ފަލަސްތީނާއެކު ދިވެހީން ތިބިކަން ހާމަކޮށް އިޒްރޭލުގެ އަނިޔާވެރިކަމާ ދެކޮޅަށް މުޅި ރާއްޖޭގައި އެއްވުންތަކެއް ބާއްވަން ތައްޔާރުވެއްޖެ އެވެ.
ރާއްޖޭގެ އެކި ސަރަހައްދުތަކުގައި ހަރަކާތްތެރިވާ ޖަމިއްޔާ، ޖަމާއަތްތައް ގުޅިގެން ކުރިއަށް ގެންދަން ހަމަޖެހިފަައިވާ އެ އެއްވުން މާލޭގައި ވެސް ކުރިއަށް ގެންދާނެ ކަމަށް އެއްވުން ރާވާ ހިންގުމުގައި ހަރަކާތްތެރިވާ އަޒްހަދު އަހުމަދު ބުންޏެވެ.
"ފުރަތަމަ މިއޮތީ ބުރާސްފަތި ދުވަހުގެ ރޭ ސުލްހަވެރި އެއްވުމެއް، އެ ހަރަކާތުގައި ބައިވެރިވާން ބޭނުންވާ ހުރިހާ ފަރާތްތަކަށް އެ ފުރުސަތު އޮތީ މިހާރު ހުޅުވާލެވިފައި،" އަޒްހަދު ބުންޏެވެ.
އޭނާ ބުނީ އެ ހަރަކާތް ކުރިއަށް ގެންދާނެ ސީދާ ވަގުތެއް އަދި ކަނޑައަޅާފައި ނުވަނީ ކަމާބެހޭ އިދާރާތަކުން ނަގަންޖެހޭ ހުއްދަތައް ނެގުމުގެ މަސައްކަތް ކުރަމުންދާތީ ކަމަށެވެ. އެ މުއައްސަސާތަކުން ހުއްދަ ލިބުމުނުހައި އަވަހަކަށް އެއްވުމާ ބެހޭ އިތުރު މައުލޫމާތު ހާމަކުރަމުން ގެންދާނެ ކަމަށް އަޒްހަދު ބުންޏެވެ.
ބުރާސްފަތި ދުވަހުގެ ރޭ ކުރިއަށް ގެންދިއުމަށް ހަމަޖެހިފައިވާ އެއްވުމުގެ އިތުރުން ޖެހިގެން އަންނަ ހުކުރު ދުވަހު ވެސް މުޅި ރާއްޖޭގައި ސައިކަލު ބުރެއް ޖެހުމަށް ނިންމާފައިވާ ކަމަށް އަޒްހަދު ވިދާޅުވި އެވެ.
"މި ހަފުތާގެ ހުކުރު ދުވަހު އޮންނާނެ ސައިކަލު ބުރެއް، އެ ހަރަކާތުގައި ވެސް ބައިވެރިވާން ބޭނުންވާ ހުރިހާ ފަރާތްތަކަށް އެ ފުރުސަތު އޮންނާނެ،" އަޒްހަދު ބުންޏެވެ.
އޭނާ ވިދާޅުވީ އެ ދެ ހަރަކާތައް ފަހު ވެސް ފަލަސްތީނުގެ ދިފާއުގައި ގިނަ ހަރަކާތްތަކެއް ހިންގުމަށް މަޝްވަރާ ކުރެވެމުން އަންނަ ކަމަށާއި އެކަންކަމާ ގުޅޭ މައުލޫމާތު ވަރަށް އަވަހަށް އާންމު ކުރާނެ ކަމަށެވެ.
އެ ހަރަކާތްތަކުގައި ބައިވެރިވުމަށް އެދޭ ޖަމިއްޔާ ޖަމާއަތްތަކުން އައިއޭސީގެ ލޯކަލް ކޯޑިނޭޝަން ނަންބަރު، 9862121 އަށް ގުޅުމަށް އެފަރާތުން އެދެ އެވެ.
