މީގެ 75 އަހަރު ކުރިން ފަލަސްތީނުގެ ގަދީމީ ބިންތަކަށް ވެރިވެގަތް އިޒްރޭލުގެ ސަހްޔޫނީން މިހާރު އެންމެ ބޮޑަށް ކުރާ ދައުވާއަކީ ފަލަސްތީނަކީ އެއްވެސް ދުވަސްވަރެއްގައި ގައުމެއް ނޫން ކަމަށެވެ.
ނަމަވެސް، ފަލަސްތީނުގެ ބިންތަކުން އޭރު ގަދަކަމުން ބޭލި މީހުން އަދިވެސް ދުނިޔޭގައި އެބަތިއްބެވެ. އޭގެ އެތައް ދަހަރެއް ކުރީގެ ފައިސާ ފޮތިތަކާއި ލިޔެކިޔުންތަކުގެ އިތުރުން ފޮޓޯތަކާއި ވީޑިއޯތައްވެސް ސޯޝަލް މީޑިއާގައި އަބަދުވެސް ދައުރުވެ އެވެ. ހާއްސަކޮށް މިހާރު މިދޭ ފަދަ ހަމަލާތައް ދޭ ދުވަސްވަރެއްގަ އެވެ. ހަތް ދަހަރުވީ ގަތުލުއާއްމު ވަރުގަދަ ކުރާ ދުވަސްވަރު އެވެ.
އެގޮތުން އިއްޔެ ރާއްޖޭގެ ސޯޝަލް މީޑިއާގައި މިފަދަ ވަރަށް ހާއްސަ ޑޮކިއުމެންޓެއް ދައުރުވި އެވެ. ކުރީގެ ޖަސްޓިސް މިނިސްޓަރު މުހައްމަދު މުއިއްޒު އަދުނާން ހިއްސާކުރެއްވީ ފަލަސްތީނުން ރާއްޖެއަށް ފޮނުވި ޕޯސްޓު ކާޑެކެވެ. މީގެ 94 އަހަރު ކުރިން 1929 ގައި ފަލަސްތީނުގެ މުގައްދަސް ބިމުން އެ ކާޑު ފޮނުއްވީ އަލް އަމީރު އަބްދުލް މަޖީދު ރަންނަބަނޑޭރި ކިލޭގެފާނެވެ.
ރާއްޖޭގެ ކުރީގެ ރަދުން ރަންނަބަނޑޭރި ކިލޭގެފާނު ފަލަސްތީނުގެ ގުދުސްގައި ހުންނަވައި އެ ޕޯސްޓު ކާޑު ފޮނުއްވީ މާލޭގައި ހުންނެވި ރާއްޖޭގެ އޭރުގެ އުއްތަމަ ފަނޑިޔާރުމަނިކުފާނު ހުސެއިން ސަލާހުއްދީނަށެވެ. އެއީ މުއިއްޒުގެ އިތުރުން މިހާރުގެ އުއްތަމަ ފަނިޔާރު އަލްްއުސްތާޒް މުއުތަސިމް އަދުނާނުގެ ކާފާފުޅެވެ.
މިއީ، އިޒްރޭލުގެ ދައުލަތުން އެ ކުރާ ދައުވާ ދޮގުކުރާ ކުޑަކުޑަ ހެއްކެކެވެ. ރާއްޖެއާއި ދުނިޔޭގެ ތާރީހުގައި މިފަދަ އެތައް ހެއްކެތް އެބަހުއްޓެވެ. އެގޮތުން 1930 ގެ ކުރެހުންތަކާއި މެޕުތަކާއި 1927 ގެ ވަކިލާރި ވެސް ހުރީ ފެންނާށެވެ.
ނަމަވެސް، އިޒްރޭލާއި ހުޅަނގުގެ ބާރުތަކުން އަންނަނީ، އިޒްރޭލުގެ މި ދައުވާގެ މައްޗަށް މާޒީގެ ލިޔުންތައް އަނބުރާލާ، ތާރީހު އޮޅުވާލުމުގެ ބޮޑެތި މަސައްކަތްތަކެއް ކޮށްފަ އެވެ.
މިދިޔަ މަހުގެ ހަތަކުން ފެށިގެން މިއަދާ ހަމައަށް ދެމުންދާ ހަމަލާތަކުގެ މައިގަނޑު ބޭނުމަކީވެސް މިއީ އެވެ. އެ ކުރަމުންދަނީ މިހާރު ވެރިވެނުގަނެވި ހުރި ބިންތަކަށްވެސް ވެރިވެގަނެ ދުނިޔެއިން ފަލަސްތީނު ގެއްލުވާލުމުގެ މަސައްކަތެވެ. ނަސްލު ނައްތާލުމުގެ މުޑުދާރު އަމަލެވެ.
