ރައީސުލްޖުމްހޫރިއްޔާ ޑރ. މުހައްމަދު މުއިއްޒުއަށް ޕީއެންސީ/ޕީޕީއެމް ކޯލިޝަނުގެ ކުރީގެ ލީޑަރު އަދި ކުރީގެ ރައީސް އަބްދުالله ޔާމީން ނުގުޅުއްވައި، މެސެޖެއް ވެސް ނުކުރައްވާ ކަމަށް ވިދާޅުވެ ރައީސްގެ ސީނިއާ އެޑްވައިޒަރު އަބްދުއްރަހީމް އަބްދުالله ހެއްދެވީ އިތުރުފުޅެއް ކަމަށާއި އެކަމުގެ ހެކި އެބަހުރި ކަމަށް ޑރ. މުހައްމަދު ޖަމީލު އަހުމަދު ވިދާޅުވެއްޖެ އެވެ.
އޮންލައިން ނޫހަކަށް އަބްދުއްރަހީމް ދެއްވި އިންޓަވިއުއެއްގައި "އަދަދު" ގެ އެތެރެފުށް ޕުރޮގުރާމުގައި ޑރ، ޖަމީލު ދެއްކެވި ވާހަކަތަކަށް ރައްދު ދެއްވަމުން އަބްދުއްރަހީމް ވިދާޅުވީ ރައީސް ޔާމީން ގެއަށް ބަދަލު ކުރެއްވި ފަހުން ރައީސް މުއިއްޒުއަށް ނުވެސް ގުޅުއްވާ ކަމަށާއި މެސެޖެއް ވެސް ނުކުރައްވާ ކަމަށެވެ.
އެ ވާހަކަތަކަށް ރައްދު ދެއްވައި އެކްސްގައި ޖަމީލު ކުރެއްވި ޕޯސްޓެއްގައި ވިދާޅުވީ ރައީސް ޔާމީން ގެއަށް ބަދަލު ކުރެއްވި ދުވަސް ނޫން އަނެއް ދުވަހު އިންތިހާބީ ރައީސްގެ މަގާމުގައި އޭރު ހުންނެވި، ރައީސް މުއިއްޒުއަށް ޔާމީން މެސެޖު ކުރެއްވި ކަމަށެވެ.
"އޮކްޓޯބަރު 2 ގެ 21:43 ގައި ރައީސް ޔާމީން، ޑރ. މުއިއްޒުއަށް "މުއިއްޒު ޕްލީޒް ކޯލް މީ" މިހެން ޖައްސަވައި ފޮނުވި މެސެޖު ޑރ. މުއިއްޒު ބައްލަވައި ޖަވާބެއް މިއަދާ ހަމައަށް ވެސް ނުދެއްވާ. މިމެސެޖް އެބައޮތް،" ޖަމީލުގެ ޕޯސްޓުގައި ބުނެފައިވެ އެވެ.
ރައީސް ޔާމީން ނުގުޅުއްވައި މެސެޖެއް ވެސް ނުކުރައްވާ ކަމަށް ވިދާޅުވެ އަބްދުއްރަހީމް ރައްޔިތުންނަށް އޮޅުވައިލަނީ ކީއްވެ ކަމެއް ވިސްނިވަޑައި ނުގަންނަވާ ކަމަށް ވެސް ރައީސް ޔާމީނުގެ އިސް ގާނޫނީ ވަކީލު، ޖަމީލު ވިދާޅުވި އެވެ.
"އަޅުގަނޑަކަށް ނުވިސްނޭ އަޚު އަބުދުއްރަހީމް މިގޮތަށް ރައްޔިތުންނަށް އޮޅުވާލައްވަނީ ކީއްވެ ކަމެއް. ހުދު ދެ ޕާޓީ ހިންގެވެމާއި ހަވާލުވެ ހުންނަވައި [އަބްދުއްރަހީމް] ރ. ޔާމީނު ގެއަށް ބަދަލުވުމަށްފަހު އެމަނިކުފާނާ ހަމައަށް ވަޑައިނުގަތީ ކީއްވެތޯ؟" ޖަމީލު ސުވާލު ކުރައްވައިފައިވެ އެވެ.
އަބްދުއްރަހީމް އާއި ޖަމީލްއާ ދެމެދު ބަހުގެ ހަމަލާތަކެއް ބަދަލު ކުރަމުން މިދަނީ ޕީއެންސީ/ޕީޕީއެމް ތެރޭގައި އުފެދުނު ހިޔާލުތަފާތުވުންތަކަށް ފަހު އެމަނިކުފާނު ޕީޕީއެމުން ވަކިވެވަޑައިގަތުމާ ގުޅިގެންނެވެ.
ރައީސް ޔާމީންގެ ފަރާތްޕުޅުން ވާހަކަ ދައްކަވަމުން ގެންދަވާ ޖަމީލު ވިދާޅުވީ ރައީސް ޔާމީން އަމިއްލަ ޕާޓީ ދޫކުރައްވައި ވަޑައިގެންނެވީ ޕްރޮގުރެސިވް ކޯލިޝަނުގެ ލީޑަރުޝިޕުން ރައީސް ޔާމީނަށް ހިޔާނާތްތެރިވުމުން ކަމަށެވެ.
ޕީޕީއެމުން ވަކިވެވަޑައިގަތުމަށްފަހު ރައީސް ޔާމީން އިސްކޮށް ހުންނަވައި ޕީޕަލްސް ނެޝަނަލް ފްރަންޓުގެ ނަމުގައި އައު ސިިޔާސީ ޕާޓީއެއް އުފެއްދެވުމުގެ މަސައްކަތް ދަނީ ކުރައްވަމުންނެވެ. އެ މަސައްކަތުގައި އެންމެ އިސްކޮށް އުުޅުއްވަނީ ޖަމީލް އާއި ކުރީގެ މިނިސްޓަރު މުހައްމަދު މަލީހު ޖަމާލް އެވެ.
ރައީސް ޔާމީންގެ އައު ސިޔާސީ ޕާޓީ ރެޖިސްޓަރީ ކުރުމުގެ ހުއްދައަކަށް މާދަމާ އެދޭނެ ކަމަށް ވަނީ އިއްޔެ ވިދާޅުވެފަ އެވެ.
