ފަލަސްތީނާއެކު ދިވެހީން ތިބިކަން ހާމަކޮށް ފަލަސްތީނު މިނިވަންކުރަން ގޮވާލަން މާލޭގައި މިރޭ ބޭއްވި ބޮޑު ހިނގާލުމަށް ގިނަ ބަޔަކު ބައިވެރިވެ، އިޒްރޭލުގެ އަނިޔާވެރިކަމާ ދެކޮޅަށް އަޑު އުފުލައިފި އެވެ.
ރަސްފަންނު ބީޗުން ފެށި މި ހިނގާލުމުގައި ފަލަސްތީނުގެ ދިދަ ތަކާއި އިޒްރޭލުގެ އަނިޔާވެރިކަމާ ދެކޮޅު ޝުއޫރުތައް ލިޔެފައި ހުރި ބޯޑުތަކާއި އިޒްރޭލު ބޮއިކޮޓްކުރަން ގޮވާލާ ބޮޑު ހިފައިގެން ތިބި އެތައް ސަތޭކަ ބަޔަކު ވަނީ ބައިވެރިވެފަ އެވެ. އޭގެ ތެރޭގައި ގިނަ އަދަދެއްގެ ކުޑަކުދިންވެސް ހިމެނެ އެވެ.
އެ ހިނގާލުމުގައި އެއް އަޑަކުން އިވެމުން ދިޔައީ ތަކުރީބުގެ އަޑާއި ފަލަސްތީނު މިނިވަން ކުރުން ގޮވާ އަޑެވެ. އަދި އިޒްރޭލު ބޮއިކޮޓް ކުރުމަށާއި ރާއްޖެއިން އިޒްރޭލުގެ ޕާސްޕޯޓް ބޭން ކުރަން ވެސް ހިނގާލުމުގެ ބައިވެރިން ވަނީ އަޑުހަރުކޮށް ތަކުރާރުކޮށް ގޮވާލާފަ އެެވެ.
މިރޭގެ އެއްވުމުގެ ތެރެއިން: ހިނގާލުން ބޭއްވީ މަޖީދީ މަގުގައި -- ފޮޓޯ: އަބްދުﷲ އިޔާން / އަދަދު
ފަލަސްތީނުގެ ގާޒާގައި އިޒްރޭލުން ހިންގަމުންދާ ލާއިންސާނީ އަމަލުތަކުގެ ސަބަބުން އިޒްރޭލާ ދެކޮޅު މާހައުލެއް ދިވެހިރާއްޖޭގައި އުފެދި، ވަރުގަދަވަމުންދާ ކަމަށް ބުނެ އެ ގައުމުގެ ރަައްޔިތުންގެ ރާއްޖެއަށް ދަތުރު ނުކުރުމަށް އިޒްރޭލުގެ ފޮރިން މިނިސްޓްރީން ވެސް ވަނީ ޓްރެވަލް އެޑްވައިޒަރީއެއް ނެރެފަ އެވެ.
އޮކްޓޯބަރު 7، އިން ފެށިގެން މެދުކެނޑުމެއްނެތި އިޒްރޭލުން އަންނަނީ ގާޒާއަށް ބޮން އަޅަމުންނެވެ. ގާޒާގެ އާއްމުން އުޅޭ ތަންތަނަށާއި ހޮސްޕިޓަލުތަކަށްވެސް އިޒްރޭލުން ބޮން އަޅައި އެތައް ތަނެއް ވަނީ ސުންނާފަތިކޮށް ބިމާ ހަމަކޮށްފަ އެވެ. އަދި ގާޒާ އިން ކަރަންޓާއި ފެނާއި ކަނޑާލާފައިވާއިރު ކާބޯތަކެއްޗާއި ތެޔޮ ފަދަ އަސާސީ ތަކެތި އެތެރެކުރުން ވެސް އިޒްރާއިލުން ވަނީ ހުއްޓުވާފަ އެވެ.
މި ލާއިންސާނީ ހަމަލާތަކުގައި މިހާތަނަށް 4،137 މީހުން ވަނީ ޝަހީދުވެފަ އެވެ. އޭގެ ތެރޭގައި 1،661 ކުޑަކުދިން ހިމެނެ އެވެ. އަދި މި ހަމަލާތަކާއި ގުޅިގެން ދުނިޔޭގެ އެކި ގައުމުތަކުގައި އިޒްރޭލާ ދެކޮޅަށް އަޑު އުފުލައި އެއްވުންތައް އަންނަނީ ބާއްވަމުންނެވެ.
