އިންތިހާބީ ރައީސް ޑރ. މުހައްމަދު މުއިއްޒު އަދި ޕީއެންސީއިން އެކުލަވާލާ ސަރުކާރަކުން ލިބޭ މަގާމުތަކަށްވުރެ މުހިންމީ އެ ޕާޓީން ގަބޫލުކުރާ މިންގަނޑުގެ ތެރެއިން އާ ސަރުކާރުގެ ސިޔާސަތުތައް ބައްޓަންވުން ކަމަށް ޑިމޮކްރެޓްސްގެ އިންތިގާލީ ޗެއާޕާސަން ހެންވާރު ހުޅަނގު ދާއިރާގެ މެންބަރު ހަސަން ލަތީފު ވިދާޅުވެއްޖެ އެވެ.
ހ.މައިޒާންދޮށު ގޭގައި މިއަދު ބޭއްވި ނޫސްވެރިންގެ ބައްދަލުވުމެއްގައި ނޫސްވެރިޔަކު ކުރި ސުވާލަކަށް ޖަވާބު ދެއްވަމުން ހަސަން ލަތީފު ވިދާޅުވީ، އަލަށް އެކުލަވާލެވޭ ސަރުކާރުގައި ބައިވެރިވުމާމެދު ކުރެވޭ މަޝްވަރާތައް އަދިވެސް ކުރިއަށްދާ ކަމަށެވެ.
އެގޮތުން ޑިރެކްޓާ ޖެނެރަލް އޮފް ޓްރާންސިޝަން އަބްދުލްރަހީމް އަބްދުﷲ އާ އެކުވެސް މި މަހުގެ ތެރޭ ބައްދަލުކޮށް ޕީއެންސީގެ ސަރުކާރުގައި ޑިމޮކްރެޓުން ދެކެން ބޭނުންވާ ކަންކަން ހިއްސާކުރެއްވި ކަމަށް އޭނާ ވިދާޅުވި އެވެ.
"އަޅުގަނޑުމެން މިއުޅެނީ ކޮންމެހެން ސަރުކާރެއްގެ ކިތައް މަގާމުގަތޯ ޑިމޮކްރެޓްސް ތިބޭނީ [ބެލުމަށް] އެވާހަކަތަކެއް ނޫނޭ އެހާ ބޮޑަކަށް ދައްކަމުން މިދަނީ، އެއަށްވުރެ ބޮޑަށް ބޭނުމޭ އަޅުގަނޑުމެން ހިމެނޭ ސަރުކާރެއްގަ ވެއްޖިއްޔާ އަޅުގަނޑުމެން ބޭނުންވާ ސިޔާސަތުތަކެއް ރައީސް އަދި ސަރުކާރުން ހިންގުން"
ތަފުސީލުކޮށްދެއްވަމުން ހަސަން ލަތީފު ވަނީ ފަރުދީ ތަނަވަސްކަމާއި އަބުރުވެރި ހަޔާތެއް ރައްޔިތުންނަށް ލިބޭނެ ގޮތެއް ހެދުމާއި ސަރުކާރު ހިއްސާވާ ކުންފުނިތަކުގެ މުވައްޒަފުންގެ އަދަދާއި ކޮރަޕްޝަނުގެ މައްސަލަތައް ބެލޭނެ ސިޔާސަތުތަކެއް އާ ސަރުކާރުން ބައްޓަން ކުރުމަށް ބައްދަލުވުންތަކުގައި އެދި، ފެހި ސިގްނަލް ލިބިފައިވާ ކަމަށް ވިދާޅުވެފަ އެވެ.
އެހެން ނަމަވެސް، ސިޔާސަތުގެ ތަކުގެ އިތުރުން އެކަންކަން ތަންފީޒުކުރުމަށް ސަރުކާރުގައި ހިމެނޭ ޕާޓީއެއްގެ ގޮތުން ބައިވެރިވާން ޖެހޭ ކަންކަން ހުންނާނެ ކަމަށާއި އެކި ލެވެލްތަކުގައި ޑިމޮކްރެޓުން ޝާމިލްވާނެ ކަމުގެ ޔަގީންކަން ޕީއެންސީއިން ދީފައިވާ ކަމަށްވެސް މީގެ ކުރިން އެމްޑީޕީގެ ޗެއާޕާސަންކަންވެސް ކުރެއްވި ހަސަން ލަތީފު ވިދާޅުވި އެވެ.
ޑިމޮކްރެޓްސް އެމްޑީޕީ ތެރޭގައި ޖެހުނު މައްސަލަތަކަށްފަހު އެ ޕާޓީގެ ކުރީގެ ރައީސް އަދި ރައްޔިތުން މަޖިލީހުގެ ރައީސް މުހައްމަދު ނަޝީދު އިސްވެ ހުންނަވާ އުފެއްދެވި ޕާޓީއެކެވެ. އެމްޑީޕީގެ 13 މަޖިލިސް މެންބަރަކާވެސް އެކު އުފެއްދި ޑިމޮކްރެޓްސް އިން ރިޔާސީ އިންތިހާބުގައި ތިންވަނައަށް އެންމެ ގިނަ ވޯޓު ހޯދި އެވެ.
ދެވަނަ ބުރުގައި އެމްޑީޕީ އަދި ޕީއެންސީއާއެކު މަޝްވަރާ ތަކެއް ކުރި ނަމަވެސް އެ ޕާޓީން ނިންމީ ރަސްމީކޮށް ވަކި ކެންޑިޑޭޓަކަށް ތާއީދުނުކުރުމަށެވެ. ނަމަވެސް، ޕާޓީގެ ލީޑަޝިޕުގެ ބައެއް މެންބަރުންނާއި އާންމު މެންބަރުން ވަނީ ދެވަނަ ބުރުގައި ޕީއެންސީއަށް ކެމްޕޭން ކޮށްދެއްވާފަ އެވެ. އިންތިހާބީ ރައީސް ޑރ. މުއިއްޒުވެސް ވަނީ ދެވަނަ ބުރުގައި ޑިމޮކްރެޓުންގެ އެހީތެރިކަން ލިބުނުކަން ފާހަގަކުރައްވާފަ އެވެ.
އެއާއެކު އަލަށް އުފެދޭ ސަރުކާރުގައި ޑިމޮކްރެޓުން ބައިވެރިވުމަށް ޕީއެންސީއާއެކު މަޝްވަރާތައް ވަނީ ފަށާފަ އެވެ. ނަމަވެސް، އާ ސަރުކާރުން ލިބޭ މިންވަރެއް ނުވަތަ މަގާމުތަކެއް ދެ ޕާޓީން ކުރެ ޕާޓީއަކުން އަދި ރަސްމީކޮށް ބުނެފައެއް ނުވެ އެވެ.
