ހުޅުމާލޭގެ ކަންކަން ބަލަހައްޓާ އާބަންކޯ ކުންފުންޏާ ގުޅޭ ކޮރަޕްޝަންގެ ތަހުގީގަކާ ގުޅިގެން އެ ކުންފުނިން ފަސް ކަމެއް ކުރުން ހުއްޓާލުމަށް އެންޓި ކޮރަޕްޝަން ކޮމިޝަން (އޭސީސީ) އިން އެ ކުންފުންޏަށް އަންގައިފި އެވެ.
އާބަންކޯގެ މެނޭޖިން ޑިރެކްޓަރު އަހުމަދު އާތިފު އަށް އޭސީސީއިން ފޮނުވާފައިވާ ސިޓީއެއްގައި ބުނެފައިވަނީ މި ފިޔަވަޅަކީ ހުށަހެޅިފައިވާ މައްސަލައަކާ ގުޅިގެން އެޅޭ ވަގުތީ ފިޔަވަޅުތަކެއް ކަމަށެވެ. މި ފިޔަވަޅުތައް އަޅާފައިވާކަން އޭސީސީގެ މީޑިއާ އޮފިޝަލަކު ވަނީ "އަދަދު" އަށް ކަށަވަރުކޮށްދީފަ އެވެ.
މަޑުޖައްސާލުމަށް އެންގި ކަންކަން
- ބޭރުގެ ފަރާތްތަކަށް ހުޅުމާލެއިން ބިން ދިނުމާ ގުޅޭ ކަންކަން.
- އީއޯއައި ހުށަހަޅައިގެން ކުރިއަށް ގެންދިއުމަށް ރާވާފައިވާ ކަންކަން.
- ދިގު މުއްދަތަކަށް ބިން ކުއްޔަށް ދިނުމާއި ބިން ވިއްކުމާ ގުޅޭ މުއާމަލާތްތައް.
- ޖޮއިންޓު ވެންޗާ އުސޫލުން ކުރިއަށް ގެންދާ ކަންކަން.
- މަޝްރޫއުތަކާއި ގުޅޭ އެއްބަސްވުންތަކުގައި ސޮއިކުރުން.
މި ފިޔަވަޅުތައް އަޅާފައިވަނީ އޭސީސީއިން ބަލަމުންދާ އެއް މައްސަލަ ނުވަތަ އެއަށްވުރެ ގިނަ މައްސަލަތަކެއްގެ ސަބަބުންކަން އަދި ސާފެއް ނުވެ އެވެ.
އޭގެ އިތުރުން، އޭސީސީއިން އިއްޔެ ވަނީ ހުޅުމާލެ ދެވަނަ ފިޔަވަހީގައި ހިމެނޭ ފަރުކޮޅުފުށި ދިގު މުއްދަތަކަށް ކުއްޔަށް ދިނުންވެސް ހުއްޓުވާފަ އެވެ.
"ފަރުކޮޅުފުށި ދިގު މުއްދަތަކަށް ބަޔަކަށް ކުއްޔަށް ދޭން އުޅޭތީ އެކަމާ ގުޅިގެން މިކޮޅަށް ހުށަހެޅުނު މައްސަލައަކާ ގުޅިގެން. މައްސަލަ ނިމެންދެން އޭސީސީއިން އަންގާފަ އޮންނާނެ މުއާމަލާތްތައް ހުއްޓާލަން" އޭސީސީގެ މީޑިއާ އޮފިޝަލު ވިދާޅުވި އެވެ.
އެ ބިން ކުއްޔަށް ދިނުމަށް އާބަންކޯއިން ކުރަމުންދިޔަ މަސައްކަތްތައް ހުއްޓައިލަން އޭސީސީން އަންގާފައިމިވަނީ، އިންތިހާބީ ރައީސްގެ އޮފީހުން ހުޅުމާލޭގެ ބިންތަކާ ގުޅޭ މުއާމަލާތްތައް މަޑުޖައްސައިލަން ގޮވާލައިފައި ވަނިކޮށެވެ.
އެ އޮފީހުން މި މަހުގެ 29 ގައި ނެރުނު ބަޔާނެއްގައި ބުނެފައިވަނީ ވަނީ ހުޅުމާލޭގެ ބިންތަކާ ގުޅޭ ވިޔަފާރީގެ އެކި މުއާމަލާތްތަކާ ގުޅޭ ތަފާތު 40 އައިޓަމެއް އާބަންކޯ ބޯޑުގެ ދެން އޮންނަ ބައްދަލުވުމަކަށް އެޖެންޑާކޮށްފައިވާ ކަމުގެ މައުލޫމާތު އިންތިގާލީ އޮފީހަށް ލިބިފައިވާ ކަމަށާއި އެކަމާ މެދު އެ އޮފީހުން ނުހަނު ކަންބޮޑުވާ ކަމަށެވެ..
ނަމަވެސް އެ 40 އައިޓަމްގެ ތެރޭގައި ފަރުކޮޅުފުށި ހިމެނޭކަމެއް، އެ އޮފީހުން ނުވަތަ އޭސީސީން ވެސް ކަށަވަރުކޮށްދީފައެއް ނުވެ އެވެ.
