އިޒްރޭލުން މިހާރު ފަލަސްތީނަށް ދެމުންދާ ހަމަލާތަކުގެ ތެރެއިން ގާޒާއަށް ނިއުކްލިއާ ހަމަލާއެއް ދިނުމަށް އިޒްރޭލުގެ ވަޒީރަކު ގޮވާލި ގޮވާލުން ދިވެހި ސަރުކާރުން ކުށްވެރިކޮށްފި އެވެ.
ފޮރިން މިނިސްޓްރީން މިއަދު ނެރުނު ބަޔާނެއްގައި ބުނެފައިވަނީ ގާޒާއަށް ނިއުކްލިއާ ބޮމެއް އެޅުމަކީ ކުރެވިދާނެ ކަމެއް ކަމުގައި އިޒްރޭލުގެ ހެރިޓޭޖް މިނިސްޓަރު އަމިހާއި އެލިޔަހޫ ބުނި ބުނުން ބަލައިނުގަނެވޭނެ ކަމަށާއި އެކަން ރާއްޖެއިން އެންމެ ހަރުކަށި އިބާރާތުން ކުށްވެރިކުރާ ކަމަށެވެ.
"ހާއްސަކޮށް އިޒްރޭލުގެ އަސްކަރިއްޔާއިން ފަލަސްތީނުގެ އާއްމުންނަށް އަމާޒުކޮށް ހަމަލާތަކެއް ދެމުންދާ މި ދަނޑިވަޅުގައި އިޒްރޭލުގެ ވަޒީރަކު މިފަދަ ވާހަކައެއް ދެއްކުމަކީ ވަކިން ކަންބޮޑުވާ ކަމެއް," އެ ބަޔާނުގައި ބުނެފައިވެ އެވެ.
އަދި، މި ބަސްތަކަށްފަހު އިޒްރޭލުން އެ މިނިސްޓަރަށް އެކަށޭނަ ފިޔަވަޅު އަޅާފައި ނުވާ ކަމަށްވެސް ރާއްޖޭން ވަނީ ބުނެފަ އެވެ.
އެލިޔަހޫގެ ވާހަކައާ ގުޅިގެން އިޒްރޭލުގެ ބޮޑުވަޒީރު ވަނީ ނިއުކްލިއާ ހަމަލާއެއް ދިނުމަށް ބުނި ބުނުމަކީ ހަގީގަތް ނޫން ކަމަށް ބުނެ އޭނާ މަގާމުގެ މަސްއޫލިއްޔަތުތަކުން ވަގުތީ ގޮތުން ދުރުކޮށްފަ އެވެ. އިޒްރޭލުގެ އިދިކޮޅު ފަރާތްތަކުންވެސް ވަނީ އެލިޔަހޫގެ ވާހަކަތައް ކުށްވެރިކޮށް އޭނާ މަގާމުން ވަކިކުރުމަށް ގޮވާލާފަ އެވެ. އެލިޔަހޫ ފަހުން ބުނީ އޭނާ ނިއުކްލިއާ ހަމަލާ އޭ ބުނީ މިސާލު ބަހެއްގެ ގޮތުން ކަމަށެވެ.
މިދިޔަ މަހުގެ ހަތްވަނަ ދުވަހު ފަލަސްތީނުގެ ހަމާސް ގްރޫޕުން ދިން ހަމަލާއަށްފަހު އިޒްރޭލުން ހަނގުރާމަ އިއުލާނުކޮށް ވޭތުދެވިޔަ 75 އަހަރު ހިންގަމުން އަންނަ ގަތުލުއާންމު ވަރުގަދަކޮށް ދެމުންދާ ހަމަލާތަކުގައި ވަނީ ރެފިއުޖީ ކޭމްޕުތަކާއި ސްކޫލުތަކާއި ހޮސްޕިޓަލުތައް އަދި މިސްކިތްތަކާއި ފައްޅިތަކަށް ވެސް ވަނީ ހަމަލާ ދީފަ އެވެ.
އެ ހަމަލާތަކުގައި ޝަހީދުވި މީހުންގެ އަދަދު މިހާރު ވަނީ 10،000 އާ ކައިިރިވެފަ އެވެ. ހަމާސްގެ ހަމަލާގައި އިޒްރޭލުން މަރުވީ 1400 އެއްހާ މީހުންނެވެ.
ހަމަލާތަކުގެ އިތުރުން އިޒްރޭލުން ވަނީ ގާޒާއިން ކަރަންޓާއި ފެން ކަނޑާލާ، ތެލާއި އެހެނިހެން އެހީ ފޯރުކޮށްދޭން ހުރި މަގުތައް ބަންދުކޮށްފަ އެވެ. ތެޔޮ ހުސްވެ ކަރަންޓު ކެނޑުމުގެ ސަބަބުން ގާޒާ މިހާރު އޮތީ ކަނު އަނދިރީގަ އެވެ. ގިނަ ހޮސްޕިޓަލުތަކެއްގެ ހިދުމަތްވެސް ވަނީ ހުއްޓާލަން ޖެހިފަ އެވެ.
މިސްރުގެ ރަފާހު ބޯޑަރު ކައިރީ އެހީގެ އެތައް ހާސް އުޅަނދެއް އޮތް ނަމަވެސް، މިދިޔަ މަސްދުވަހުގެ ތެރޭ ގާޒާއަށް ވަދެވިފައިވަނީ އެންމެ 200 އެއްހާ އުޅަނދަށެވެ. އެއީ މީގެ ކުރިން ދުވާލެއްގެ މައްޗަށް 100 އެއްހާ އުޅަނދު މުދާ ހިފައިގެން ގާޒާއަށް ވަދެ އެވެ.
ފޮރިން މިނިސްޓްރީގެ ބަޔާނުގައި ވަނީ ހަމަލާތައް ހުއްޓާލާ ގާޒާއަށް އިންސާނީ އެހީ ފޯރުކޮށްދިނުމުގެ ފުރުސަތު ފަހިކޮށްދިނުމަށް ގޮވާލަމުންދާ ގޮވާލުންވެސް ތަކުރާރުކޮށްފަ އެވެ.
