އިއްޔެ ސޯޝަލް މީޑިއާގައި އެންމެ ބޮޑަށް ދައުރުވީ ގދ. ވާދޫއިން ފަލަސްތީނުގެ ރައްޔިތުންނަށް ބިން ދިނުމަސް އެ ރަށު ކައުންސިލުން މަޝްވަރާކުރަން ނިންމި ނިންމުމުގެ ވާހަކަ އެވެ. އެއާއެކު ގިނަ ބަޔަކު ވަނީ ސޯޝަލް މީޑިއާގެ އެކި ޕްލެޓްފޯމުތަކުގައި، އެފަދައިން ނިންމުން ވެގެންދާނީ އިޒްރޭލަށް ވާގިވުން ކަމަށް ބުނެ ވާދޫ ކައުންސިލަށް ވަރަށް ބޮޑަށް ފާޑުކިޔާފަ އެވެ.
ގިނަ ބަޔަކު އެއް އަޑަކުން ވަނީ މިކަމާ ނުރުހުން ފާޅުކޮށްފަ އެވެ. އެންމެން ހެން ބުނަމުން ދިޔައީ ފަލަސްތީނުގެ ރައްޔިތުން ވޭތުވެދިޔަ 75 އަހަރު ދަތި ހާލުގައި މަސައްކަތް ކުރަމުންދިޔައީ، އިޒްރޭލުގެ ސަހްޔޫނީން ވެރިވެގަތް އެ މީހުންގެ އަމިއްލަ ބިން ހޯދުމަށް ކަމަށެވެ.
އަދި، ދިވެހި ބިން ނުވަތަ އެހެން ގައުމެއްގެ ބިމުން ވެސް ފަލަސްތީނުގެ ރައްޔިތުންނަށް ބިން ދީ، އެ މީހުންގެ އަމިއްލަ ވަޒަން ދޫކޮށް ދިޔުމަކީ އިޒްރޭލުން ބޭނުންވާ ގޮތްކަން ވެސް ގިނަ ބަޔަކު ފާހަގަކޮށްފައިވެ އެވެ.
"ހެޔޮހިތުން ކުރި ކަމެއް ނަމަވެސް، މިއީ ނުވިސްނާ ކުރި ކަމެއް. ފަލަސްތީނު މީހުން އެމީހުންގެ ބިމުން ފައިބާ ހިސާބުން ދެން އެ ބިމަށް އަނބުރާ ދިއުމުގެ ފުރުސަތު ގެއްލޭނެ، ފަލަސްތީނު މީހުން އެހީ ބޭނުންވަނީ އެމީހުންގެ އަމިއްލަ ގައުމު މިނިވަންކުރުމަށް" އެކަކު އެކްސްގައި ލިޔެފައިވެ އެވެ.
"ފަލަސްތީނު މީހުން ޓްވީޓްކޮށްފަ ވެސް ހުރޭ އެ މީހުން އެހެން ގައުމަކުން ބިން ބޭނުން ނޫން ކަމަށް. އެ މީހުން ބޭނުންވަނީ ފަލަސްތީނުގެ ބިމުގަ މިނިވަން އަމާން ދިރިއުޅުމެއް ކަމަށް. މިހާރު ގާޒާއާ ދެކޮޅަށް އިޒްރޭލުން ކުރާ ހަނގުރާމައަކީ މުޅި ގާޒާއިން ފަލަސްތީނު މީހުން ބޭލުން," އެހެން މީހަކު ލިޔެފައިވެ އެވެ.
ތެދެކެވެ. ފަލަސްތީނުގެ ގިނަ ނޫސްވެރިންނާއި ސޯޝަލް މީޑިއާގައި އެކްޓިވްކޮށް ހަރަކާތްތެރިވާ ގިނަ ފަރާތްތަކުން، މިހާރުވެސް އަދި އަބަދުވެސް އެންމެ ހަރު އަޑުން ބުނާ އެއް ވާހަކައަކީ އަމިއްލަ ބިން ދޫކޮށްލަން ބޭނުން ނުވާ ވާހަކަ އެވެ.
