އިއްޔެ އަހަރީ ރައީސް އިބްރާހިމް މުހައްމަދު ސޯލިހުގެ ފަސް އަހަރުގެ ވެރިކަމުގެ އެންމެ ފަހު ދުވަހެވެ. މިއަދު އާ ރައީސް ޑރ. މުހައްމަދު މުއިއްޒު ހުވާ ކުރައްވާނެ އެވެ.
ނިމިގެން މިދާ ސަރުކާރުގެ ކާމިޔާބުގެ ވާހަކަ ދައްކާއިރު، 2018 ވަނަ އަހަރުގެ ނޮވެމްބަރު 17 ވަނަ ދުވަހުގެ ކުރިޔަށް ހަނދާނުގެ ޓޭޕް އޮޅާލުމަށް ފަހު ދެން ފަށާށެވެ. އޭރު އޮތް ބިރުވެރިކަމުންގެ މަންޒަރުތައް ކުލަކޮށް ސިފަވަމުންދާނެ އެވެ. ތަފްސީލުކޮށް އެ ވާހަކަތައް ނުލިޔުނަސް، އޭރު ސިޔާސީ ހުރިހާ ލީޑަރުންނާއި ގިނަ އަދަދެއްގެ އެކްޓިވިސްޓުން ތިބީ ޖަލުގަ އެވެ. ނުވަތަ އަރުވާލެވިގެން ރާއްޖޭން ބޭރުގަ އެވެ. ގާނޫނު އަސާސީން ކަށަވަރުކޮށްދީފައިވާ ހައްގުތައް އޮތީ އަނދަގޮނޑި ޖަހައިފަ އެވެ.
ހިޔާލުފާޅުކުރަން ނުކުންނަ މީހުން ޖަލަށްލައި، ނޫސްވެރިންނަށް ބިރުދައްކައި، ދައުވާކޮށް، ބޮޑެތި އަދަދުތަކުން ދިޔައީ ޖޫރިމަނާ ކުރަމުންނެވެ. ސަރުކާރާ ނުރުހޭ ނަމަ އެ ވިޔަފާރިވެރިޔަކަށް ހުރަސްތައް ކުރިމަތި ކުރުވަ އެވެ.
އޭރު ވިސްނައިދީފައި އޮތީ ތަރައްގީ ގެނެވޭނީ ހައްގުތައް ހަނިކޮށްގެން ކަމަށެވެ. ނަމަވެސް ރައީސް ސޯލިހުގެ ވެރިކަމުގައި އެ ވިސްނުން ބަދަލު ކުރުވައިފި އެވެ. ހައްގުތަކާއި މިނިވަންކަން ލިބި، ސަރުކާރަށް ފާޑުކިޔަމުން ދާއިރު ވެސް، މުޒާހަރާކުރަމުން ދާއިރު ވެސް، އިދިކޮޅު މީހުން ޖަލުގައި ބަންދުކޮށްގެން ނުގެންގުޅެ ތަރައްގީ ވެސް ގެނެވޭނެކަން ރައީސް ސޯލިހުގެ ސަރުކާރުން ދައްކުވައިދީފި އެވެ. ފިކުރު ދިމާ ނުވުމަކީ ބިރެއް، ބިރު ދެއްކުމެއް އޮތް ކަމެއް ނޫންކަން ވޭތުވެދިޔަ ފަސް އަހަރު އިހުސާސް ކުރެވުނެވެ. ސޯލިހުގެ ކާމިޔާބުގައި އެންމެ ގަދަކޮށް ފެވޭނީ ހަމަނުޖެހުމުން ހަމަޖެހުން ގެނުވުމެވެ.
މުހިއްމު ބައެއް ލިޔުމާއި ހަބަރު
ދުވަހުގެ ފޮޓޯ
އަށް ވަނަ ރައީސުލްޖުމްހޫރިއްޔާ ހުވާކުރެއްވުމުގެ ރަސްމިއްޔާތުގެ މިއަދު ބޭއްވުމުގެ ކުރިން އިއްޔެ ބޭއްވި އެންމެ ފަހުގެ ރިހާސަލަށް އާ ރައީސް ޑރ. މުހައްމަދު މުއިއްޒު ވަޑައިގެން، ޕޯޑިއަމް ކައިރީގައި. -- ފޮޓޯ: މަޖިލީހުގެ އިދާރާ
