ގާޒާއަށް ތެޔޮ އެތެރެކުރުން ހުއްޓުވައި ގިނަ ހޮސްޕިޓަލުތަކުގެ ހިދުމަތް ހުއްޓުވާފައި ވަނިކޮށް ދިވެހިންގެ ނަގުމައި އިންޓަނޭޝަނަލް އެއިޑް ކެމްޕެއިން (އައިއޭސީ)ން 20،000 ލީޓަރު ތެޔޮ ހަދިޔާކޮށްފި އެވެ.
އައިއޭސީން ބުނީ ދިވެހިންގެ ނަމުގައި ގާޒާގެ އަލް އަގްސާ މާޓިޔާސް ހޮސްޕިޓަލަށް 20،000 ލީޓަރުގެ ތެޔޮ ފޯރުކޮށްދީފައި ވާނެ ކަމަށެވެ.
"ޔަހޫދީންގެ އަނިޔާތައް ކިތަންމެވަރަކަށް ދިންނަމަވެސް އަޅުގަނޑުމެން ގާޒާއަށް އެހީތެރިކަން ފޯރުކޮށްދިނުން ހުއްޓައެއް ނުލާނަން." އައިއޭސީން ބުނެ އެވެ.
ގާޒާގެ ސިއްހީ ނިޒާމު ފެއިލްވުމުގެ ތުންފަތްމަތީގައި ވާއިރު، އެ ސަރަހައްދުގެ ހޮސްޕިޓަލުތަކުގައި ދުވަސްނުފުރާ ވިހާފައިވާ 130 ކުޑަކުއްޖަކު އިންކިއުބޭޓަރުތަކުގައި ފަރުވާދެމުންދާއިރު ހާހަކަށްވުރެ ގިނަ މީހުން ދަނީ ކިޑްނީ މައްސަލަތަކުގައި ޑަޔަލަސިސް ގެ ފަރުވާ ހޯދަމުންނެވެ. ކަރަންޓު ކެނޑުމާއެކު މި ހުރިހާ އެންމެންގެ ފުރާނައަށް ވެސް ނުރައްކާވާނެ އެވެ.
އޮކްޓޯބަރު ހަތެއްގައި އިޒްރޭލުން ހަނގުރާމަ އިއުލާނުކުރީ ފަލަސްތީނުގެ ހަމާސް ޖަމާއަތުން ދިން ހަމަލާތަކެއްގައި އިޒްރޭލުގެ 1،400 އަށްވުރެ ގިނަ މީހުން މަރާލުމުގެ ބަދަލުގައި ކަމަށް ބުނެ އެވެ. އެއަށްފަހު ދިން ހަމަލާތަކުގައި ފަލަސްތީނުގެ ގާޒާ އަދި ހުޅަނގު އައްސޭރިން ޝަހީދުވި މީހުންގެ އަދަދު 8،500 އަށްވުރެ މައްޗަށް ވަނީ އަރާފަ އެވެ.
އިޒްރޭލުން ދެމުންދާ ވައިގެ ހަމަލާތަކުގެ އިތުރުން މިހާރު ދަނީ އެއްގަމު މަގުން އުތުރު ގާޒާއަށް ވަދެގަތުމަށް މަސައްކަތް ކުރަމުންނެވެ. ބަދަލުގައި ހަމާސް، ހިޒްބުﷲ އަދި ޔަމަނުގެ ހޫތީންނާއި ސީރިއާގައި ހަރަކާތްތެރިވާ ގްރޫޕުތަކުން ދަނީ އިޒްރޭލަށް ހަމަލާދެމުންނެވެ.
