އިޒްރޭލުގެ ޕާސްޕޯޓު ބޭންކޮށް، އެ ގައުމުގެ ފަތުރުވެރިން ރާއްޖެ އައުން މަނާކުރުމަށް ދިވެހި ސަރުކާރަށް ލަފާ އެރުވުމަށް ރައްޔިތުންގެ މަޖިލީހުގެ ހާރިޖީ ގުޅުންތަކުގެ ކޮމިޓީން ނިންމާފައިވާ ނިންމުމާ ގުޅޭގޮތުން ރައީސުލްޖުމްހޫރިއްޔާ ޑރ. މުހައްމަދު މައިއްޒު ވަކި ގޮތެއް އަދި ނިންމާފައި ނުވާ ކަމަށް ރައީސް އޮފީހުގެ އަންޑާ ސެކެރެޓަރީ ފޯ ޕަބްލިކް ޕޮލިސީ، މުހައްމަދު ފިރުޒުލް ވިދާޅުވެއްޖެ އެވެ.
އާ ސަރުކާރު ހުވާ ކުރެއްވުމަށްފަހު ބޭއްވި ފުރަތަމަ ނޫސްވެރިންގެ ބައްދަލުވުމުގައި ވާހަކަ ދައްކަވަމުން ފިރުޒުލް ވިދާޅުވީ ކޮމިޓީން ލަފާ ދޭން ނިންމި ނިންމުމާ ގުޅޭގޮތުންނާއި އެފަދަ އެހެން މައްސަލަތަކާ ގުޅޭގޮތުން ރައީސް މުއިއްޒު ގޮތެއް ނިންމަވާނީ ދިވެހިންގެ އިސްލާމީ ޝަހުސިއްޔަތާއި ދިވެހިންގެ މަސްލަހަތަށް ވިސްނަވާފައި ކަމަށެވެ.
"މިކަމުގައި އަޅުގަނޑުމެންގެ ސްޓޭންޑު ވަރަށް ސާފު، ފަލަސްތީނުގެ ރައްޔިތުންނާ ދެކޮޅަށް މިވަގުތު ހިނގަމުން އެދާ ކަންތައްތަކަކީ އެއީ ގަތުލުއާއްމެއް، އެކަންކަން ވަގުތުން ހުއްޓާލަންޖެހޭ،" ފިރުޒުލް ވިދާޅުވި އެވެ.
އިޒްރޭލުން ހިންގަމުން ދަނީ ގަތުލުއާއްމެއް ކަމަށް ސިފަ ކުރައްވައި ފިރުޒުލް ވިދާޅުވީ އަބަދުވެސް ދެމިތިބޭނީ ފަލަސްތީނުގެ މުސްލިމު އަހުންނާއި އުހުތުންނާ އެކުގައި ކަމަށެވެ.
އިޒްރޭލު ފަތުރުވެރިން ރާއްޖެ ނާދެވޭ ގޮތަށް އިމިގުރޭޝަންގެ ގާނޫނަށް އިސްލާހެއް ވެސް މިއަދު ވަނީ ނޮޅިވަރަމް ދާއިރާގެ މެމްބަރު، މުހައްމަދު ނަޝީދު އަބްދުﷲ ހުށަހަޅައިފަ އެވެ. އެ ބިލު ފާސްކޮށް ތަސްދީގު ކުރާ ހިސާބުން ރާއްޖެއަށް އިޒްރޭލު ފަތުރުވެރިންނަށް އެތެރެވުން އެއީ ގާނޫނީ ކުށަކަށް ވާނެ ކަމަށެވެ.
