އިސްލާމިކް ޔުނިވާސިޓީ މޯލްޑިވްސް (އައިޔޫއެމް)ގެ އަންނަ އަހަރަށް ކަނޑައަޅާ ބަޖެޓަށް 15 މިލިއަން ރުފިޔާ އިތުރުކޮށްދޭނެ އެދިއްޖެ އެވެ.
މިއަދު ބޭއްވި ރައްޔިތުންގެ މަޖިލީހުގެ ބަޖެޓު ކޮމެޓީ ބައްދަލުވުމަށް ވަޑައިގެން އައިޔޫއެމްއިން ވިދާޅުވީ، 2024 އަށް ލަފާކުރާ ބަޖެޓުގައި އެ ޔުނިވާސިޓީއަށް ކަނޑައަޅާފައި ވަނީ އެކަށީގެންވާ ބަޖެޓެއް ނޫން ކަމަށެވެ. އައިޔޫއެމްއަށް ބަޖެޓުގައި ކަނޑައަޅާފައި ވަނީ 60 މިލިއަން ރުފިޔާ އެވެ.
"އަންނަ އަހަރަށް ލަފާކުރާ ބަޖެޓުގައި ކަނޑައަޅާފައިވާ 60 މިލިއަން ރުފިޔާގެ ތެރެއިން 57 މިލިއަން ރުފިޔާވަރު އެބަ ހޭދަވޭ މުސާރަ އާއި، ޔުޓިލިޓީސް އާއި، ހުރިހާ ކޮމިޓްމެންޓުތަކާ އެކީގައި. ގާތްގަނޑަކަށް ކެޕިޓަލް ނުވަތަ އިންވެސްޓުމެންޓުތަކަށް މިއޮތީ ގާތްނޑަކަށް ދެ މިލިއަނެއްހާ ރުފިޔާ," އައިޔޫއެމްގެ ވައިސް ޗާންސެލާ ޑރ. އަލީ ޒާހިރު ވިދާޅުވި އެވެ.
އައިޔޫއެމްގެ ފަރާތުން ބަޖެޓަށް އިތުރުކުރުމަށް ހުށަހެޅީ 15 މިލިއަން ރުފިޔާ އެވެ. އޭގެ ތެރެއިން 10 މިލިއަން ރުފިޔާ އަކީ އަތޮޅުތެރޭގެ ކެމްޕަސްތައް ގާއިމުކުރުމަށް ހިމަނަން އެދިފައިވާ ފައިސާ އެވެ. މި ހުށަހެޅުމާއެކު މަރަދޫ ދާއިރާ މެންބަރު އިބްރާހިމް ޝަރީފް ވަނީ އަންނަ އަހަރުގެ ބަޖެޓުގައި ހިމަނައިގެން އެކަން ކުރުމަކީ ކޮންމެހެން މުހިންމުކަމެއްތޯ ސުވާލުކޮށްފަ އެވެ.
ޖަވާބުގައި އައިޔޫއެމްގެ ބޭފުޅުން ވަނީ އަތޮޅުތެރޭގެ ކޯސްތައް ހިންގުމުގައި މިހާރު ދިމާވާ ޖާގަ އަދި ތަނުގެ ދަތިކަން ފާހަގަކޮށްފަ އެވެ.
މިހާރުވެސް އެ ޔުނިވާސިޓީގެ ކޯސްތައް އަތޮޅުތެރޭގައި ހިންގަނީ ސްކޫލެއް ނުވަތަ ސަރުކާރުގެ އެހެން އިމާރާތެއްގައި ކަމަށާއި، ބޭނުންވާ ގަޑިތަކަށް އެތަންތަން ނުލިބި ޝެޑިއުލާ އެއްގޮތަށް ކޯސްތައް ނުގެންދެވޭ ކަމަށް ވިދާޅުވި އެވެ.
މި ބައްދަލުވުމުގައި އައިޔޫއެމްގެ ޑެޕިއުޓީ ވައިސް ޗާންސެލާ ޑރ. ދީބާ މޫސާ ވިދާޅުވީ ރިސާޗުކުރުމުގެ މަސައްކަތަށް އިތުރު ބަޖެޓު ބޭނުންވާ ކަމަށެވެ. ކޮންމެ އަހަރަކު ރިސާޗު ކުރުމަށް ކަނޑައަޅާ ބަޖެޓު ކެނޑިގެން ދާ ކަމަށާއީ، ޔުނިވާސިޓީގެ ޓްރަސްޓު ފަންޑުން އެކަމަށް ދެމުން އަންނަ ތިން ލައްކަ ރުފިޔާ އަކީ ކުޑަ އަދަދެއް ކަމަށް އޭނާ ފާހަގަކުރެއްވި އެވެ.
"ފާއިތުވި ތިން އަހަރު ރިސާޗުކުރުމަށް ޓްރަސްޓު ފަންޑުން ލިބެމުން ފައިސާގެ ތެރެއިން ދެ ލައްކަ ރުފިޔާ އަޅުގަނޑުމެންގެ ކޮންފަރެންސަށް އެބަ ހޭދަވޭ. ދެން ރިސާޗު ގްރާންޓު ދިނުމަށް ބާކީ އޮންނަނީ އެއްލައްކަ ރުފިޔާ" ދީބާ ވިދާޅުވި އެވެ.
ފާއިތުވި އަހަރަށް ލަފާކުރި ބަޖެޓުގައި ހިމަނާފައިވާ އަދަދު މަދުވެ، އައިޔޫއެމްއިން އެދިގެން 14 މިލިއަން ރުފިޔާ އިތުރުކޮށްދިނެވެ. މިއަހަރަށް ލަފާކުރި ބަަޖެޓުގައި ވެސް ދެ މިލިއަން ރުފިޔާ އިތުރުކޮށްދިނެވެ. ބަޖެޓަށް ބޮޑު ބަދަލެއް ގެނެސްފައި ވަނީ ނިމިގެންދިޔަ ސަރުކާރުގައި ލެކްޗަރާއިންގެ މުސާރައަށް ގެނައި ބަދަލުތަކާއި ގުޅިގެންނެވެ.
