ގާޒާގެ ރައްޔިތުންނާ ދެކޮޅަށް އިޒްރޭލުން ދޭ ހަމަލާތަކާ ގުޅޭގޮތުން ބާއްވާ އޯގަނައިޒޭޝަން އޮފް އިސްލާމިކް ކޯޕަރޭޝަން (އޯއައިސީ)ގެ އެގްޒެކެޓިވް ކޮމިޓީގެ ކުއްލި ބައްދަލުވުމުގައި ރާއްޖެއިން ބައިވެރިވުމަށް ނިންމާފައިވާކަމަށް ފޮރިން މިނިސްޓްރީން ބުނެފި އެވެ.
ހާރިޖީ ވަޒީރުންގެ ފެންވަރުގައި މިއަދު މި ބައްދަލުވުން ބޭއްވުމަށް ހުށަހަޅާފައިވަނީ އިސްލާމިކް ސަމިޓާއި އޯއަސީގެ އެގްޒެކެޓިވް ކޮމިޓީގެ ޗެއާކަމުގައިވާ ސައުދީ އަރަބިއްޔާ އިންނެވެ. ބައްދަލުވުން ބޭއްވުމަށް ހަމަޖެހިފައިވަނީ ސައުދީ އަރަބިއްޔާގެ ޖިއްދާގައި ހުންނަ އޯއައިސީގެ މައި އޮފީހުގަ އެވެ.
މިއަދު 15:00ގައި އޮންނަ މި ބައްދަލުވުމުގައި ރާއްޖޭގެ ފަރާތުން ބައިވެރިވެވަޑައިގަންނަވަނީ ފޮރިން މިނިސްޓްރީގެ ސްޓޭޓް މިނިސްޓަރު އަހްމަދު ހަލީލް އެވެ.
ފޮރިން މިނިސްޓްރީން ބުނިގޮތުގައި އޯއަސީގެ އެގްޒެކެޓިވް ކޮމިޓީގެ ޗެއާއާއި އޯއަސީގެ ސެކްރެޓަރީ ޖެނެރަލް އަދި ފަލަސްތީނުގެ ހާރިޖީ ވަޒީރު ތަގްރީރުކުރައްވާނެ އެވެ. އަދި އެއަށްފަހު މި ބައްދަލުވުމުގައި ބައިވެރިވެވަޑައިގަންނަވާ ވަފްދުތަކުގެ އިސްވެރިންނަށް ތަގްރީރުކުރުމުގެ ފުރުސަތު އޮންނާނެ އެވެ.
ރާއްޖެ އޯއައިސީ ގުޅުނީ 1976 ވަނަ އަހަރެވެ. އެއަށްފަހު ދިވެހިރާއްޖެ އިން ދަނީ އެ ޖަމިއްޔާގެ ހަރަކާތްތަކުގައި ބައިވެރިވުމަށް އިސްކަންދީ، އޯއައިސީގެ މެމްބަރު ގައުމުތަކާ ގުޅިގެން އިސްލާމީ ވަހުދަތު ދެމެހެއްޓުމަށް މަސައްކަތްކުރަމުންނެވެ.
އިޒްރޭލާ ދެކޮޅަށް ހަމާސްއިން ދިން ހަމަލާތަކުގައި އިޒްރޭލުން 1400 އަށްވުރެ ގިނަ މީހުން ވަނީ މަރާލާފަ އެވެ. ބަދަލުގައި އިޒްރޭލުން ހިންގަމުން އަންނަ ގަތުލުއާމުގައި މަރުވި މީހުންގެ އަދަދު، ރޭގެ ހަމަލާގެ ކުރިން ހުރީ 3،000 އަށްވުރެ މަތީގަ އެވެ.
