ފަލަސްތީނުގެ ރައްޔިތުންނާ ދެކޮޅަށް އިޒްރޭލުން ހިންގާ ހަނގުރާމައިގެ ޖަރީމާތައް ބައިނަލްއަގުވާމީ މުޖުތަމައުން ތަހުގީގު ކުރުމަށް ރައީސް އިބްރާހިމް މުހައްމަދު ސޯލިހު މިއަދު ގޮވާލައްވައިފި އެވެ.
ރާއްޖެ އިސްލާމްވި ދުވަހާ ގުޅިގެން ރައީސް ސޯލިހު ދެއްވި ހިތާބެއްގައި ވިދާޅުވީ ފަލަސްތީނުގެ މުސްލިމުންނާ ދެކޮޅަށް އިޒްރޭލުގެ ސިފައިން ހިންގާ "ލާއިންސާނީ، އަނިޔާވެރި" އަމަލުތައް އެންމެ ހަރުކަށި އިބާރާތުން އެމަނިކުފާނު ކުށްވެރިކުރާ ކަމަށެވެ. އަދި އެ ޖަރީމާތައް ތަހުގީގު ކުރުމަށް ހުރިހާ ދިވެހިންގެ ނަމުގައި ގޮވާލާ ކަމަށް ވެސް ރައީސް ވިދާޅުވި އެވެ.
"ގާޒާ އާއި ހުޅަނގު އައްސޭރީގައި ދިރިއުޅޭ ފަލަސްތީނުގެ މުސްލިމުންނާ ދެކޮޅަށް، އިސްރާއީލުގެ އިސްތިއުމާރީ ސިފައިން ހިންގާ ލާއިންސާނީ އަނިޔާވެރި އަމަލުތައް އަޅުގަނޑުމެން ކުށްވެރިކުރަނީ އެންމެ ހަރުކަށި ޢިބާރާތުން،" ރައީސް ވިދާޅުވި އެވެ. "ފަލަސްތީނުގެ މުސްލިމް އަހުންނާއި އުހުތުންނާ ދެކޮޅަށް، އިސްރާއީލުން ހިންގާ ހަނގުރާމައިގެ ޖަރީމާތަކާއި ލާއިންސާނީ އެންމެހައި އަމަލުތައް ތަހުގީގުކޮށް، ފަލަސްތީނުގެ ރައްޔިތުންނަށް އިންސާފު ހޯދައިދިނުމަށް، އެންމެހައި ދިވެހިންގެ ނަމުގައި ބައިނަލްއަގުވާމީ މުޖުތަމައަށް ގޮވައިލަން."
އޭގެ އިތުރުން ރައީސް ވިދާޅުވީ، ފަލަސްތީނުގެ ރައްޔިތުން، ކާފަރުންގެ އަތްމަތީގައި ޝަހީދުވަމުންދާ ދިޔުމަކީ އިސްލާމީ އުއްމަތަށް ލިބޭ ބޮޑު ހިތާމައެއް ކަމަށެވެ. އަދި ވިދާޅުވީ ޒަޔަނިސްޓު ޔަހޫދީން ފަލަސްތީނުގެ ބިންތަކަށް ވެރިވެގަނެ، މުސްލިމުންގެ މުގައްދަސް ބިނާތަކަށް ގެއްލުންދިނުމަކީ "އިސްލާމީ އުންމަތުގެ ހިތަށް ހެރިފައިވާ ނުހަނު ތޫނު ހަންޖަރެއް" ކަމަށެވެ.
"މާތްވެގެންވާ އިސްލާމް ދީނާ ގުޅިފައިވާ މިފަދަ އުފާވެރި ދުވަހެއް އަޅުގަނޑުމެން ފާހަގަކުރާއިރު، އިސްލާމީ އުންމަތުގެ އެތައް މިލިޔަން އަހުންނާއި އުހުތުންނެއް، ގައިރު މުސްލިމުންގެ އަނިޔާވެރި ހަމަލާތަކުގައި ޝަހީދުވެ އަދި ޒަހަމްވަމުންދާކަމީ، މުޅި އިސްލާމީ އުންމަތަށް ލިބޭ ނުހަނު ބޮޑު ހިތާމައެއް،" ރައީސް ވިދާޅުވި އެވެ. "ޒަޔަނިސްޓު ޔަހޫދީން ފަލަސްތީނުގެ ބިމަށް ވެރިވެގަނެ، ފަލަސްތީނުގެ ރައްޔިތުން އަޅުވެތިކޮށް، އެ ބިމުގައިވާ މުސްލިމުންގެ މުގައްދަސް ބިނާތަކުގެ ހުރުމަތް ކަނޑަމުން ދިޔުމަކީ، އިސްލާމީ އުންމަތުގެ ހިތަށް ހެރިފައިވާ ނުހަނު ތޫނު ހަންޖަރެއް."
ފަލަސްތީނު މިނިވަން ކުރުމަށް ހަމާސް އިން އިޒްރޭލަށް ހަމަލާދޭން ފެށީ އޮކްޓޯބަރު 7، ގަ އެވެ. އޭގެ ފަހުންް އިޒްރޭލުން ވަނީ ފަލަސްތީނުގެ 3000 އަށް ވުރެ ގިނަ މީހުން މަރާލައިފަ އެވެ. އޭގެ ތެރޭގައި ކުޑަކުދިން ވަރަށް ގިނަ އެވެ. އަދި އެ ހަމަލާތަކުގައި ފަލަސްތީނުގެ 10،000 އަށް ވުރެ ގިނަ މީހުންނަށް ވަނީ އަނިޔާވެފަ އެވެ. އިޒްރޭލުގެ 1400 އެއްހާ މީހުން ވަނީ މަރުވެފަ އެވެ.
އިޒްރޭލުގެ ވެރިން ގޮވަމުންދަނީ ފަލަސްތީނުގެ ހުރިހާ ރައްޔިތުން މެރުމަށެވެ. ގާޒާއިން އާންމުން ނުކުތުމަށް ގޮވާލުމަށްފަހު، ނުކުންނަން މަސައްކަތް ކުރި މީހުން ވެސް އިޒްރޭލުން ދަނީ މަރަމުންނެވެ. އަދި ގާޒާއިން ފެނާއި ކަރަންޓު ވެސް ވަނީ ކަނޑާލައިފަ އެވެ. އަދި ހާއްސަކޮށް، އަނިޔާވާ މީހުންނަށް އެހީވުމަށް މަސައްކަތް ކުރާ މީހުންނާއި ތަކެއްޗަށް ވެސް ދަނީ ގެއްލުންދެމުންނެވެ.