"ވާދޫ ކައުންސިލަށް މިވެގެން އުޅޭގޮތް ސާފުނުވަނީ ކަމަށްވާނީ. ފަލަސްތީން ރައްޔިތުން ފުރާނައިން ގުރުބާންވެ ޝަހީދުވެ އެދަނީ މުސްލިމުންގެ މުގައްދަސްބިން ހިމާޔަތް ކުރަން ކުރާ މަސައްކަތުން. ހަނގުރާމަ ކުރަނީ ވާދޫން ބިން ހޯދާކަށްނޫން." އިތުރު މީހަކު އެކްސްގައި ލިޔެފައިވެ އެވެ.
ގިނަ ބަޔަކު ފާހަގަކުރި ގޮތުގައި މިއީ އިޒްރޭލުން ފަލަސްތީނުގެ ބިންތަކަށް ވެރިވެގަނެ ވޭތުވެދިޔަ 75 އަހަރު ހިންގަމުންދާ ގަތުލުއާންމުގެ ހަގީގަތް އިނގެން ޖެހޭވަރަށް ދިވެހިންނަށް ނުލިބުމުގެ ސަބަބުން ކުރިމަތިވާ މައްސަލަތަކެކެވެ.
އަދި، މައުލޫމާތު ހޯދުމުގެ ކަންކަން މިހާ ފަސޭހަ ދުވަސްވަރެއްގައި، ފަލަސްތީނު މައްސަލާގެ ހަގީގަތް އެންމެންވެސް އަމިއްލައަށް ހޯދުމަކީ މުހިންމު ކަމެއްކަންވެސް ފާހަގަކޮށް، ތައުލީމީ ނިޒާމުގެ ތެރެއިންވެސް މިފަދަ މައުލޫމާތު ފޯރުކޮށްދިނުން މުހިންމު ކަމަށް 200 އަށްވުރެ ގިނަ ކޮމެންޓު ހުރި، އެ ހަބަރު ޝެއާ ކޮށްފައިވާ ޕޯސްޓެއްގައި މީހަކު ބުނެފައިވެ އެވެ.
ފަލަސްތީނު ބިމަށް އިޒްރޭލުން 1948 ގައި ވެރިވެގަތުމަށްފަހު، އިތުރު ބިންތައް ހޯދަން، ފަލަސްތީނު ރައްޔިތުންގެ ނަސްލު ފުހެލުމަށް، އެހެން ގައުމުތަކަށް ދިއުން މަޖުބޫރު ކުރުމަކީ އިޒްރޭލުން ބޭނުންކުރާ އުކުޅެކެވެ. މިސްރާއި އެހެން އަރަބި ގައުމުތަކަށް ވެސް ފަލަސްތީނުގެ އެތައް ހާސް ރެފިއުޖީންނެއް މަޖުބޫރީ ހާލަތުގައި އިޒްރޭލުން ފޮނުވާލި އެވެ.
ހަގީގަތަކީ ފަލަސްތީނު ރައްޔިތުން އެ މީހުންގެ ބިމުން ފޭބުމަށް ކުރެވޭ ކޮންމެ މަޝްވަރާއަކީ، ނިންމޭ ކޮންމެ ނިންމުމަކީ އިޒްރޭލުގެ ސަހްޔޫނީންނާއި އެއްކޮޅަށް ނިންމޭ ނިންމުމެއް ކަމެވެ. އެ މީހުން ހަތް ދަހަރު ވަންދެން ކުރި މަސައްކަތަށް ދެވޭ ހިތްވަރެއް ކަމެވެ.
ކުރަންވި ކަމަކީ ފަލަސްތީނު މިނިވަން ކުރުމަށް އެހީތެރިވެދިނުމެވެ. އިޒްރޭލާ ދެކޮޅަށް އަޑުއުފުލާ، އިޒްރޭލުގެ ރައްޔިތުން ރާއްޖެ އައުން މަނާކުރަން ގޮވާލާ، އިޒްރޭލަށް ވާގިވެރިވާ ބްރޭންޑުތައް ބޮއިކޮޓުކުރުން ފަދަ ކަންކަމެވެ. މިފަދަ ހައްސާސް މައްސަލައެއްގައި ގޮތް ނިންމަންވާނީ މައުލޫމާތާއި ވިސްނުމާ އެކު އެވެ.
