެކްޓާ އިންވެސްޓްމަންޓް ޕްރޮޖެކްޓު (ޕީއެސްއައިޕީ) ތަކަށް 8.6 ބިލިއަން ރުފިޔާ ހަރަދުކުރުމަށް ވަނީ ހިމަނައިފަ އެވެ.
މިރޭ ކޮމިޓީން ފާސްކުރީ 49.8 ބިލިއަން ރުފިޔާގެ ބަޖެޓެކެވެ. އެކި ދާއިރާތަކުން 306 މިލިއަން ރުފިޔާ ބަޖެޓަށް ވަނީ އިތުރުކޮށްފަ އެވެ.
ރާއްޖެ-މޮރިޝަސް ކަނޑުގެ އިން ވަކިކުރުމުގެ މައްސަލާގައި ރާއްޖެއަށް ގެއްލުނު ކަނޑުގެ ބައި ހޯދުމަށް ކުރާ މަސައްކަތުގައި ގާނޫނީ މަސައްކަތްތައް ކުރުމަށް އެޓާނީ ޖެނެރަލްގެ އޮފީހުގެ ބަޖެޓަށް 10 މިލިއަން ރުފިޔާ އިތުރުކުރަން ވަނީ ނިންމާފަ އެވެ.
އޭގެ އިތުރުން, ބަޖެޓު ކޮމިޓީން މިރޭ ބޭއްވި ބައްދަލުވުމުގައި ދާންދޫ ދާއިރާގެ މެމްބަރު ޔައުގޫބް އަބްދުﷲ ވަނީ ޕަބްލިކް ސެކްޓާ އިންވެސްޓްމަންޓް (ޕީއެސްއައިޕީ) މަޝްރޫއުތަކަށް ބަޖެޓުކޮށްފައިވާ އަދަދުތަކަށް ބަދަލު ގެންނަން ހުށަހަޅާފަ އެވެ.
ޔައުގޫބްގެ ހުށަހެޅުއްވުމުގައި ބަޖެޓުން ޕީއެސްއައިޕީ ބައެއް މަޝްރޫއުތަކަށް ހުށަހަޅާފައިވާ އަދަދު މަދު ކުރުމަށާއި، ބައެއް މަޝްރޫއުތަކުގެ ސްކޯޕް ބަދަލުކޮށް މަޝްރޫއުތަކެއް އުނިކުރުމަށް ވަނީ ހިމަނާފަ އެވެ. އަދި ބަޖެޓަށް އިތުރު މަޝްރޫއުތަކެއް އިތުރުކުރުމަށް ވެސް ހުށަހެޅުއްވި އެވެ.
އަންނަ އަހަރަށް ލަފާކުރާ ޕީއެސްއައިޕީ ބަޖެޓުން އުނިކުރަން ޔައުގޫބް ހުށަހެޅި މަޝްރޫއުތަކުގެ ތެރޭގައި، ރައީސް ޑރ. މުހައްމަދު މުއިއްޒުގެ ބޯހިޔާވަހިކަމުގެ ވައުދު ފުއްދަން ހިއްކަން ނިންމި ފުށިދިއްގަރު ފަޅު ހިއްކުން ވެސް ހިމެނެ އެވެ. އެ މަޝްރޫއަށް 400 މިލިއަން ރުފިޔާ ހަރަދުކުަރަން ބަޖެޓަށް އޮތީ ހުށަހަޅާފަ އެވެ.
ޔައޫގޫބްގެ އެ ހުށަހެޅުއްވުމަށް، މަރަދޫ ދާއިރާގެ މެމްބަރު އިބްރާހިމް ޝަރީފް ތާއީދުކޮށް ވޯޓަށް އެހުމުން ކޮމިޓީން ވަނީ އެ ބަދަލުތައް ފާސްކޮށްފަ އެވެ.
ޔައުގޫބްގެ ހުށަހެޅުއްވުމާ އެއްގޮތަށް ޕީއެސްއައިޕީ ބަޖެޓަށް އިތުރުކުރި މަޝްރޫއުތަކަށް ހަރަދުވާނެ ކަމަށް ލަފާކުރަނީ 859 މިލިއަން ރުފިޔާ އެވެ.
ނަމަވެސް, ބައެއް މަޝްރޫއުތަކުގެ ބަޖެޓު ކުޑަކޮށް ފުށިދިއްގަރު ފަޅު ހިއްކުން ފަދަ ބައެއް މަޝްރޫއުތައް ޕީއެސްއައިޕީ ބަޖެޓުން އުނިކުރުމުން މުޅި ޕީއެސްއައިޕީ ބަޖެޓަށް އިރުވީ 248 މިލިއަން ރުފިޔާއެވެ. އެހެންކަމުން, މިހާރު ޕީއެސްއައިޕީ މަޝްރޫއުތަކަށް ބަޖެޓުކުރަން ހުށަހަޅާފައިވާ ޖުމްލަ އަދަދަކީ ގާތްގަނޑަކަށް 8.8 ބިލިއަން ރުފިޔާއެވެ.
