ނުރައްކާތެރި ކެމިކަލް މާއްދާތައް ކަމަށްވާ "ޑައިއެތިލީން ގްލައިކޯލް" އަދި "އެތިލީން ގްލައިކޯލް" ހުރި ސިޓްރިޒެން ދިޔާ ބޭހެއްގެ ބެޗެއް ރާއްޖެއިން ފެނިފައިވާތީ އެ ބޭހުގެ ރައްކާތެރިކަން ކަށަވަރު ކުރެވެންދެން ބޭނުންކުރުމާއި ވިއްކުން މަނާކޮށްފި އެވެ.
ޕެރެސެޓަމޯލް އާއި ކެއްސުމާއި ރޯގާއަށް ބޭނުން ކުރާ ބައެއް ވައްތަރުގެ ދިޔާ ބޭހުގައި މި ނުރައްކާތެރި މާއްދާތައް ހިމެނޭތީ, ދުނިޔޭގެ ބައެއް ގައުމުތަކުގައި ވަނީ ކުޑަކުދިންތަކެއް މަރުވެފަ އެވެ. އެކަމާ ގުޅިގެން ޑަބްލިއުއެޗްއޯ އިން ނެރެފައިވާ އެލާޓްތަކާ ގުޅިގެން ރާއްޖެއިން ވެސް ދަނީ ރެންޑަމްކޮށް މާކެޓުގައި ހުރި ބޭސްތަކުގެ ސާމްޕަލް ނަގާ ސްކްރީން ކުރަމުންނެވެ.
މިއަހަރު މިހާތަނަށް ރާއްޖޭގެ މާކެޓުން 10 ސާމްޕަލް ނަގާ, ފުޑް އެންޑް ޑްރަގް އޮތޯރިޓީން ސްކްރީން ކުރިއިރު, "ޑައިއެތިލީން ގްލައިކޯލް (DEG)" އަދި "އެތިލީން ގްލައިކޯލް(EG)" ހިމެނޭ ބެޗެއް ވަނީ ފެނިފަ އެވެ. އެއީ ޕާކިސްތާނުގެ ކުންފުންޏަކުން އުފައްދާފައިވާ އަލެގްރޯ ބްރޭންޑުގެ 5ml ސިޓްރިޒެން ދިޔާ ބޭހުގެ B220 ބެޗެވެ.
ޑައިތެލީން އައި އެތިލީން ގްލައިކޯލް ދެނެގަތުމަށް ހަދަންޖެހޭ ޓެސްޓުތައް ރާއްޖޭގައި ހެދޭނެ އިންތިޒާމު ހަމަޖެހިފައި ނުވާތީ އެމްއެފްޑީއޭއިން ބޭސްތައް ސްކްރީން ކުރަނީ ސާމްޕަލްތައް ރާއްޖޭން ބޭރުގެ ލެބޯޓްރީއަކަށް ފޮނުވައިގެންނެވެ.
ޑައިއެތިލީން އެތިލީން ގްލައިކޯލްއަކީ އިންސާނުންނަށް ވިހަ ދެ މާއްދާ އެވެ. ހަށިގަނޑަށް އެތެރެވެއްޖެ ނަމަ މަރުވުމުގެ ފުރުސަތު ބޮޑެވެ. މި މާއްދާތައް ހިމެނޭ ބޭސް ބޭނުންކޮށްގެން ދުނިޔޭގެ ބައެއް ގައުމުތަކުގައި ކުދިން މަރުވުމާ ގުޅިގެން ޑަބްލިއުއެޗްއޯއިން ނެރޭ އެލާޓްތައް, ރާއްޖޭގެ އެމްއެފްޑީއޭއިން ވަނީ ފާއިތުވި އަހަރު ތެރޭ ތަކުރާރުކޮށް ނެރެފަ އެވެ.
މިއީ މި މާއްދާތައް އެކުލެވޭ ބޭސް ރާއްޖޭގެ މޭކެޓުން ފެނުނު ފުރަތަމަ ފަހަރެވެ.
ރާއްޖެއަށް އެތެރެކުރާ ބޭހުގައި ޑައިއެތިލީން އަދި އެތިލީން ގްލައިކޯލް ނެތްކަން ކަށަވަރު ކުރުމަށްޓަކައި, ރާއްޖެ އެތެރެކުރާ ބޭހާއެކު އޭގައި ޑަބްލިއުއެޗްއޯގެ ޕްރީކޮލިފައިޑް ލެބޯޓްރީއަކުން މި ދެ މާއްދާ ނެތްކަން ކަށަވަރުކޮށް ހަދާފައިވާ ތަހުލީލު ރިޕޯޓު ހުށަހަޅަން ޖެހޭ ގޮތަށް އެމްއެފްޑީއޭއިން ވަނީ ހަދައިފަ އެވެ.
މިފަދަ ބެޗެއް ފެނުމާއެކު މި ބްރޭންޑުގެ އިތުރު ތަހުލީލުތައް ހެދުމަށް ރާއްޖޭން ބޭރަށް ފޮނުވުމަށް އެމްއެފްޑީއޭއިން ވަނީ ނިންމާފަ އެވެ. އެހެންކަމުން ޓެސްޓުގެ ނަތީޖަ ލިބި, ބޭހުގެ ރައްކާތެރިކަން ކަށަވަރު ވަންދެއް އަލެގްރޯ ބްރޭންޑު ރާއްޖެ އެތެރެ ކުރުމާއި ވިއްކުން ވަނީ މަނާކޮށްފަ އެވެ.
ޑައިއެތިލީން އަދި އެތިލީން ގްލައިކޯލްގެ ނުރައްކާތައް
ޑަބްލިއުއެޗްއޯގެ އެލާޓްގައިވާ ގޮތުން އެ ކެމިކަލްތަކަކީ ބޭނުންކުރަން އެއްގޮތަކަށް ވެސް ރައްކާތެރި ނޫން އަދި ކުޑަކުދިންނަށް އޭގެ ނުރައްކާ މާ ބޮޑު ބާވަތްތަކެކެވެ. އެއީ ބޮޑެތި ގެއްލުންތައް ލިބި ފުރާނައަށް ނުރައްކާވެދާނެ ބާވަތްތައް ކަމަށް ވެސް އެ އެލާޓްގައި ބުންޏެވެ.
އެ ބާވަތްތައް ބޭނުން ކުރެވިއްޖެ ނަމަ ވެދާނެ ގޮތްތަކުގެ ތެރޭގައި ބަނޑުގައި ރިއްސުމާއި ބޭރަށް ހިންގުން އަދި ކުޑަކަމުދާން އުނދަގޫވުން ހިމެނެ އެވެ. ބޮލުގައި ރިއްސުމާއި ހެޔަށް ގޮތްވުމާއި ކިޑްނީ ހަލާކުވުމަކީ ވެސް އެ ބާވަތްތަކުން ލިބިދާނެ ގެއްލުންތަކެވެ.
