މާލެ ސިޓީ ކައުންސިލުގެ މޭޔަރު ކަމުން ޒިންމާތަކާ, ރައީސް ޑރ. މުހައްމަދު މުއިއްޒު ދުރުވެވަޑައިގެންނެވި ފަހުން އެ ކައުންސިލުގެ ޖަލްސާތައް ނުބޭއްވޭ މައްސަލަ ބޮޑުވެއްޖެ އެވެ.
ރިޔާސީ އިންތިހާބު ކާމިޔާބު ކުރެއްވުމަށްފަހު ރައީސް މުއިއްޒު, މާލޭގެ މޭޔަރު ކަމުގެ މަސްއޫލިއްޔަތުތައް, ޑެޕިއުޓީ މޭޔަރު އަހުމަދު ނަރީޝްއާ ހަވާލުކުރެއްވީ އޮކްޓޯބަރު މަހުގެ ހަތަރެއްގައި ބޭއްވި އެ ކައުންސިލުގެ ޖަލްސާއެއްގަ އެވެ.
އޮކްޓޯބަރު ހަތަރެއްގެ ފަހުން, ސިޓީ ކައުންސިލުގެ ޖަލްސާއެއް ބާއްވާފައި ވަނީ ނޮވެމްބަރު ދެ ވަނަ ދުވަހު އެވެ. އެ ދެމެދުގައި ތާވަލު ކުރި ޖަލްސާތައް އަދި ނޮވެމްބަރު ދޭއްގެ ފަހުން ތާވަލު ކުރި ޖަލްސާތައް ކެންސަލް ކުރަން ޖެހުނީ ކޯރަމް ހަމަ ނުވުމުގެ ސަބަބުންނެވެ.
އާ ސަރުކާރުގެ މަގާމުތަކާ ހަވާލުވެވަޑައިގެެންނެވުމަށް މާލެ ސިޓީ ކައުންސިލުން ތިން މެންބަރުން ވަކިވެވަޑައިގެންނެވުމުން މިވަގުތު އެ ކައުންސިލުގައި ތިއްބެވީ 15 މެންބަރުންނެވެ. އެހެންކަމުން ކޯރަމް ހަމަވާން ބޭނުންވަނީ އަށް މެންބަރުންނެވެ. އެހެން ނަމަވެސް މިއަދު ތަވަލުކޮށްފައިވާ ޖަލްސާއަށް ވެސް ވަޑައިގެންނެވީ ފަސް މެންބަރުން ކަމަށް މައުލޫމާތު ލިބެ އެވެ.
މާލެ ސިޓީ ކައުންސިލުގެ ޖަލްސާތައް ނުބޭއްވި, ކައުންސިލް ހުއްޓިފައި އޮތުމުގެ ކަންބޮޑުވުން ފާޅުކޮށް އެ ކައުންސިލުގެ މެންބަރު މުހައްމަދު ސައިފު ފާތިހު ވަނީ ކަންބޮޑުވުން ފާޅުކުރައްވާ, ކައުންސިލުގެ މަސައްކަތް ހިންގޭނެ ގޮތަކަށް މެންބަރުންނަށް ބާރު އެޅުމަށް ސަރުކާރަށް ގޮވާލާފަ އެވެ.
"މޭޔަރު [ރައީސް މުއިއްޒު] ހުންނެވިއިރު, މޭޔަރު ވަރަށް ބާރު އަޅުއްވައިގެން މިތަނުގެ ކަންތައްތައް ހަމަޖައްސަވާ ކޯރަމް ހަމަކުރައްވަނީ," ސައިފް ވިދާޅުވި އެވެ.
އޭނާ ވިދާޅުވި ގޮތުގައި މެންބަރުން ވަޑައިނުގެންނެވި ނަމަވެސް, ޖަލްސާތައް އެޖެންޑާ ކުރައްވާ, ޖަލްސާތަކުގެ ރިޔާސަތު ބެލެހެއްޓެވުމުގެ މަސްއޫލިއްޔަތު ޑެޕިއުޓީ މޭޔަރު އަދާ ކުރައްވަމުން ގެންދަވާ ކަމަށެވެ.
ސައިފް ވިދާޅުވީ އާ ސަރުކާރުގެ 100 ދުވަހުގެ ވައުދުތަކުގެ ތެރޭގައި ވެސް, އެ ކައުންސިލުން ސަރުކާރަށް އެހީވެގެން ކުރަންޖެހޭ ކަންތައްތައް އެބަހުރި ކަމަށާއި, ކައުންސިލުގެ ޖަލްސާތައް ނުބޭއްވުމުގެ ސަބަބުން އެ ކަންތައްތައް ވެސް ނުކުރެވޭ ކަމަށެވެ.
"ސަރުކާރުގެ މެންބަރުންގެ ހައިސިއްޔަތުން އެންމެ ބޮޑު ތާއިދެއް އެ ބޭފުޅުންނަށް ދެއްކޭނީ އިންތިހާބީ މަސްއޫލިއްޔަތާއި މަގާމު އަދާ ކުރެއްވިގެން. މިއީ ޕްލެޓްފޯމެއް ނޫންތީ ސަރުކާރު ޕްރޮމޯޓު ކުރަން ވެސް," އޭނާ ވިދާޅުވި އެވެ.
މާލެ ސިޓީ ކައުންސިލުގެ ރަސްމީ އާންމު ޖަލްސާއެއް ކޮންމެ ހަފްތާއެއްގައި ބޭއްވުމަކީ އެއީ ގާނޫނީ ގޮތުން ކުރަން ޖެހޭ ކަމެކެވެ.
ސިޓީ ކައުންސިލުގެ ބައްދަލުވުންތައް ނުބޭއްވޭ ކަމުގެ މައްސަލަ މީގެ ކުރިން ވެސް ވަނީ ފެންމަތިވެފަ އެވެ.
