ފަލަސްތީނުގެ ޣައްޒާގައި އިޒްރޭލުން ބޮޑު ގަތުލުއާއްމެއް ކުރިއަށް ގެންދާ އިރު، ރާއްޖޭގައި ހުރެ، ދިވެހިންނަށް ޖެއްސުންކުރާ އުސޫލުން އިޒްރޭލު ޕްރޮމޯޓްކުރާ ފަތުރުވެރިޔާ ޑީޕޯޓުކޮށްލަން މަކުނުދޫ ދާއިރާގެ މެންބަރު މުހައްމަދު ރާއީ ގޮވާލައްވައިފި އެވެ.
ސޯޝަލް މީޑިއާގައި ދިވެހިންނާ އަރައިރުންވާ އެމީހާ ޑީޕޯޓްކޮށްލަން ރާއީ ގޮވައިލެއްވީ ގާޒާގައި އިޒްރޭލުން ހިންގާ ޖަރީމާތައް ކުށްވެރިކުރައްވައި ވިލިނގިލި ދާއިރާގެ އެމްޑީޕީ މެމްބަރު ސައުދު ހުސައިން ހުށަހެޅުއްވި ގަރާރަށް މަޖިލީހުގެ މިއަދުގެ ޖަލްސާގައި ކުރި ބަހުސްގަ އެވެ.
"އަޅުގަނޑަށް މީގެ ދެދުވަސް ކުރިން ފެނުނު އިޒްރޭލު ރައްޔިތަކު، ރާއްޖޭގެ ރިސޯޓެއްގަ މަސައްކަތްކުރާ ރައްޔިތަކު، [ދިވެހިންނަށް] ގޮންޖެހުމުގެ ގޮތުން ބީޗުގައި އިޒްރޭލަށް ތާއީދުކޮށްފަ ދިދައެއް ބަހައްޓަން، އަޅުގަނޑު ގޮވާލަން މިހާރުން މިހާރަށް އެ ރިސޯޓުގެ ވެރިން އޭނަ މިތަނުން ޑީޕޯޓުކޮށްލަން" ރާއީ ވިދާޅުވި އެވެ.
އޭނާ ވިދާޅުވީ ވިދާޅުވީ ފަލަސްތީނާ ދިވެހިންނާ އޮންނަ ގުޅުމާއި އެ ގައުމުގެ އަހުންނަށް އޮންނަ ކުލުނުގެ ސަބަބުން ދިވެހިން މިހާރު ތިބީ ވަރަށް ބޮޑަށް ހިތުގައި ޖެހިފައި ކަމަށާއި އިޒްރޭލުން ފަލަސްތީނުގެ ރައްޔިތުންނަށް ދެމުންދާ ލާއިންސާނީ އަނިޔާ ކޮންމެ ދުވަހަކު ފެންނަމުންދާ ކަމަށެވެ.
"ހަމަ އެގޮތަށް ރާޅާއެޅުންތެރިއެއްވެސް އިޒްރޭލަށް ސަޕޯޓުކޮށް ވާހަކަތައް އެބަ ދައްކާ"
ސޯޝަލް މީޑިއާގައި ދިވެހިންގެ އެންމެ ބޮޑު ސަމާލުކަމެއް ލިބުނީ އެ ރާޅާ އެޅުންތެރިޔާގެ ޕޯސްޓުތަކަށެވެ. އެގޮތުން ރާއްޖޭގައި ޗުއްޓީ ހޭދަކުރުމަށް ދޭ ލާރި ދިވެހިން ދެނީ ހަމާސްއަށް ކަމަށާއި ދިވެހިންނަކީ ހަރުކަށި ފިކުރުގެ ބައެއް ކަމަށް ސިފަކޮށް އޭނާ ވަނީ ޕޯސްޓުތަކެއް ކޮށްފަ އެވެ.
އިޒްރޭލާ ދެކޮޅު މާހައުލެއް ދިވެހިރާއްޖޭގައި އުފެދި، ވަރުގަދަވަމުންދާ ކަމަށް ބުނެ އެ ގައުމުގެ ރަައްޔިތުންގެ ރާއްޖެއަށް ދަތުރު ނުކުރުމަށް އިޒްރޭލުގެ ފޮރިން މިނިސްޓްރީންވެސް މިހާރު ވަނީ އިލްތިމާސްކޮށްފަ އެވެ.
ތުލުސްދޫގައި މިހާރު ހުރި ކަމަށް ބުނާ އެ ރާޅާ އެޅުންތެރިޔާ ވަނީ އޭނާގެ އިންސަޓްގްރާމް އެކައުންޓުގައި އަނިޔާ ލިބެމުންދާ ފަލަސްތީނު ރައްޔިތުންނަށް ފުރައްސާރަކޮށް ގިނަ ޕޯސްޓުތަކެއް ކޮށްފަ އެވެ. އެ ޕޯސްޓުތަކުގެ ކޮމެންޓު ސެކްޝަނުގައި ދިވެހި ގިނަ ބަޔަކު ވަނީ އޭނާ ރާއްޖެ ދޫކޮށް ދިއުމަށާއި އޭނާ ހައްޔަރުކުރުމަށް ގޮވާލާފަ އެވެ.
ނަމަވެސް ފުލުހުން އިއްޔެ ބުނި ގޮތުން އޭނާއާ ބެހޭ އެއްވެސް މައްސަލައެއް މިހާތަނަށް ފުލުހުންނަށް ހުށަހަޅާފައެއް ނުވެ އެވެ.
މިއަދު މަޖިލީހުގައި ކުރިއަށްދިޔަ ބަހުސްގައި އިޒްރޭލު މީހުން ރާއްޖެއަށް އައުން މަނާ ކުރުމަށާއި އެ ގައުމުގެ މުދާ ވެސް ރާއްޖެއަށް އެތެރެނުކުރަން ރައްޔިތުންގެ މަޖިލީހުގެ ބައެއް މެމްބަރުން ވަނީ ގޮވާލައްވާފަ އެވެ. އަދި، ދިވެހި އާއްމު ރައްޔިތުން ދައްކާ މިސާލާ އެއްގޮތަށް ސިޔާސީ ޕާޓީތަކާ ސަރުކާރުންވެސް ފަލަސްތީނާ އެކު ތިބިކަން އަމަލުން ދެއްކުމަށް ބައެއް މެންބަރުން ވަނީ ގޮވާލައްވާފަ އެވެ.
