މިހާރު ކުރިއަށް ދާ ކޮންފަރެންސް އޮފް ދަ ޕާޓީސް ޓު ދަ ޔުނައިޓެޑް ނޭޝަންސް ފްރޭމްވޯކް ކޮންވެންޝަން އޮން ކްލައިމެޓް ޗޭންޖް (ކޮޕް-28) ސަމިޓުގައި މޫސުމަށް އަންނަ ބަދަލުތަކުގެ ސަބަބުން ލިބޭ ގެއްލުމަށް ބަދަލު ދޭން ނިންމުމުން ވަޒީރުން އެކަމަށް މަރުހަބާ ވިދާޅުވެއްޖެ އެވެ.
ދުބާއީގައި ކުރިއަށް ދާ ކޮޕް-28 ސަމިޓުގެ ފުރަތަމަ ދުވަހު މި ފަދަ މުހިންމު ނިންމުމެއް ނިންމެވީތީ މިނިސްޓަރ އޮފް ފޮރިން އެފެއާޒް މޫސާ ޒަމީރު އަދި މިނިސްޓަރ އޮފް ކްލައިމެޓް ޗޭންޖް، އެންވަރަންމަންޓް އެންޑް އެނާޖީ ތޯރިގު އިބްރާހިމް އެކަން ފާހަގަކުރައްވާ، އެއީ ނިންމެވި ވަރަށް މުހިންމު ނިންމެވުމެއް ކަމަށް ވިދާޅުވި އެވެ.
މިނިސްޓަރު ޒަމީރު ވިދާޅުވީ ލޮސް އެންޑް ޑެމޭޖް ފަންޑް ގާއިމްކުރުމަކީ ސަމިޓު ފެށުމަށްޓަކައި ކުރި ވަރަށް މުހިންމު މަސައްކަތެއް ކަމަށެވެ. އަދި މިއީ ރަނގަޅު މިސްރާބަކަށް އެޅި ފިޔަވަޅެއް ކަމަށް ވިދާޅުވި އެވެ.
މިނިސްޓަރު ތޯރިގު ވެސް ވިދާޅުވީ ސަމިޓުގެ ފުރަތަމަ ދުވަހު މި ފަދަ މުހިންމު ނިންމުމެއް ނިންމުމުން މޫސުމަށް އަންނަ ބަދަލުތަކާ ދެކޮޅަށް ކުރަމުންދާ މަސައްކަތް ދައްކުވައިދޭ ކަމަށެވެ. މި ފަންޑަކީ ރާއްޖެ ފަދަ ބިން ތިރި، ޖަޒީރާ ގައުމުތަކަށް ވަރަށް މުހިންމު ފަންޑެއް ކަމަށް އޭނާ ވިދާޅުވި އެވެ.
މޫސުމަށް އަންނަ ބަދަލުތަކުގެ ސަބަބުން ލިބޭ ގެއްލުމަށް ބަދަލު ދިނުމަށް ފަންޑެއް ގާއިމް ކުރުމަކީ މިދިޔަ އަހަރު ބޭއްވި ކޮޕް-27 ސަމިޓުގައި ނިންމި ނިންމުމެކެވެ. މި ފަންޑުން އެހީ ފޯރުކޮށް ދެމުން ދާނީ ދުނިޔޭގެ އެންމެ ފަގީރު އަދި އެންމެ ނާޒުކު ގައުމުތަކަށް މޫސުމަށް އަންނަ ކާރިސާތަކުގެ ސަބަބުން ލިބޭ ގެއްލުންތަކަށެވެ.
ފަންޑަށް ސަމިޓު ބާއްވާ ގައުމު ޔުނައިޓެޑް އެރެބް އެމިރޭޓްސް (ޔޫއޭއީ) އިން އަދި ޖަރުމަނުން 100 މިލިއަން ޑޮލަރު ދޭނެކަން ހާމަކުރި އެވެ. އަދި ޔޫކޭއިން 60 މިލިއަން ޕައުންޑް، ޔޫއެސްއިން 17.5 މިލިއަން ޑޮލަރު އަދި ޖަޕާނުން 10 މިލިއަން ޑޮލަރު ދޭނެކަން ހާމަ ކުރި އެވެ. ސަމިޓުގައި ބައިވެރިވާ ބޮޑެތި ގައުމުތަކުން އިއުލާން ކުރި އަދަދުތަކާއެކު ފަންޑުގެ ޖުމްލަ އަދަދު މިހާރު 429 މިލިއަން ޑޮލަރާ ގާތްކުރެ އެވެ.
މި ސަމިޓުގައި ރާއްޖޭގެ ފަރާތުން ރައީސް ޑރ. މުހައްމަދު މުއިއްޒު އަދި އިސް ފަންތީގެ ވަފުދެއް ބައިވެރިވެލައްވަ އެވެ. ސަމިޓުގައި ރައީސް ތަގްރީރު ކުރެއްވުމަށް ހަމަޖެހިފައިވެ އެވެ. ރައީސް ތަގްރީރު ކުރައްވާނީ ޑިސެމްބަރު 1، ވަނަ ދުވަހު ކަމަށް ރައީސް އޮފީހުން ބުނެ އެވެ.
