ރައްޔިތުންގެ މަޖިލީހުގައި މިދިޔަ އަންގާރަ ދުވަހު ބޭއްވި ޖަލްސާގެ ރިޔާސަތު ބެލެހެއްޓެވި އިރު ވެސް މަޖިލީހުގެ ނައިބު ރައީސް އީވާ އަބްދުﷲ އުޅުއްވީ ޑެންގޫގެ އާލާސްކަންފުޅާކަން މެޑިކަލް ރިޕޯޓްތަކުން އެނގޭ ކަމަށާއި އެކަމާ ހިތާމަކުރައްވާ ކަމަށް ހިތަދޫ އުތުރު ދާއިރާގެ އެމްޑީޕީ މެމްބަރު މުހައްމަދު އަސްލަމް އިއްޔެ ވިދާޅުވި އެވެ.
ރަައްޔިތުންގެ މަޖިލީހުގައި އާދީއްތަ އަދި ހޯމަ ދުވަހު ވެސް ޖަލްސާއެއް ނުބޭއްވުނީ، ރައްޔިތުންގެ މަޖިލީހުގެ ރައީސް މުހައްމަދު ނަޝީދު މަގާމުން ވަކިކުރުމުގެ ގަރާރު ކުރިއަށް ގެންދެވޭނީ މަޖިލީހުގެ ނައިބުރައީސްގެ ހައިސިއްޔަތުން އީވާ ރިޔާސަތު ބަލަހައްޓަވާ ޖަލްސާއަކުން ކަމަށް އަމީން އާއްމު ފާތިމަތު ނިއުޝާ ދެކެވަޑައިގަންނަވާތީ އެވެ.
އާދީއްތަ ދުވަހުގެ ޖަލްސާ ކެންސަލް ކުރެއްވިއިރު ނިއުޝާ ވިދާޅުވީ އާލާސްކަންފުޅާ އުޅުއްވާކަން މަޖިލީހުގެ އިދާރާއަށް އީވާ ލިއުމުން އަންގަވާފައިވާ ކަަމަށެވެ.
އާލާސްކަންފުޅާ އުޅުއްވާކަން އަންގަވައި މަޖިލީހަށް ފޮނުއްވި ސިޓީގައި އީވާ ވިދާޅުވެފައި އޮތީ ޑެންގޫ ހުމަށް ޕޮޒިޓިވް ވެފައިވާ ކަމަށާއި މެޑިކަލް ސެޓްފިކެޓާއި ލޭގެ ޓެސްޓްގެ ރިޕޯޓްތައް މަޖިލީހުގެ މެޖޯރިޓީ ލީޑަރަށާއި މައިނޯރިޓީ ލީޑަރަށް ހިއްސާކޮށްދެއްވަން އެދިވަޑައިގަންނަވާ ކަމަށެވެ.
މަޖިލީހުގެ މެޖޯރިޓީ ލީޑަރު އަދި ހިތަދޫ އުތުރު ދާއިރާގެ އެމްޑީޕީ މެމްބަރު މުހައްމަދު އަސްލަމް "އަދަދު" އަށް މިއަދު ވިދާޅުވި ގޮތުގައި އީވާ ޑެންގޫއަށް ޕޮޒިޓިވްވީ މިމަހުގެ 23 ވަނަ ދުވަހު (މިދިޔަ ހޯމަ ދުވަހު) ކަން އެ ރިޕޯޓްތަކުން އެނގޭ ކަމަށެވެ.
އެހެން ނަމަވެސް ޖެހިގެން އައި އަންގާރަ ދުވަހު އީވާ މަޖިލީހަށް ވަޑައިގެން ޖަލްސާގެ ރިޔާސަތު ބެލެހެއްޓެވި އެވެ. އަސްލަމް ވިދާޅުވީ އާލާސްކަންފުޅާ އުޅުއްވަމުން އެ ޖަލްސާއަށް ވަޑައިގެންނެވި ކަމީ ކަންބޮޑުވެވަޑައިގަންނަވާ ކަމެއް ކަަމަށެވެ.
މަޖިލީހުގެ އެމްޑީޕީގެ މެމްބަރުން ތުހުމަތު ކުރައްވާ ގޮތުގައި ސަބަބެއް ދައްކަވައިގެން އީވާ ޖަލްސާތަކުގައި ބައިވެރިވެވަޑައިނުގަންނަވަނީ ނަޝީދު ވަކިކުރުން ދިގު ދެންމުމަށެވެ.
ރައްޔިތުންގެ މަޖިލީހުގެ ރައީސްކަމުން ނަޝީދު ވަކިކުރަން އެމްޑީޕީން ހުށަަހަޅާފައިވާ މައްސަލަ، އީވާއަށް ވަޑައިނުގެންނެވޭތީ ކުރިއަށް ނުގެންދެވޭނެ ކަމަށް މަޖިލީހުގެ އިދާރާއިން ބުނާތީ، އެ މައްސަލަ ކުރިއަށް ގެންދެވޭނެ މަގެއް ހޯދަން އެމްޑީޕީން މިހާރު ވަނީ އެ މައްސަލަ ސުޕްރީމްކޯޓަށް ހުށަހަޅައިފަ އެވެ.
މުހިންމު ބައެއް ހަބަރުތައް
ދުވަހުގެ ފޮޓޯ
މިއީ އޮކްޓޯބަރު 23، 2023 ވަނަ ދުވަހު ބޭއްވި ރައްޔިތުންގެ މަޖިލީހުގެ ޖަލްސާގެ ރިޔާސަތުގައި މަޖިލީހުގެ ނައިބު ރައީސް އީވާ އަބްދުﷲ އިންނެވިއިރު ނަގާފައިވާ ފޮޓޯއެއް. މަޖިލީހުގެ ރައީސް ނަޝީދު ވަކިކުރުމުގެ ޖަލްސާ ކުރިޔަށް ގެންދަން އީވާ އުޒުރެއްގެ ގޮތުގައި މިހާރު ދައްކަވަނީ ޑެންގޫ ޖެހިގެން އާލާސްކަންފުޅުއްވާ އުޅުއްވާކަން. ނަމަވެސް ޑެންގޫޖެހިފައި ހުރިކަން އޮކްޓޯބަރު 23 ވަނަ ދުވަހު ހެދި ޓެސްޓުތަކުން އެނގޭއިރު، ޖެހިގެން އައި ދުވަހު ވެސް މަޖިލީހަށް ވަޑައިގެންނެވި، ނަމަވެސް، ނަޝީދުގެ މައްސަލަ އެޖެންޑާކުރި ދެ ޖަލްސާއަށް ވެސް ވަޑައިގެންފައި ނެތް. އެއީ މަޖިލީހުގެ ގަވާއިދު ބުނާ ގޮތުން ނައިބު ރައީސް ރިޔާސަތު ބަލަހައްޓަވަން ލާޒިމު ޖަލްސާއެއް. -- ފޮޓޯ: މަޖިލީހުގެ އިދާރާ
