ރައްޔިތުންގެ މަޖިލީހުގައި ސަރުކާރު ތަމްސީލުކުރައްވަން އެންމެ މެމްބަރެއް އިންނަވާ ހާލަތު، ރާއްޖޭގެ ރައްޔިތުންގެ މަޖިލީހުގައި ފުރަތަމަ ފަހަރަށް މެދުވެރިވެއްޖެ އެވެ.
ރައީސް ޑރ. މުހައްމަދު މުއިއްޒުގެ ސަރުކާރު އުފެދުމާ އެކު މަޖިލީހުގެ ރިޔާާސަތުން އިއުލާނުކޮށްފައިވާ ގޮތުން މަޖިލީހުގައި ސަރުކާރު ތަމްސީލުކުރައްވާނީ އެމަނިކުފާނުގެ ޕީޕަލްސް ނެޝަނަލް ކޮންގްރެސް (ޕީއެންސީީ)ގެ މެމްބަރުންނެވެ. އެގޮތަށް އިއުލާނުކުރި އިރު މަޖިލީހުގައި ތިއްބެވީ އެ ޕާޓީގެ އެންމެ ދެ މެމްބަރުންނެވެ.
އެއީ ފެލިދޫ ދާއިރާގެ އޭރުގެ މެމްބަރު ފަޒުލް ރަޝީދާއި ތުލުސްދޫ ދާއިރާގެ މެމްބަރު އިބްރާހީމް ނަސީމެވެ.
ތުލުސްދޫ ދާއިރާގެ މެމްބަރު ނަސީމަކީ ވަކި ޕާޓީއަކަށް ނިސްބަތްނުވާ މެމްބަރެއްގެ ގޮތުގައި އިންތިހާބު ވުަމަށް ފަހު ދާދި ފަހުން ޕީއެންސީއާ ގުޅިވަޑައިގެންނެވި މެމްބަރެކެވެ.
އޭގެ ފަހުން އާބަންކޯގެ މެނޭޖިން ޑިރެކްޓަރުގެ މަގާމަށް ވަޑައިގެންނެވުމަށް ޓަކައި ފަޒުލް ވަނީ މަޖިލީހުން އިސްތިއުފާ ދެއްވައިފަ އެވެ. އެހެންވެ، މަޖިލީހުގައި ޕީއެންސީ މެމްބަރެއްގެ ގޮތުގައި މިހާރު އިންނެވީ ތުލުސްދޫ ދާއިރާގެ މެމްބަރު އިބްރާހީމް ނަސީމް އެކަންޏެވެ.
ރައީސް މުއިއްޒު ރައީސްކަމަށް އިންތިހާބުވެވަޑައިގެންނެވުމުގެ ކުރިން މަޖިލީހުގައި ޕީއެންސީގެ ފަސް މެމްބަރަކު ތިއްބެވި އެވެ. މުއިއްޒު ރައީސް ކަމަށް ނުކުމެވަޑައިގެންނެވި އިރު ރަނިން މޭޓަކަށް ހަމަޖެއްސެވީ އޭގެ ތެރެއިން އެއް މެމްބަރު ކަމަށް ވާތީ އެމަނިކުފާނު މަގާމުގެ ހުވާކުރެއްވުމާ އެކު މަޖިލީހުގައި ޕީއެންސީގެ މެމްބަރުންގެ އަދަދު ހަތަރަކަށް ތިރިވި އެވެ.
އެ ހަތަރު މެމްބަރުންގެ ތެރެއިން ދެ ބޭފުޅަކަށް މުއިއްޒު ވަޒީރުކަން ދެއްވި އެވެ. ދެން ތިއްބެވި ދެ މެމްބަރުންގެ ތެރެއިން ފަޒުލް ރަޝީދު މިހާރު ވަނީ އާބަންކޯގެ މެނޭޖިން ޑިރެކްޓަރަކަށް އައްޔަންކުރައްވައިފަ އެވެ. އެހެންވެ އޭނާ ވެސް ވަނީ މަޖިލީހުން އިސްތިއުފާ ދެއްވައިފަ އެވެ.
