ރައްޔިތުންގެ މަޖިލީހުގެ ސްޓޭޓް އޯން އެންޓަޕްރައިސަސް (އެސްއޯއީ) ކޮމެޓީން އިން ލިޔުމުން ހޯދަން އެދުނު މައުލޫމާތު ތަކެއް ނުލިބުމުން އެސްޓީއޯގެ ވެރިން އެ ކޮމެޓީ އަށް ހާޒިރު ކުރުމަށް ފާސްކޮށްފި އެވެ.
އެސްއޯއީ ކޮމެޓީން މިއަދު ބޭއްވި ބައްދަލުވުމަށް އެޖެންޑާ ކޮށްފައިވާ މައްސަލަ އަކީ، އެސްޓީއޯ އިން މައުލޫމާތު ހޯދުމަށް އެދި ފޮނުވި ހަތަރު ސިޓީ އަށް އެ ކުންފުނިން އެއްވެސް ޖަވާބެއް ދީފައި ނުވާ މައްސަލަ އެވެ. ސިޓީ އަށް ޖަވާބު ދިނުމަށް ހަދާންކޮށްދީ ތަކުރާރުކޮށް ސިޓީ ފޮނުވުމުން ވެސް، އެސްޓީއޯ އިން އެއްވެސް ސިޓީ އަކަށް ޖަވާބު ދީފައި ނުވާކަން ކޮމިޓީން ފާހަގަ ކުރި އެވެ.
އެސްއީއޯ ކޮމެޓީން ނިންމީ އެ ސީޓި ތަކުގެ ޖާވާބު ހޯދުމަށް އެސްޓީއޯގެ މެނޭޖިން ޑިރެކްޓަރާއި ފްރޮކިޔުމަންޓް ހެޑާއި މެޑިކަލް ޑިޕާޓްމަންޓްގެ ވެރިން ކޮމެޓީ އަށް ހާޒިރު ކުރުމަށެވެ. އެސްއޯއީ ކޮމެޓީން އެދިފައި ވަނީ އެސްޓީއޯ އިން ކޮން މައުލޫމާތެއް ހޯދުމަށް ކަމެއް ސާފުވެފަ އެއް ނުވެ އެވެ.
އެސްއޯއީ ކޮމެޓީގެ މަސްއޫލިއްޔަތުގެ ތެރޭގައި ދައުލަތުން ހިންގާ، ނުވަތަ ދައުލަތުން ޙިއްސާވާ ކުންފުނިތަކާއި ވިޔަފާރި އިދާރާތައް ހިންގަމުންދަނީ، ނުވަތަ ހިންގަނީ ހަރުދަނާ ވިޔަފާރި އުސޫލުންތޯ ބެލުމާއި، އެ އިދާރާތަކުގެ ހިންގުން އިތުރަށް ހަރުދަނާކުރުމަށް އެއިދާރާތަކުން މަސައްކަތްކޮށްފައިވޭތޯ ބެލުމާއި، އެ އިދާރާތަކުގެ މާލީ ހާލަތު ދަނީ އަހަރުން އަހަރަށް ހަރުދަނާ ވަމުންތޯ ނުވަތަ ނިކަމެތި ވަމުންތޯ ބެލުމާއި، އަދި އެ އިދާރާތަކުގެ ހިއްސާގެ ފައިދާ އަހަރުން އަހަރަށް ދައްކަމުން ގޮސްފައިވާ ގޮތް ބެލުން ހިމެނެ އެވެ.
އެގޭ އިތުރުން ދައުލަތުން ހިއްސާވާ ކުންފުނިތަކުގެ ތެރެއިން އެކަށީގެންވާ ފައިދާ ނުލިބޭ ތަންތަނުން އިސްލާހީ ފިޔަވަޅުތައް އަޅާފައިވޭތޯ ބެލުމާއި، އަދި އަޅާފައިވާ ފިޔަވަޅުތަކުގެ ނަތީޖާ ދިރާސާކުރުން ވެސް ހިމެނެއެވެ.
