އިޒްރޭލުން އެއްކަމާއި ކަނޑާއި ވައިގެ މަގުން ހިސާރުކޮށްފައި އޮންނަތާ 17 އަހަރު ވެފައިވާ ގާޒާއަށް މެދު ނުކެނޑި ބޮންއެޅުމުގެ ސަބަބުން އެޝަހަރުން ކަރަންޓު ކެނޑިފައި ވާއިރު ހޮސްޕިޓަލުތަކަށް ކަރަންޓުދޭ ޖަނަރޭޓަރުތަކަށް ބޭނުންވާ ތެޔޮ ވެސް މާދަމާއަށް ހުސްވާނެ ކަމަށް ފަލަސްތީނުގެ ހެލްތު މިނިސްޓްރީން ބުނެފި އެވެ.
ގާޒާއަށް ބޭނުންވާ ކަރަންޓުގެ 80 އިންސައްތަ ލިބެނީ އިޒްރޭލުންނެވެ. ހަނގުރާމައާއެކު އިޒްރޭލުން ވަނީ އެ ކަރަންޓު އަދި ފެންވެސް ގާޒާއަށް ކަނޑާލާފަ އެވެ. ގާޒާގައި ދެން ބޭނުންކުރާ 20 އިންސައްތަ ކަރަންޓަކީ ފަލަސްތީނު ދައުލަތުން އޮޕަރޭޓުކުރާ އިންޖީނުގެތައް އަދި ޖަނަރޭޓަރުތަކުން އުފައްދާ ކަރަންޓެވެ.
"ގާޒާގެ ހޮސްޕިޓަލުތަކަށް ބޭނުންވާ ކަރަންޓު އުފެއްދުމަށް ހުރި ތެލުގެ ސްޓޮކު މާދަމާ ހުސްވާނެ، ކަރަންޓު ހުސްވުމާއެކު ހޮސްޕިޓަލުތަކުގެ ހާލަތު ވަރަށް ގޯސްވާނެ ކަމަށް ބެލެވޭ" ފަލަސްތީނުގެ ހެލްތު މިނިސްޓަރު މައި ކައިލާ ގަތަރުގެ އަލްޖަޒީރާއަށް ވިދާޅުވި އެވެ.
އިޒްރޭލުން މިހާރު ވަނީ ގާޒާއަށް އެއްވެސް އެހީއެއް ފޯރުކޮށްދޭން މަސައްކަތްކުރާ އުޅަނދުތަކަށްވެސް ހަމަލާދޭނެ ކަމަށް ބުނެފަ އެވެ. ހާއްސަކޮށް މިސްރާ ގާޒާއާ ދެމެދު އޮންނަ ރަފާހް ބޯޑަރު ހުރަސްކޮށް އެހީ ފޯރުކޮށްދޭ އުޅަނދުތަކަށް ބޮން އަޅާނެ ކަމަށް އިޒްރޭލުގެ އަސްކަރިއްޔާއިން ވަނީ އިންޒާރުދީފަ އެވެ.
ފަލަސްތީނުގެ އޮފިޝަލުން ބުނާ ގޮތުން އިޒްރޭލުގެ ހަމަލާތަކުގައި މިހާތަނަށް ގާޒާއިން 950 މީހަކު ވަނީ ޝަހީދުވެފަ އެވެ. އަދި ޒަހަމްވެ ފަރުވާދެމުންދާ މީހުންގެ އަދަދު ވަނީ 5،000 އިން މައްޗަށް ގޮސްފަ އެވެ.
ހޮނިހިރު ދުވަހު ފެށި ހަނގުރާމާގައި އެންމެ ފުރަތަމަ ހަމަލާދިނީ ހަމާސްއިންނެވެ. އެއާއެކު އިޒްރޭލުން ވަނީ ހަނގުރާމަ އިއުލާންކޮށް މެދުކެނޑުމެއްނެތި ގާޒާއަށް ހަމަލާދެމުންނެވެ. ގާޒާއިންވެސް ދަނީ އިޒްރޭލަށް ވޭތުވެދިޔަ ހަތަރު ދުވަހު ހަމަލާދެމުންނެވެ. އޭގެއިތުރުން ލުބުނާނުގެ ހިޒްބުﷲ އިން އަދި ސީރިއާގެ ޖަމާއަތްތަކުންވެސް ވަނީ އިޒްރޭލަށް ހަމަލާދީފަ އެވެ.
