ފަލަސްތީނުގެ ހަމާސް ޖަމާއަތާ ދެކޮޅަށް ހަނގުރާމަ އިއުލާނުކުރުމާ ގުޅިގެން އިޒްރޭލުގައި ވެރިކަންކުރާ ޕާޓީ އާއި އިދިކޮޅު ޕާޓީ ގުޅިގެން ހަނގުރާމައިގެ ހާލަތަށް ކުއްލި ސަރުކާރެއް އެކުލަވާލައިފި އެވެ.
އިޒްރޭލުން ކުއްލި ސަރުކާރު ރޭ އިއުލާނުކުރިއިރު، ވޭތެވެދިޔަ ދެ ދުވަހު އިޒްރޭލުގެ ބޮޑު ވަޒީރު ބެންޖަމިން ނަތަންޔާހޫ އާއި އިދިކޮޅު ނޭޝަނަލް ޕާޓީގެ ލީޑަރު ބެނީ ގާންޒް ވަނީ ދިގު މަޝްވަރާތަކެއް ބާއްވާފަ އެވެ. ދެ ޕާޓީގެ ލީޑަޝިޕުން ވެސް ރޭ ނިންމީ ހިޔާލު ތަފާތުވުންތައް އެއްފަރާތްކޮށް އެންމެން އެކުލެވޭ ސަރުކާރެއް އުފެއްދުމަށެވެ.
"އަމާންކަމުގެ ވަގުތުތަކާއި ހަނގުރާމައިގެ ވަގުތުތައްވޭ، މިއީ ހަނގުރާމައިގެ ވަގުތު" ކުރިން އިޒްރޭލުގެ ޑިފެންސް މިނިސްޓަރުކަން ވެސް ކުރި ގާންޒް ރޭ ބުންޏެވެ.
އަލަށް އުފެއްދި ސަރުކާރުން އެއްވެސް ގާނޫނެއް ފާސްކުރުން އަދި ހަނގުރާމައާ ނުގުޅޭ ނިންމުންތަކެއް ނުނިންމާނެ އެވެ. ކުއްލި ސަރުކާރާއެކު އިޒްރޭލުން އަންނަނީ މިދިޔަ ހޮނިހިރު ދުވަހު ފެށި ހަނގުރާމަ އިތުރަށް ވަރުގަދަ ކުރުމަށް ތައްޔާރުވަމުންނެވެ.
އިޒްރޭލުން މިހާތަނަށް ދިން ހަމަލާތަކުގައި ޝަހީދުވި ފަލަސްތީނު ރައްޔިތުންގެ އަދަދު މިހާރު ވަނީ 1227 އަށް އަރާފަ އެވެ. އެއީ ގާޒާގައި ޝަހީދުވި 1200 މީހަކާއި ހުޅަނގު އައްސޭރީގައި ޝަހީދުވި 27 މީހެކެވެ.
ހަމާސް ގެ އިތުރުން ލުބުނާނުގެ ހިޒްބުﷲ އަދި ސީރިއާއިންވެސް އިޒްރޭލަށް ހަމަލާދެމުންދާއިރު، ހަމަލާތަކުގައި މަރުވި މީހުންގެ އަދަދު ވަނީ 1200 އަށްވުރެ މައްޗަށް އަރާފަ އެވެ.
ހަމާސްއަށް ދަތިކުރުމަށް ކަމަށް ބުނެ އިޒްރޭލުން މިހާރު ވަނީ ގާޒާއަށް ފޯރުކޮށްދޭ ކަރަންޓާއި ފެނުގެ ހިދުމަތްތައްވެސް ކަނޑާލާފަ އެވެ. އަދި އެއްވެސް ގޮތަކަށް ގާޒާއަށް އެހީ ފޯރުކޮށްދިނުމުގެ މަގުތައްވެސް އިޒްރޭލުން ވަނީ ބަންދުކޮށްފަ އެވެ.
އެކި ގައުމުތަކާއި ބައިނަލްއަގުވާމީ ޖަމްއިއްޔާތަކުން ގާޒާއަށް އިންސާނީ އެހީ ފޯރުކޮށްދިނުމުގެ ފުރުސަތައް އެދެމުންދިޔަ ނަމަވެސް، އިޒްރޭލުން އެ އެދުންތަކަށް ދީފައިވަނީ ބީރު ކަންފަތެކެވެ.
