ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިހާރު ތުރުކީ އަށް ކުރައްވަމުން ގެންދަވާ ދަތުރުފުޅަކީ، އެ ގައުމާއި، ރާއްޖެއާ ދެމެދު ގުޅުމާއި އެކުވެރިކަމުގެ އާ ރަން ބާބެއްގެ ފެށުމެއްކަމަށް ޔަގީންކުރައްވާ ކަމަށް ފޮރިން މިނިސްޓަރު މޫސާ ޒަމީރު ވިދާޅުވެއްޖެ އެވެ.
މިއީ މި މަހުގެ 17 ވަނަ ދުވަހު ރައީސްކަމާ ހަވާލުވެވަޑައިގެންނެވި މުއިއްޒު ބޭރު ގައުމަކަށް ކުރައްވާ ފުރަތަމަ ރަސްމީ ދަތުރުފުޅެވެ. ކުރިން ބެލެވިފައި އޮތީ އެމަނިކުފާނުގެ ފުރަތަމަ ދަތުރުފުޅު ކުރައްވާނީ ސައުދީ އަރަބިއްޔާ އަށް ކަމަށެވެ.
ތުރުކީގެ ރައީސް ރަޖަބް ތައްޔިބު އުރުދުޣާންއާ އެކު ރައީސް މުއިއްޒު ބޭއްވެވި ރަސްމީ މަޝްވަރާތަކާ ގުޅޭ ގޮތުން ޒަމީރު ކުރެއްވި ޓްވީޓެއްގައި ވިދާޅުވީ ރައީ ވަނީ ރާއްޖެ އާއި ތުރުކީއާ ދެމެދުގައި އެކި ދާއިރާތަކުން ގުޅުން ބަދަހިކުރުމާ ބެހޭގޮތުންނާއި، ފަތުރުވެރިކަމާއި، ވިޔަފާރީގެ ދާއިރާއާއި، އިންވެސްޓްމަންޓްތަކާއި، ޓެރަރިޒަމާ ދެކޮޅަށް މަސައްކަތްކުރުން ފަދަ ދާއިރާތަކުން ކުރިއަށް އޮތްތާނގައި ގުޅުން ބަދަހިކުރެވޭނެ ގޮތްތަކާ ބެހޭގޮތުން މަޝްވަރާކުރައްވާފައި ކަމަށެވެ.
"މިއީ ތުރުކީއާ އެކު ރާއްޖޭގެ ގުޅުމާއި އެކުވެރިކަމުގެ އާ ރަން ބާބެއްގެ ފެށުންކަން ޔަގީން،" ޒަމީރު ވިދާޅުވި އެވެ.
ތުރުކީގެ ވެރިރަށް އަންކާރާގެ ޕްރެޒިޑެންޝަލް ޕެލަސްގައި ކުރިއަށްދިޔަ ރަސްމީ ވާހަކަފުޅުގައި، ރައީސް ވަނީ ދެ ގައުމުގެ ދެމެދުގައި އޮތް ގުޅުން ވަރަށް ވަރުގަދަކަން ފާހަގަކުރައްވައިފަ އެވެ.
މި ގުޅުން އިތުރަށް ފުޅާކުރުމަށް ވިޔަފާރީގެ ދާއިރާ އާއި، އިންވެސްޓްމަންޓާއި، އިއާދަކުރަނިވި ހަކަތަ އާއި، މަތީ ތައުލީމުގެ ދާއިރާއިން ގުޅުން ބަދަހިކުރައްވާނެކަމުގައި ރައީސް ވިދާޅުވި އެވެ.
މީގެ އިތުރުން ރައީސް ވަނީ އިޖްތިމާއީ-އިގްތިސާދީ ތަރައްގީގެ އެކި ދާއިރާތަކުން ތުރުކީން ރާއްޖެއަށް ދެމުންދާ އެއްބާރުލެއްވުން ފާހަގަކުރައްވައި، އެކަމަށްޓަކައި ޝުކުރު އަދާކުރައްވައިފަ އެވެ.
ތުރުކީ އަކީ ދިވެހިންނަށް ވިސާ ފަހި ގައުމެކެވެ. އަދި އެ ގައުމުގެ ފްލެގް ކެރިއަރު ކަމަށްވާ ޓާކިޝް އެއާލައިން ރާއްޖެ އަށް ޝެޑިއުލް ދަތުރުތައް ކުރެ އެވެ. ފަހަކަށް އައިސް ވަރަށް ގިނަ ދިވެހިންގެ ޗުއްޓީ މަންޒިލަކަށް ވެސް ތުރުކީ ވަނީ ވެފަ އެވެ.
