ސިވިލް ސާވިސް ކޮމިޝަނުގެ ތެރެއިން މަގާމުތަކެއް އުފައްދައި، މި ސަރުކާރުގެ ސިޔާސީ އިސް މަގާމުތަކުގައި ތިއްބެވި ބޭފުޅުން އައްޔަނު ކުރުމުގެ މަސައްކަތް ކުރިއަށްދާ ކަމުގެ ތުހުމަތު އިންތިހާބީ ރައީސްގެ ޓްރާންސިޝަން ކޮމެޓީގެ ޑިރެކްޓަރު ޖެނެރަލް އަބްދުއްރަހީމް އަބްދުﷲ ކުރައްވައިފި އެވެ.
މިއަދު އޮތް ނޫސްވެރިންގެ ބައްދަލުވުމުގައި ވާހަކަ ދައްކަވަމުން އަބްދުއްރަހީމް ވިދާޅުވީ، މި ސަރުކާރުގެ ސިޔާސީ އިސް މަގާމުތަކުގައި ތިއްބެވި ބޭފުޅުންނަށް މިހާރު ލިބޭ ފަދަ މުސާރައެއް ލިބޭ މަގާމެއް ސިވިލް ސާވިސްގެ ތެރެއިން އުފެއްދުމުގެ މަސައްކަތް ކުރަމުންދާ ކަމުގެ މައުލޫމާތު ލިބިފައިވާ ކަމަށެވެ.
އެގޮތުން މިހާރު ސިޔާސީ މަގާމުތަކުގައި ތިބި ބޭފުޅުންނަކީ އައު ސަރުކާރުގެ ވިސްނުމާއި ތަފާތު ވިސްނުމެއް ގެންގުޅުއްވާނެ ބައެއް ކަމުގައި އަބްދުއްރަހީމް ފާހަގަކުރެއްވި އެވެ. އަދި މިހާރު ތިއްބެވި ބޭފުޅުންނަށް ދެން އަންނަ ސަރުކާރެއްގެ ތެރޭގަ ތިބެވޭ ގޮތަށް ސިވިލް ސާވިސްގަ މަގާމު އުފެއްދުމަކީ އެއީ އެއްގޮތަކަށް ވެސް ކޮށްގެން ވާނެ ކަމެއް ނޫން ކަމުގައި އަބްދުއްރަހީމް ވިދާޅުވި އެވެ.
"މި ސިޔާސީ މަގާމުތަކުގަ ތިއްބެވި ބޭފުޅުން އަނެއްކާ ދެން އަންނަ ސަރުކާރެއްގެ ތެރޭގަ ތިބެވޭ ގޮތަށް ސިވިލް ސާވިސްގަ މަގާމު އުފައްދައިގެން އެ ބޭފުޅުންނަށް މަގާމުގެ ދިނުމުގެ ވިސްނުން ގެންގުޅުމަކީ އެއީ އެއްގޮތަކަށް ވެސް ކޮށްގެން ވާނެ ކަމެއް ނޫން،" އަބްދުއްރަހީމް ފާހަގަކުރެއްވި އެވެ.
އަބްދުލްރަހީމް ވަނީ އިތުރު މަގާމުތަކެއް ނުއުފެއްދުމަށް ސިވިލް ސާވިސް ކޮމިޝަނުގެ ރައީސް މުހައްމަދު ނާސިހަށް ގޮވާލައްވާފަ އެވެ.
"އަޅުގަނޑު ދަންނަވާލަން ބޭނުންވަނީ ސިވިލް ސާވިސް ކޮމިޝަނުގެ ރައީސަށް އެއްގޮތަކަށް ވެސް މިކަން [މަގާމުތައް އުފައްދައިގެން ސިޔާސީ ބޭފުޅުން އައްޔަނުކުރުން] ނުކުރައްވާށޭ މިއީ ކޮށްގެން ވާނެ ކަމެއް ނޫނޭ،"
މިއަދުގެ ނޫސްވެރިންގެ ބައްދަލުވުމުގައި އަބްދުލްރަހީމް ވަނީ އިންތިގާލީ މަރުހަލާގެ ތެރޭގައި ގައުމުތަކަށް އާ ސަފީރުން ހަމަޖެއްސުން ވެސް ކުށްވެރި ކުރައްވާފަ އެވެ.
