އެހީ ލިބުން ދަތިވެ، އުތުރު ގާޒާއިން މުޅިހެން ފުށް ހުސްވެ އެ ސަރަހައްދުގެ ބޭކަރީތައް ބަންދުކުރަން މަޖުބޫރުވެއްޖެ އެވެ.
މިދިޔަ މަހު ހަތެއްގައި އިޒްރޭލުން ހަނގުރާމަ އިއުލާނުކޮށް ވޭތުވެދިޔަ ހަތް ދަހަރުގައި އިޒްރޭލުން ހިންގަމުންދާ ގަތުލުއާންމު ވަރުގަދަކޮށް ދެމުންދާ ހަމަލާތައް އެންމެ ބޮޑަށް އަމާޒުވަމުންދަނީ އުތުރު ގާޒާ އަށެވެ.
ހާއްސަކޮށް ބޭކަރީތަކާއި ކާއެއްޗެހީގެ ހިދުމަތްދޭ އެހެން ތަންތަނަށް އަމާޒުކޮށް އިޒްރޭލުން ވަނީ ގިނަ ހަމަލާތަކެއް ދީފަ އެވެ. އެ ހަމަލާތަކުގެ އިތުރުން ބޭކަރީތައް ބަންދުކުރަން މަޖުބޫރުވި އަނެއް ދެ ސަބަބަކީ ތެލާއި ފެނުގެ ދަތިކަން ކަމަށް އދ. ގެ އޮފިޝަލުން ގަތަރުގެ އަލް ޖަޒީރާއަށް ބުނެފައިވެ އެވެ.
"އުތުރު ގާޒާއިން ގުދަން ފުށް މުޅީންހެން ވަނީ ހުސްވެފަ، ވޭތުވެދިޔަ ހަތް ދުވަހު އެހީގެ ޖަމާއަތްތަކަށް އެ ސަރަހައްދަށް ކާއެއްޗެއްސާއި އެހީގެ އެއްވެސް އެއްޗެއް ފޯރުކޮށްދެވޭ ގޮތް ވަނީ ނުވެފަ" އދ. އިން ބުނެފައިވެ އެވެ.
ދެކުނުގައިވެސް މިވަގުތު ހިދުމަތް ދެވޭ ހާލަތުގައި ހުރީ އެންމެ ހަތް ބޭކަރީ އެވެ.
އިޒްރޭލުން މިހާރު ވަނީ އުތުރު ގާޒާ ހުސްކޮށް، އެ ސަރަހައްދުގައި ދިރިއުޅޭ މިލިއަނެއްހާ މީހުން ދެކުނަށް ބަދަލުވާން އަންގާފަ އެވެ.
އެއާއެކު އުތުރު ގާޒާގައި ދިރިއުޅޭ ބައެއް މީހުން ދެކުނަށް ބަދަލުވި ނަމަވެސް، އެ ސަރަހައްދަށްވެސް އިޒްރޭލުން ހަމަލާ ދިނުމާ އެކު އެ މީހުންގެ ތެރެއިން ގިނަ މީހުންވެސް ވަނީ އަނބުރާ އުތުރަށް ބަދަލުވެފަ އެވެ.
އިޒްރޭލުން އުތުރު ގާޒާއަށް އެއްގަމު މަގުން ވަނުމަށް މަސައްކަތް ފެށިތާ ހަފުތާއެއް ވެފައިވާއިރު، އުއްމީދުކުރި ވަރުގެ ކުރިއެރުމެއް ވަނީ ނުލިބިފަ އެވެ. އެ މަސައްކަތުގައި ހަމާސް ޖަމާއަތާ ދެމެދު ބަދަލުކުރި ހަމަލާތަކުގައި މަރުވި އިޒްރޭލު ސިފައިންގެ އަދަދު ވަނީ 100 އާ ގާތަށް ގޮސްފަ އެވެ.
ނިމުނު 33 ދުވަހުގެ ތެރޭގައި އިޒްރޭލުން ދިން ހަމަލާތަކުގައި ފަލަސްތީނުން ޝަހީދުވި މީހުންގެ އަދަދު ވަނީ 10،000 އަށްވުރެ މައްޗަށް ގޮސްފަ އެވެ. އޭގެ ތެރޭގައި 4،500 އަށްވުރެ ގިނަ ކުޑަކުދިން ހިމެނެ އެވެ.
