އިޒްރޭލުން ހިސާރުކޮށްފައި އޮންނަތާ 17 އަހަރު ވެފައިވާ ގާޒާގައި ވެރިކަންކުރާ ހަމާސް ޖަމާއަތުން ރަހީނުކުރި 222 މީހުންގެ ތެރެއިން ދެ އަންހެނަކު ދޫކޮށްލައިފި އެވެ.
އުމުރުން ދުވަސްވެފައިވާ މި ދެ އަންހެނުން ދޫކޮށްލާ މަންޒަރު ފެންނަ ވީޑިއޯއެއް ހަމާސްއިން އާންމުކޮށްފައިވާއިރު، އެމީހުން ހަވާލުކޮށްފައިވަނީ ގާޒާގައި ހަރަކާތްތެރިވާ ރެޑް ކްރޮސްގެ ޓީމަކާ އެވެ.
ހަމާސްއިން ދޫކޮށްލާފައިވަނީ ލޮޗޭ ލިފްޝިޒް، 85، އަދި ނޫރިތު ކޫޕާ، 79 އެވެ. އެ ޖަމާއަތުގެ ހަމަލާތަކުގައި މިހާތަަނަށް އިޒްރޭލުން 1400 އަށްވުރެ ގިނަ މީހުން ވަނީ މަރުވެފަ އެވެ. އޭގެ ތެރޭގައި 300 ސިފައިން ހިމެނެ އެވެ.
މި ދެ މީހުން ދޫކޮށްލީ ގަތަރާއި މިސްރު ގުޅިގެން ހަމާސްއާއެކު ބޭއްވި ސުލްހައިގެ މަޝްވަރާތަކަށްފަހު އެ ދެ މީހުންގެ ސިއްހީ ހާލަތަށް ބެލުމަށްފަހު ކަމަށް ހަމާސްގެ ތަރުޖަމާނަކު ވަނީ ބުނެފަ އެވެ. ނަމަވެސް މިކަމުގެ ސަބަބުން ފަލަސްތީނަށް ލިބޭނެ ފައިދާއެއް އެއްބަސްވެފައިވާކަމެއް ނޭނގެ އެވެ.
މީގެ ދެ ދުވަސް ކުރިންވެސް ހަމާސްއިން ވަނީ ދެ ރަހީނުން ދޫކޮށްލަން ނިންމާފައިވާކަން އިޒްރޭލަށް އަންގާފަ އެވެ. ނަމަވެސް އިޒްރޭލުން ވަނީ މިއީ ހަމާސްގެ ޕްރޮޕެގެންޑާ ފެތުރުމަށް ކުރާ ކަމެއް ކަމަށް ބުނެ ދެ ރަހީނުންނާ ހަވާލުވުމާ ދެކޮޅު ހަދާފަ އެވެ.
މި މަހު ހަތެއްގައި ހަމާސްއިން ދިން ހަމަލާތަކާއެކު އިޒްރޭލުން ދަނީ ވޭތުވެދިޔަ 75 އަހަރު ފަލަސްތީނާ ދެކޮޅަށް ހިންގަމުންދާ ގަތުލްއާމު ވަރުގަދަކޮށް، ހަނގުރާމަ އިއުލާނުކޮށް ވަރުގަދަ ހަމަލާތަކެއް ދެމުންނެވެ. މި މަހުގެ ހަތްވަނަ ދުވަހު ފެށި މި ހަމަލާތަކުގައި ފަލަސްތީނުގެ 5،087 މީހުން ވަނީ ޝަހީދުކޮށްލާފަ އެވެ.
ހަމަލާތަކުގެ އިތުރުން އިޒްރޭލުން ވަނީ ގާޒާއިން ފެނާއި ކަރަންޓު އަދި ތެޔޮ ކަނޑާލާ އެހީ ލިބޭ ބޯޑަރުތައް ބަންދުކޮށްފަ އެވެ. އެ ހިދުމަތްތައް ކަނޑާލިތާ މިއަދަށް 14 ދުވަސްވީއިރު، މިސްރުގެ ރަފާހު ބޯޑަރު ހުރަސްކޮށް ގާޒާއަށް އެހީގެ ގޮތުގައި ވަދެފައިވަނީ 50 އަށްވުރެ މަދު އުޅަނދެވެ.
މި ހަމަލާތަކުގެ ކުރިން ދުވާލަކު ގާޒާއަށް 100 އަށްވުރެ ގިނަ އެހީގެ އުޅަނދު ވަދެ އެވެ. މިހާރުވެސް އެތައް ސަތޭކަ އެހީގެ އުޅަނދެއް އެ ބޯޑަރުގައި އޮތް ނަމަވެސް އިޒްރޭލުން ހުއްދަނެތި ގާޒާއަށް ވަންނަން އުޅެފި ނަމަ ހަމަލާދޭނެ ކަމަށް ބުނެފަ އެވެ.