މަޖިލީހުގައި ކުރިން ތިއްބެވި ޕީއެންސީ މެމްބަރުން
- ފަރެސްމާތޮޑާ ދާއިރާގެ މެމްބަރު ޙުސައިން މުޙައްމަދު ލަތީފު ( ނައިބު ރައީސްކަމަށް އިންތިހާބުވެފައި)
- މަޑުއްވަރި ދާއިރާ އާދަމް ޝަރީފް (މިނިސްޓަރ އޮފް ސިޓީސް، ލޯކަލް ގަވަރންމަންޓް އެންޑް ޕަބްލިކް ވާރކްސްގެ މަގާމަށް އައްޔަންކޮށްފައި)
- މާވަށު ދާއިރާގެ މެމްބަރު މުހައްމަދު ސައީދު (މިނިސްޓަރ އޮފް އިކޮނޮމިކް ޑިވެލޮޕްމަންޓް އެންޑް ޓްރޭޑް ކަމަށް އައްޔަންކޮށްފައި)
- ފެލިދޫ ދާއިރާގެ މެމްބަރު އިބްރާހީމް ފަޒުލް ރަޝީދު ( އާބަންކޯގެ މެނޭޖިން ޑިރެކްޓަރުކަމަށް އައްޔަންކޮށްފައި)
ނަވާރަ ވަނަ ރައްޔިތުންގެ މަޖިލީހަށް އިންތިހާބުވެވަޑައިގެންނެވި އިރު ޕީއެންސީ/ޕީޕީއެމްގެ މެމްބަރުން އިންތިހާބުވެވަޑައިގެންނެވި އިރު އެ ދެޕާޓީ މަސައްކަތްކުރަމުން އައީ ކޯލިޝަނެއްގެ ގޮތުގަ އެވެ. އެހެންވެ މަޖިލީހުގައި ވެސް މަސައްކަތް ކުރަމުންދިޔައީ އެކުގަ އެވެ.
ރައިސް މުއިއްޒު ވަނީ ޕީޕީއެމްގެ ދެ މެމްބަރަކަށް ވެސް ވަޒީރުކަން ދެއްވައިފަ އެވެ. އެެއީ ނައިފަރު ދާއިރާގެ އޭރުގެ މެމްބަރު އަހުމަދު ޝިޔާމާއި ތ. ގުރައިދޫ ދާއިރާގެ މެމްބަރު މުހައްމަދު ގައްސާން މައުމޫނެވެ.
ޝިޔާމަކީ މިހާރު ފިޝަރީޒް މިނިސްޓަރެވެ. ގައްސާނަނީ ޑިފެންސް މިނިސްޓަރެވެ.
އެ ދެބޭފުޅުން ކެބިނެޓަށް އައްޔަން ކުރެއްވުމުން މަޖިލީހުގައި ޕީޕީއެމްގެ މެމްބަރުންގެ ގޮތުގައި ވެސް މިހާރު ތިއްބެވީ އެންމެ ދެ ބޭފުުޅުންނެވެ. އެއީ އޭދަފުށި ދާއިރާގެ މެމްބަރު އަހުމަދު ސަލީމް (ރެޑްވޭވް ސަލީމް) އާއި މަހިބަދޫ ދާއިރާގެ މެމްބަރު އަހުމަތު ތޯރިގް އެކަންޏެވެ.
އޭގެ އިތުރުން ފޮނަދޫ ދާއިރާގެ މެމްބަރު މޫސާ ސިރާޖު ވެސް އިންތިހާބުގެ ދެވަނަ ބުރުގެ ކުރިން ޕީޕީއެމަށް ސޮއިކުރެއްވި އެވެ. ނަމަވެސް, މަޖިލީހުގައި އެކަން ރަސްމީކޮށް އިއުލާނުކޮށްފައި ނުވެ އެވެ.
