ޔަހޫދީން އަޅުވެތިކޮށްފައިވާ ފަލަސްތީނުގެ ގާޒާގައި ދިރިއުޅޭ މުސްލިމުންނާ ދެކޮޅަށް އިޒްރޭލުގެ އަސްކަރިއްޔާއިން ހިންގަމުންދާ ލާއިންސާނީ ޖަރީމާތަކާއި ގުޅިގެން އުފެދިފައިވާ ހަމަނުޖެހުންތައް އިތުރުވުން ހުއްޓުވައި އެ ސަރަހައްދުގައި އިންސާފު ގާއިމުކުރުމަށް ދަ ޑިމޮކްރެޓްސް އިން ގޮވާލައިފި އެވެ.
ޑިމޮކްރެޓްސް އިން މިއަދު ނެރުނު ބަޔާނެއްގައި ބުނީ ފަލަސްތީނުގައި ހިނގަމުންދާ ލާއިންސާނީ އަމަލުތަކާއި ކުށެއް ނެތް މީހުން މެރުމަކީ ދުވަހަކު ވެސް ބަލައިގަނެވޭނެ އަމަލުތަކެއް ނޫން ކަމަށާއި އެ ހަމަނުޖެހުންތަކުގައި އެތައް ފުރާނައެއް ގެއްލެމުންދާތީ އެކަމާ އެ ޕާޓީން ހިތާމަ ކުރާ ކަމަށެވެ.
އޭގެ އިތުރުން، ބައިނަލްއަގުވާމީ އިންސާނީ ގާނޫނުތަކާއި ފުރިހަމަ ރައްކާތެރިކަން ދެފަރާތުގެ އާންމުންނަށް ވެސް ލިބެންޖެހޭނެ ކަމަށް ވެސް އެ ޕާޓީން ބުންޏެވެ.
"އެ ސަރަހައްދުގެ ހާލަތު އިތުރަށް ގޯސްވުން ހުއްޓުވައި، އެ ސަރަހައްދަށް ހައްލެއް ހޯދުމުގައި 'އިންޓަނޭޝަނަލް ކޮމިއުނިޓީ' ގެ ގާނޫނީ މަސްއޫލިއްޔަތު ވަގުތުން ވަގުތަށް އަދާކުރުމަށް ގޮވާލަން. މިކަމަށް ދެމެހެއްޓެނިވި ގޮތެެއްގައި އެ ސަރަހައްދުގައި ހަމަޖެހުން ގާއިމުކޮށް ހުރިހާ އާއްމުންނަށް ދާއިމީ ގޮތެއްގައި ރައްކާތެރިކަން ހޯދައިދޭންޖެހޭ،" އެ ބަޔާނުގައި ބުނެފައިވެ އެވެ.
ޑިިމޮކްރެޓްސް އިން ބުނިގޮތުގައި އިސްރާއީލުން މިހާރު ހިނގަމުންދާ ޖަރީމާތަކުގެ ސަބަބުން ފަލަސްތީނުގެ ރައްޔިތުންނަށް ލިބެންޖެހޭ އެތައް ހައްގަކުން މަހުރޫމްވެ، އެ ގައުމުގައި ލާއިންސާނީ ހާލަތްތައް ގާއިމުވެ އެގައުމުގައި ދިރިއުޅުން އިންސާނިއްޔަތާ ހިލާފުވެގެން ވަނީ ގޮސްފަ އެވެ.
