އިޒްރޭލުން ފަލަސްތީނުގައި ހިންގަމުންދާ ގަތުލްއާމުގެ މައުލޫމާތު ދުނިޔެއަށް ފެތުރުން ހުއްޓުވަން ގާޒާއިން އިންޓަނެޓު ކަނޑައިލުމަށް ފަހު އިޒްރޭލުގެ ޒަޔަނިސްޓް ސިފައިން އެއްގަމު މަގުން ދެކުނު ގާޒާއަށް ވަދެގަނެފި އެވެ.
ރޭގެ މެންދަމުން ފެށިގެން ގާޒާއިން ލިބެމުންދާ އަދާހަމަތައް ވަނީ މުޅިއަކުންހެން ކެނޑިފަ އެވެ. ފަލަސްތީނުގެ އިންސާނީ ޖަމްއިއްޔާތަކުންވެސް ވަނީ ގާޒާގައި ތިބި އޮފިޝަލުންނާ އެއްވެސް ވަރަކަށް މުއާސަލާތު ނުކުރެވޭ ކަމަށް ބުނެފަ އެވެ.
އިޒްރޭލުން ވަނީ އިންޓަނެޓުގެ އިތުރުން މޮބައިލް އަދި ލޭންޑްލައިން ފޯނުގެ ހިދުމަތްވެސް ގާޒާއަށް ވަނީ ކަނޑާލާފަ އެވެ.
މުއާސަލާތީ ގުޅުންތަކުގެ އިތުރުން ހަތެއްގައި ފަލަސްތީނުގެ ހަމާސް ޖަމާއަތުން ދިން ހަމަލާތަކުގެ ބަދަލުގައި ހަނގުރާމަ އިއުލާންކޮށް، ވޭތުވެދިޔަ 75 އަހަރު އިޒްރޭލުން ހިންގަމުންދާ ގަތުލުއާންމު ވަރުގަދަކޮށް ދެމުންދާ ހަމަލާތަކުގެ ތެރެއިން އިޒްރޭލުން ވަނީ ގާޒާއިން ފެނާއި ކަރަންޓު އަދި ތެޔޮ ލިބޭނެ މަގުތައް ބަންދުކޮށްފަ އެވެ.
ބައިނަލްއަގުވާމީ އެކި ޖަމްއިއްޔާތަކުންނާއި ގައުމުތަކުން ގާޒާއަށް ފޮނުވި އެހީ ރަފާހު ބޯޑަރުގައި ތޮއްޖެހިފައި ވީ ނަމަވެސް އިޒްރޭލުން އެ އެހީގެ އުޅަނދުތައް ވެއްދުމަށް ވަނީ ދެކޮޅުހަދާފަ އެވެ. މި މަހުގެ ހަތަކުން ފެށިގެން މިއަދާ ހަމައަށް ގާޒާއަށް ވަދެފައިވަނީ 100 އެއްހާ އެހީގެ އުޅަނދެވެ.
އިޒްރޭލުން އެއްގަމު މަގުން ދެކުނު ގާޒާއަށް ވަދެގަންނާނެ ކަމުގެ އިންޒާރު ދިންތާ ހަފުތާއެއްހާ ދުވަސް ފަހުން ރޭ ވަދެގަތްއިރު، ގާޒާއިން ލިބޭ މައުލޫމާތުތައް ބުނާގޮތުން އިޒްރޭލުގެ ސިފައިންނާ ހަމާސްގެ ހަނގުރާމަވެރިންދަނީ ވަރުގަދަ ހަމަލާތަކެއް ބަދަލުކުރަމުން ކަމަށެވެ.
ރޭ އިޒްރޭލުން ގާޒާއަށް ދީފައިވާ ބޮމުގެ ހަމަލާތަކަކީ މިފަހަރު އިޒްރޭލުން ދީފައިވާ އެންމެ ވަރުގަދަ ހަމަލާތަކެވެ. އޭގެ ތެރޭގައި ފޮސްފޮރަސް ބޮމުގެ ހަމަލާތައްވެސް ހިމެނެ އެވެ.
މި ފަހަރުގެ ހަމަލާތަކުގައި މިހާތަނަށް ފަލަސްތީނުގެ 7،000 އަށްވުރެ ގިނަ މީހުން ޝަހީދުކޮށްލާފައިވާއިރު އޭގެ ތެރޭގައި 3،000 އެއްހާ ކުޑަކުދިން ހިމެނެ އެވެ. ހަމާސް އިން ދިން ހަމަލާތަކުގައި އިޒްރޭލުން 300 އަށްވުރެ ގިނަ ސިފައިން ހިމެނޭހެން 1400 އަށްވުރެ ގިނަ މީހުން ވަނީ މަރާލާފަ އެވެ.
ހަމާސްގެ އިތުރުން އަރަބި ގައުމުތަކުގައި ހަރަކާތްތެރިވާ ބައެއް ގްރޫޕުތަކުންވެސް ވަނީ އިޒްރޭލަށް ހަމަލާދީފަ އެވެ.
އެގޮތުން އިޒްރޭލަށް އެންމެ ފާޅުގައި ހަމަލާދީފައިވަނީ ލުބުނާނުގެ ހިޒްބުﷲ އިންނެވެ. އިޒްރޭލުން ބަދަލުގައި ދިން ހަމަލާތަކުގައި އެ ޖަމާއަތުގެ 44 ހަނގުރާމަވެރިން ވަނީ މަރާލާފަ އެވެ. އޭގެ އިތުރުން ސީރިއާ އަދި ޔަމަނުގައި ހަރަކާތްތެރިވާ އީރާނުން ފަންޑުކުރާ ކަމަށް ހުޅަނގުން ބުނާ ގްރޫޕުތަކުން ވަނީ އިޒްރޭލަށް އަދި ސީރިއާގައި ހުންނަ އެމެރިކާގެ އަސްކަރީ މަރުކަޒުތަކަކަށް ހަމަލާދީފަ އެވެ.
