އިޒްރޭލުން ފަލަސްތީނުގެ ޣައްޒާއަށް ދެމުންގެންދާ ހަމަލާތަކާއި ފަލަސްތީނު މީހުންނާ ދެކޮޅަށް ހިންގާ އެހެން ޖަރީމާތައް ކުށްވެރިކޮށް ރައްޔިތުންގެ މަޖިލީހަށް ގަރާރެއް ހުށަހަޅާފައި ވަނިކޮށް، ހަމަ އެ މޭރުމުން ހުށަހެޅި ކުއްލި މައްސަލައެއް އެޖެންޑާ ނުކުރަން މަޖިލީހުން ނިންމައިފި އެވެ.
ޖަލްސާގެ ރިޔާސަތު ބަލަހައްޓަވަން މިއަދު އިންނެވި، މަޖިލީހުގެ ނައިބުރައީސް އީވާ އަބްދުﷲ ވިދާޅުވީ ހޯރަފުށި ދާއިރާގެ މެމްބަރު އަހުމަދު ސަލީމް ހުށަހެޅުއްވި ކުއްލި މައްސަލަ އެޖެންޑާ ނުކުރީ އެއް މައްސަލައެއްގައި ގަރާރަކާއި ކުއްލި މައްސަލައެއް އެއް ފަހަރާ ހުށަހަޅައިފި ނަމަ ކުރިއަށް ގެންދެވޭނީ ގަރާރު ކަމަށެވެ. މަޖިލީހުގެ ގަވައިދު ތަންދެނީ އެގޮތަށް ކަމަށް ވެސް އޭނާ ވިދާޅުވި އެވެ.
"ގަރާރަކީ ހަގީގަތުގައި ދުރާލައި ނަތީޖާ ނެރެވޭ މަސައްކަތަކަށް ވާތީ ގަރާރައިގެން ކުރިއަށް ދިއުން. ކުއްލި މައްސަލައަކަށް ބަހުސް ކުރެވެނީ އެޖެންޑާގައި އެ މައްސަަލަ [ކުއްލި މައްސަލައިގެ މައުޞޫއުގައި ހުށަހަޅާފައި ބިލެއް ނުވަތަ ގަރާރެއް] ނުހިމެނޭ ނަމަ. އެހެން ނަމަވެސް އަޅުގަނޑުމެންނަށް މިވަނީ ހަމަ މި މައްސަލާގައި ރައްޔިތުންގެ މަޖިލީހަށް ކުރިއާ ލައި ގަރާރެއް ލިބި އަދި މިއަދު އެޖެންޑާކޮށްފައި،" އީވާ ވިދާޅުވި އެވެ.
އިޒްރޭލާ ދެކޮޅު ކުއްލި މައްސަލަ އެޖެންޑާ ނުކުރާތީ، ފަލަސްތީނު މައްސަަލައިގެ ބަހުސް ކުރިއަށް ގެންދިއުމުގެ ފުރުސަތު މިއަދު ނެތް ކަމަށް ވިދާޅުވެ، ކާށިދޫ ދާއިރާގެ އެމްޑީޕީ މެމްބަރު އަބްދުﷲ ޖާބިރު ކަންބޮޑުވުން ފާޅުކުރެއްވި އެވެ. ޖާބިރު ކަންބޮޑުވުން ފާޅުކުރެއްވުމުން، އެކަން އިތުރަށް ތަފްސީލު ކޮށްދެއްވި އެވެ.
ޖާބިރު ވިދާޅުވީ ގަވައިދުގައި ހުންނަ އަކުރު އަކުރުގައި ހިފައިގެން މިފަދަ މުހިއްމު މައްސަލަތައް އެޖެންޑާ ނުކުރުން ރަނގަޅުނޫން ކަމަށެވެ.
އީވާ ވިދާޅުވީ އިޒްރޭލާ ދެކޮޅު ގަރާރު މިއަދަށް އެޖެންޑާ ނުކޮށް ކުއްލި މައްސަލަ އެޖެންޑާކުރަން ގަރާރު ހުށަަހެޅުއްވި މެމްބަރަށާއި ކުއްލި މައްސަލަ ހުށަހެޅުއްވި މެމްބަަރަށް ރިޔާސަތުން ފުރުަސަތު ދިން ކަމަށެވެ. އެހެން ނަމަވެސް ގަރާރު ހުށަހެޅުއްވި މެމްބަރު (ވިލިނގިލި ދާއިރާގެ އެމްޑީޕީ މެމްބަރު ސައުދު ހުސައިން) އެދިވަޑައިގެންނެވީ ގަރާރު މިއަދަށް އެޖެންޑާ ކުރަން ކަމަށެވެ.
ގަރާރު މިއަދަށް އެޖެންޑާކުރުމުން މިއަދު ކުރެވޭނެ ހަމަ އެކަނި ކަމަކީ ގަރާރުގެ ފުރަތަމަ ކިއުން އިއްވުމެވެ. ބަހުސަކަށް މިއަދު ހުޅުވައެއް ނުލެވޭނެ އެވެ. ކުއްލި މައްސަލަ އެޖެންޑާކުރި ނަމަ މިއަދު ވެސް ބަހުސް ކުރެވުނީހެވެ.
