ސަރުކާރުން ކުރިއަށް ގެންދާ ބިންވެރިޔާ އަދި ގެދޮރުވެރިޔާ ސްކީމަށް ކުރިމަތިލުމުގެ ސުންގަޑި މިއަދު ހަމަވިއިރު 40،500 އަށް ވުރެ ގިނަ ފޯމު ލިބިފައިވާ ކަމަށް ހައުސިން މިނިސްޓްރީން ބުނެފި އެވެ.
އެ މިނިސްޓްރީން ބުނީ ބިންވެރިޔާ ސްކީމްގެ ދެ ވަނަ ފޭސްއަށް 19,347 ފޯމު ހުށަހަޅާފައިވާ ކަމަށެވެ. އަދި ގެދޮރުވެރިޔާ ސްކީމަށް 21،247 ފޯމު ހުށަހެޅި ކަމަށް މިނިސްޓްރީން ބުންޏެވެ.
އެ ސްކީމުގެ ދަށުން ގޯތި ދޫކުރަނީ ބިންވެރިޔާ ސްކީމުގަ އެވެ. ގެދޮރުވެރިޔާގެ ސްކީމުގެ ދަށުން ދޫކުރަނީ ފްލެޓެވެ. އެ ދެ ސްކީމުގެ ދަށުން، މާލެގައި އުޅޭ 20 އަހަރުވެފައިވާ މީހުންނާއި މާލޭގެ ދަފުތަރުގައި ޖެހިފައިވާ މީހުންނަށް ގޯއްޗާއި ފްލެޓަށް ކުރިމަތިލެވެ އެވެ.
އެ ސްކީމުގެ ދެ ވަނަ ފިޔަވަހީގެ ދަށުން ގޯތި ދިނުމަށް ނިންމާފައި ވަނީ އުތުރު ތިލަފަޅުން ކަމަށް ރައީސް އިބްރާހިމް މުހައްމަދު ސޯލިހު ވިދާޅުވެފައިވެ އެވެ. ގޯތި ދިނުމަށް އެ ފަޅުން އަލުން 215 ހެކްޓަރު ހިއްކާނެ އެވެ.
ބިންވެރިޔާ ސްކީމުގެ ދެ ވަނަ ފިޔަވަހިން ބަންޑާރަ ގޯތި ދޫކުރަނީ ގިރާވަރު އުތުރުފަޅުންނެވެ. މި ސްކީމުގެ ދަށުން ގޯތި ދޫކުރަން ކަނޑައަޅައިފައިވާ ބިމުގެ ޖުމުލަ ބޮޑުމިނަކީ 5.53 މިލިއަން އަކަފޫޓެވެ. އެންމެ ކުޑަކޮށް ލިބޭނީ 1250 އަކަފޫޓުގެ ގޯއްޗެވެ. ހަތް މީހުންނަށް ވުރެ ގިނަ މީހުން ޖޮއިންޓް އެޕްލިކޭޝަނުގައި ބައިވެރިވާ ނަމަ، އެ އެޕްލިކޭޝަނަށް ލިބޭނީ، ޖުމުލަ 4,000 އަކަފޫޓެވެ. އެއީ އެންމެ ބޮޑުކޮށް ދޫކުރާ ގޯއްޗެވެ.
ގޯއްޗަށް އެދެވޭނީ، ގޯއްޗެއް ނެތް، 18 އަހަރު ފުރިފައިވާ ދިވެހިންނަށެވެ. މި ސްކީމުން ދޫކުރާ ގޯއްޗަށް މާލޭގައި ދިރިއުޅޭތާ، މަދުވެގެން 20 އަހަރު ވެފައިވާ މީހާ އާއި އެއްވެސް އިރެއްގައި މާލެ ނޫން އެހެން ރަށެއްގެ ރަށްވެހިންގެ ރަޖިސްޓަރީގައިގައި ހިމެނިފައި ނެތް މީހުންނަށް ހުށަހެޅޭނެ އެވެ.
