ފަލަސްތީނުގެ ގާޒާގައި އިޒްރޭލުން ގަތުލުއާންމެއް ހިންގާތީ، އިޒްރޭލު މީހުން ރާއްޖެއަށް އައުން މަނާ ކުރުމަށާއި އެ ގައުމުގެ މުދާ ވެސް ރާއްޖެއަށް އެތެރެނުކުރަން ރައްޔިތުންގެ މަޖިލީހުގެ ބައެއް މެމްބަރުން މިއަދު ގޮވައިލައްވައިފި އެވެ.
ގާޒާގައި އިޒްރޭލުން ހިންގާ ޖަރީމާތައް ކުށްވެރިކުރައްވައި ވިލިނގިލި ދާއިރާގެ އެމްޑީޕީ މެމްބަރު ސައުދު ހުސައިން ހުށަހެޅުއްވި ގަރާރަށް މަޖިލީހުގެ މިއަދުގެ ޖަލްސާގައި ކުރި ބަހުސްގައި ބައެއް މެމްބަރުން ވިދާޅުވީ ރާއްޖޭން އިޒްރޭލާ އެއްވެސް މުއާމަލާތެއް ކުރަން ނުޖެހޭ ކަމަށާއި އެއީ މަނާ ކަމަކަށް ހަދަން ޖެހޭ ކަމަށެވެ.
އެ ބަހުސްގައި ކުޅުދުއްފުށި އުތުރު ދާއިރާގެ އެމްޑީޕީ މެމްބަރު ޔާސިރު އަބްދުލް ލަތީފު ވިދާޅުވީ އިޒްރޭލު ކުށްވެރިކޮށް ބަޔާންތައް ނެރުމުގެ އިތުރުން ދެން ކުރެވެން އޮތީ ކޮންކަމެއްތޯ ބަލަން ޖެހޭ ކަމަށެވެ. ކުރެވިދާނެ ކަންތައްތަކުގެ ގޮތުގައި މެމްބަރުން ފާހަގަކުރައްވާ ކަންތައްތަކުގެ ލިސްޓެއް އެއާ އެކު އޭނާ ދެއްވި އެވެ.
"އިޒްރޭލުގެ ޕާސްޕޯޓް ބޭންކުރުން އެއް ކަމަކަށް. އިޒްރޭލުން އެތެރެކުރާ މުދާ ހުއްޓުވައިލުން ދެވަނަ ކަމަކަށް،" ޔާސިރު ވިދާޅުވި އެވެ.
އިޒްރޭލު ޕާސްޕޯޓުގައި ރާއްޖެއަށް މީހުން އެތެރެވުން މަނާކުރުމާއި އެ ގައުމުގެ މުދާ އެތެރެ ނުކުރުމަކީ ކުރެވިދާނެ ކަމެއްތޯ ބަލަން ޖެހޭ ކަމަށާއި ދިވެހި ސަރުކާރުގެ އެއްވެސް އޮފިޝަލަކު އިޒްރޭލާ މުއާމަލާތް ކުރުން މަނާ ކުރުމަކީ މިހާރުން މިހާރަށް ވެސް ކުރެވިދާނެ ކަމެއް ކަމަށް އޭނާ ވިދާޅުވި އެވެ. ދިވެހިންގެ ގޮތުގައި ތިބެ އިޒްރޭލު ޕްރޮމޯޓު ކުރުން މަނާކުރުމަކީ ވެސް ޔާސިރު ވިދާޅުވި ގޮތުގައި މިހާރުން މިހާރަށް ވެސް ކުރެވިދާނެ ކަމެކެވެ.
"އަޅުގަނޑުގެ ހުށަހެޅުމަކީ، ހިނގާށޭ އަޅުގަނޑުމެން އެހެން ސްޓެޕަކަށް ދާން. ގާނޫނެއްގެ ސިފައިގައި، އަޅުގަނޑުމެން ބޭނުންވާ [މި]ކަންތައްތައް ތައާރަފްކުރަން އަދި ތަންފީޒުކުރަން،" ޔާސިރު ވިދާޅުވި އެވެ.
މަކުނުދޫ ދާއިރާގެ އެމްޑީޕީ މެމްބަރު މުހައްމަދު ރާއީ ވިދާޅުވީ ރާއްޖެއަށް ޓޫރިސްޓުންގެ ގޮތުގައި އިޒްރޭލު މީހުން އައުން މަނާކުރުމަކީ ދިވެހިން ރުޅިއައިސްފައި ތިބިކަން އެނގިގެން އިޒްރޭލު ސަރުކާރުން އެކަން މަނާކުރުމުގެ ކުރިން ރާއްޖޭން އަޅަން ޖެހޭނެ ފިޔަވަޅެއް ކަމަށް ދެކެވަޑައިގަންނަވާ ކަމަށެވެ.
ފަލަސްތީނު މީހުންގެ ހައްގުގައި ދިވެހި ރައްޔިތުން ކުރާ މަސައްކަތުގައި ސަރުކާރާއި ރާއްޖޭގެ ސިޔާސީ ޕާޓީތައް ވެސް ބައިވެރިވާން އޭނާ ގޮވައިލެއްވި އެވެ.
